Mahabharata · Chapter 2.35

nakulasya tu vakṣyāmi karmāṇi vijayaṃ tathā /
vāsudevajitāmāśāṃ yathā'sāvajayatprabhuḥ //

niryāya khāṇḍavaprasthātpratīcīmabhito diśam /
uddiśya matimānprāyānmahatyā senayā saha //

siṃhanādena mahatā yodhānāṃ garjitena ca /
rathanemininādaiśca kampayanvasudhāmimām //

tato bahu dhanaṃ ramyaṃ gāvāḍhyaṃ dhanadhānyavat /
kārtikeyasya dayitaṃ rohītakupādravat //

tatra yuddhaṃ mahaccāsīcchūrairmattamayūrakaiḥ /
marubhūmiṃ sa kārtsnyena tathaiva bahudhānyakam //

śairīṣakaṃ mahetthaṃ ca vaśe cakre mahādyutiḥ /
ākrośaṃ caiva rājarṣi tena yuddhamabhūnmahat //

tāndaśārṇānsa jitvā ca pratasthe pāṇḍunandanaḥ /
śibīṃstrigartānambaṣṭhānmālavānpañca karpaṭān //

tathā madhyamakeyāṃśca vāṭadhānāndvijānatha /
punaśca parivṛtyātha puṣkarāraṇyavāsinaḥ //

gaṇānutsavasaṅketānvyajayatpuruṣarṣabhaḥ /
sindhukūlāśritā ye ca grāmaṇīyā mahābalāḥ //

śūdrābhīragaṇāścaiva ye cāśritya sarasvatīm /
vartayanti ca ye matsyairye ca parvatavāsinaḥ //

katsnaṃ pañcanandaṃ caiva tathaivāmaraparvatam /
uttarajyotiṣaṃ caiva tathā divyakaṭaṃ puram //

dvārapālaṃ ca tarasā vaśe cakre mahādyutiḥ /
rāmaṭhānhārahūṇāṃśca pratīcyāścaiva ye nṛpāḥ //

tānsarvānsa vaśe cakre śāsanādeva pāṇḍavaḥ /
tatrasthaḥ preṣayāmāsa vāsudevāya bhārata //

sa cāsya gatabhī rājanpratijagrāha śāsanam /
tataḥ śākalamabhyetya madrāṇāṃ puṭabhedanam //

mātulaṃ prītipūrveṇa śalyaṃ cakre vaśe balī /
sa tena satkṛto rājñā satkārārho viśāmpate //

ratnāni bhūrīṇyādāya sampratasthe yudhāṃ patiḥ /
tataḥ sāgarakukṣisthānmlecchānparamadāruṇān //

pahlavānvarbarāṃścaiva kirātānyavanāñśakān / tato ratnānyapādāya vaśe kṛtvā ca pārthivān /
nyavartata kuruśreṣṭho nakulaścitramārgavit //

karamāṇāṃ sahasrāṇi kośaṃ tasya mahātmanaḥ /
ūhardaśa mahārāja kṛcchrādiva mahādhanam //

indraprasthagataṃ vīramabhyetya sa yudhiṣṭhiram /
tato mādrīsutaḥ śrīmāndhanaṃ tasmai nyavedayat //

evaṃ vijitya nakulo diśaṃ varuṇapālitām /
pratīcīṃ vāsudevena nirjitāṃ bharatarṣabha //