Mahabharata · Chapter 2.30

etasminneva kāle tu bhīmaseno'pi vīryavān / dharmarājamanujñāpya yayau prācīṃ diśaṃ prati // 5

mahatā balacakreṇa pararāṣṭrāvamardinā / hastyaśvarathapūrṇena daṃśitena pratāpavān /

vṛto bharataśārdūlo dviṣacchokavivardhanaḥ /
sa gatvā naraśārdūlaḥ pañcālānāṃ puraṃ mahat //

pañcālānvividhopāyaiḥ sāntvayāmāsa pāṇḍavaḥ /
kiñcitkaraṃ samādāya videhānāṃ puraṃ yayau //
tataḥ sa gaṇḍakāñśūro videhānbharatarṣabhaḥ //

vijityālpena kālena daśārṇānajayatprabhuḥ / tatra dāśārṇako rājā sudharmā romaharṣaṇam /
kṛtavānbhīmasenema mahadyuddhaṃ nirāyudham /

bhīmasenastu taddṛṣṭvā tasya karma mahātmanaḥ /
adhisenāpatiṃ cakre sudharmāṇaṃ mahābalam //

tataḥ prācīṃ diśaṃ bhīmo yayau bhīmaparākramaḥ /
sainyena mahatā rājankampayanniva medinīm //

so'śvamedheśvaraṃ rājanrocamānaṃ sahānugam /
jigāya samare vīro balena balināṃ varaḥ //

sa taṃ nirjitya kaunteyo nātitīvreṇa karmaṇā /
pūrvadeśaṃ mahāvīryaṃ vijigye kuranandanaḥ //

tato dakṣiṇamāgamya pulindanagaraṃ mahat /
sukumāraṃ vaśe cakre sumitraṃ ca narādhipam //

tatastu dharmarājasya śāsanādbharatarṣabhaḥ /
śiśupālaṃ mahāvīryamabhyagājjanamejaya //

cedirājo'pi tacchrutvā pāṇḍavasya cikīrṣitam /
upaniṣkamya nagarātpratyagṛhṇātparantapa //

tau sametya mahārāja kurucedivṛṣau tadā /
ubhayorātmakulayoḥ kauśalaṃ paryapṛcchatām //

tato nivedya tadrāṣṭraṃ cedirājo viśāmpate / uvāca bhīmaṃ prahasankimidaṃ kuruṣe'nagha /

tasya bhīmastadācakhyau dharmarājacikīrṣitam /
sa ca taṃ pratigṛhyaiva tathā cakre narādhipaḥ //

tato bhīmastatra rājanniṣitvā tridaśāḥ kṣapāḥ /
satkṛtaḥ śiśupālena yayau sabalavāhanaḥ //