Mahabharata · Chapter 2.31

tataḥ kumāraviṣaye śreṇimantamathājayat /
kosalādhipatiṃ caiva bṛhadbalamarindamaḥ //

ayodhyāyāṃ tu dharmajñaṃ dīrghayajñaṃ mahābalam /
ajayatṇaṇḍavaśreṣṭho nātitīvreṇa karmaṇā //

tato gopālakakṣaṃ ca sottarānapi kosalān /
mallānāmadhipaṃ caiva pārthivaṃ cājayatprabhuḥ //

tato himavataḥ pārśvaṃ samabhyetya jalodbhavam /
sarvamalpena kālena deśaṃ cakre vaśaṃ balī //

evaṃ bahuvidhāndeśānvijigye bharatarṣabhaḥ /
bhallāṭamabhito jigye śuktimantaṃ ca parvatam //

pāṇḍavaḥ sumahāvīryo balena balināṃ varaḥ /
sa kāśirājaṃ samare subāhumanivartinam //

vaśe cakre mahābāhurbhīmo bhīmaparākramaḥ /
tataḥ supārśvamabhitastathā rājapatiṃ kratham //

yudhyamānaṃ bālatsaṅkhye vijigye pāṇḍavarṣabhaḥ /
tato matsyānmahātejā maladāṃśca mahābalān //

anaghānabhayāṃścaiva paśubhūmiṃ ca sarvaśaḥ /
nivṛtya ca mahābāhurmadadhāraṃ mahīdharam //

somadheyāṃśca nirjitya pratyayāvuttarāmukhaḥ /
vatsabhūmiṃ ca kaunteyo vijigye balavānbalāt //

bhargāṇāmadhipaṃ caiva niṣādādhipatiṃ tathā /
vijigye bhūmipālāṃśca mamimatpramukhānbahūn //

tato dakṣiṇamallāṃśca bhogavantaṃ ca parvatam /
tarasaivājayadbhīmo nātitīvreṇa karmaṇā //

śarmakānvarmakāṃścaiva vyajayatsāntvapūrvakam /
vaidehakaṃ ca rājānaṃ janakaṃ jagatīpatim //

vijigye puruṣavyāghro nātitīvreṇa karmaṇā /
śakāṃśca barbarāścaiva ajayacchadmapūrvakam //

vaidehasthastu kaunteya indraparvatamantikāt /
kirātānāmadhipatīnajayatsapta pāṇḍavaḥ //

tataḥ suhyānprasuhyāṃśca sapakṣānativīryavān /
vijitya yudhi kaunteyo māgadhānabhyadhādbalī //

daṇḍaṃ ca daṇḍadhāraṃ ca vijitya pṛthivīpatīn /
taireva sahitaiḥ sarvairgirivrajamupādravat //

jārāsandhiṃ sāntvayitvā kare ca viniveśya ha /
taireva sahitaiḥ sarvaiḥ karṇamabyadravadbalī //

sa kampayanniva mahīṃ balena catuṅgiṇā /
yuyudhe pāṇḍavaśreṣṭhaḥ karṇenāmitraghātinā //

sa karṇaṃ yudhi nirjitya vaśe kṛtvā ca bhārata /
tato vijigye balavānrājñaḥ parvatavāsinaḥ //

atha modāgirau caiva rājānaṃ balavattaram /
pāṇḍavo bāhuvīryeṇa nijaghāna mahāmṛdhe //

tataḥ puṇḍrādhipaṃ vīraṃ vāsudevaṃ samāyayau /
idānīṃ vṛṣṇivīreṇa na yotsyāmīti pauṇḍrakaḥ //

kṛṣṇasya bhujasantrāsātkaramāśu dadau nṛpaḥ /
kauśikīkacchanilayaṃ rājānaṃ ca mahaujasam //

ubhau balabhṛtau vīrāvumau tīvraparākramau /
nirjityājau mahārāja vaṅgarājamupādravat //

samudrasena nirjitya candrasenaṃ ca pārthivam /
tāmraliptaṃ ca rājānaṃ karvaṭādhipatiṃ tathā //

suhyānāmadhipaṃ caiva ye ca sāgaravāsinaḥ /
sarvānmlecchagaṇāṃścaiva vijigye bharatarṣabhaḥ //

evaṃ bahuvidhāndeśānvijitya pavanātmajaḥ /
vasu tebhya upādāya lauhityamagadbalī //

sa sarvānmlecchanṛpatīnsāgarānūpavāsinaḥ /
karamāhārayāmāsa ratnāni vividhāni ca //

candanāguruvastrāṇi maṇimauktikakambalam /
kāñcanaṃ rajataṃ caiva vidrumaṃ ca mahādhanam //

te koṭīśatasaṅkhyena kaunteyaṃ mahatā tadā /
abhyavarṣanmahātmānaṃ dhanavarṣeṇa pāṇḍavam //

indraprasthamupāgamya bhīmo bhīmaparākramaḥ /
nivedayāmāsa tadā dharmarājāya taddhanam //