Mahabharata · Chapter 2.22

na smarāmi kadā vairaṃ kṛtaṃ yuṣmābhirityuta /
cintayaṃśca na paśyāmi bhavatāṃ prati vaikṛtam //

vaikṛte vā sati kathaṃ manyadhvaṃ māmanāgasam /
ariṃ vai brūta he viprāḥ satāṃ samaya eṣa hi //

arthadharmopaghātāddhi manaḥ samupatapyate /
yo'nāgasi prasajati kṣatriyo hi na saṃśayaṭaḥ //

ato'nyathā caram̐lloke dharmajñaḥ sanmahārathaḥ /
vṛjināṃ gatimāpnoti śreyaso'pyupahanti ca //

trailokye kṣatradharmo hi śreyānvai sādhucāriṇām /
nānyaṃ dharmaṃ praśaṃsanti ye ca dharmavido janāḥ //

tasya me'dya sthitasyeha svadharme niyatātmanaḥ /
anāgasaṃ prajānāṃ ca pramādādiva jalpatha //
kṛṣṇa uvāca /

kulakāryaṃ mahābāho kaścidekaḥ kulodvahaḥ /
vahate yastanniyogādvayamabhyudyatāstvayi //

tvayā copahṛtā rājankṣatriyā lokavāsinaḥ /
tadāgaḥ krūramutpādya manyase kimanāgasam //

rājā rājñaḥ kathaṃ sādhūnhiṃsyānnṛpatisattama /
tadrājñaḥ sannigṛhya tvaṃ rudrāyopajihīrṣasi //

asmāṃstadenopagacchetkṛtaṃ bārhadratha tvayā /
vayaṃ hiṃ śaktā dharmasya rakṣaṇe dharmacāriṇaḥ //

tasmādadyopagacchāmastava bārhadrathāntikam / manuṣyāṇāṃ samālambho na ca dṛṣṭaḥ kadācana /
sa kathaṃ mānuṣairdevaṃ yaṣṭumicchasi śaṅkaram //

savarṇo hi savarṇānāṃ paśusañjñāṃ kariṣyasi /
ko'nyaṃ evaṃ yathā hi tvaṃ jarāsandha vṛthāmatiḥ //

yasyāṃ yasyāmavasthāyāṃ yadyatkarma karoti yaḥ /
tasyāṃ tasyāmavasthāyāṃ tatphalaṃ samavāpnuyāt //

te tvāṃ jñātikṣayakaraṃ yamamārtānusāriṇaḥ /
jñātivṛddhinimittārthaṃ vinihantumihāgatāḥ //

nāsti loke pumānanyaḥ kṣatriyoṣviti caiva tat /
manyase sa ca te rājansumahānbuddhiviplavaḥ //

ko hi jānannabhijanamātmavānkṣatriyo nṛpa /
nāviśetsvargamatulaṃ raṇānantaramavyayam //

svargaṃ hyeva samāsthāya raṇayajñeṣu dīkṣitāḥ /
jayanti kṣatriyā lokāṃstadviddhi manujarṣabha //

svargayonirmahadbrahma svargayonirmahadyaśaḥ /
svargaṃ yonistapo yuddhe mṛtyuḥ so'vyabhicāravān //

eṣa hyaindro vaijayanto guṇairnityaṃ samāhitaḥ /
yenāsurānparājitya jagatpāti śatakratuḥ //

svargamārgāya kasya syādvigraho vai yathā tava /
māgadhairvipulaiḥ sainyairbāhulyabaladarpitaḥ //

mā'vamaṃsthāḥ parānrājannāsti vīryaṃ nare nare /
samaṃ cejastvayā caiva viśiṣṭaṃ vā nareśvara //

yāvadetadasambuddhaṃ tāvadeva bhavettava /
viṣahyametadasmākamato rājanbravīmi te //

jahi tvaṃ sadṛśeṣveva mānaṃ darpaṃ ca māgadha /
mā gamaḥ sasutāmātyaḥ sabalaśca yamakṣayam //

dambhodbhavaḥ kārtavīrya uttaraśca bṛhadrathaḥ /
śreyaso hyavamatyeha vineśuḥ sabalā nṛpāḥ //

yuyukṣamāṇāstvatto hi na vayaṃ brāhmaṇā dhruvam / śaurirasmi hṛṣīkeśo nṛvīrau pāṇḍavāvimau /
anayormātuleyaṃ ca kṛṣṇaṃ māṃ viddhi te ripum //

tvāmāhvayāmahe rājansthiro yudhvasva māgadha /
muccha vā nṛpatīnsarvān gaccha vā tvaṃ yamakṣayam //
vaiśampāyana uvāca //

etacchrutvā jarāsandhaḥ kruddho vacanamabravīt //

nāhaṃ kaṃsaḥ pralambo vā na bāṇo na ca muṣṭikaḥ /
narako nendratapano na keśī na ca pūtanā //

na kālayavano vā'pi ye tvayā nihatā yudhi /
tvaṃ tu gopakulotpanno jātiṃ vai paurvikīṃ smara //

yo'smadbhayādatikramya sāgarānūpamāśritaḥ /
janmabhūmiṃ parityajya madhurāṃ prākṛto yathā //

so'dhunā katthase śaure śaradīva yathā ghanaḥ /
adyānṛṇyaṃ kariṣyāmi bhojarājasya dhīmataḥ //

jāmāturaugrasenasya tvāṃ nihatyādya mādhava /
cirakāṅkṣito me saṅgrāmastvāṃ hantuṃ samuhṛdguṇam //

diṣṭyā me saphalo yatnaḥ kṛto devaiḥ savāsavaiḥ /
klībāvimau ca govinda bhīmasenārjunāvubhau //

hiṃsyāsi yudhi vikramya siṃhaḥ kṣudramṛgāviva /
vaiśampāyana uvāca //
tasya roṣābhibhūtasya jarāsandhasya garjataḥ //

sarvabhūtāni vitremuṣe tatrāsansamāgatāḥ /
śrībhagavānuvāca //
kiṃ garjasi jarāsandha karmaṇā tatsamācara //

mama nirdeśakartṛbhyāṃ pāṇḍavābhyāṃ nṛpādhama / samātyaṃ sasutaṃ cādya ghātayiṣyāmyahaṃ raṇe /
na kathañcana jīvanvai pravekṣyasi purottamam //
jarāsandha uvāca /

nājitānvai narapatīnahamādadmi kāścana /
ajitaḥ paryavasthātā ko'tra yo na mayā jitaḥ //

kṣatriyasyaitadevāhurdharmyaṃ kṛṣṇopajīvanam /
vikramya vaśamānīya kāmato yatsamācaret //

devātārthamupāhṛtya rājñaḥ kṛṣṇa kathaṃ bhayāt /
ahamadya vimucyeyaṃ kṣātraṃ vratamanusmaran //

sainyaṃ sainyena vyūḍhena eka ekena vā punaḥ /
dvābhyāṃ tribhirvā yotsye'haṃ yugatpṛthageva vā //
vaiśampāya uvāca /

evamuktvā jarāsandhaḥ sahadevābhiṣecanam /
ajñāpayattadā rājā yayutsurbhīmakarmabhiḥ //

sa tu senāpatiṃ rājā sasmāra bharatarṣabha /
kauśikaṃ citrasenaṃ ca tasminyuddha upasthite //

yayoste nāmanī rājanhaṃseti ḍibiketi ca /
pūrvaṃ saṅkathite pumbhirnṛloke lokasatkṛte //

taṃ tu rājanvibhuḥ śaurī rājānaṃ balināṃ varam /
smṛtvā puruṣaśārdūlaḥ śārdūlasamavikramam //

satyasandho jarāsandhaṃ bhuvi bhīmaparākramam /
bhāgamanyasya nirdiṣṭamavadhyaṃ madhurbhirmṛdheḥ //

nātmanā'tmavatāṃ mukhya iyeṣa madhusūdanaḥ /
brāhmīmājñāṃ puraskṛtya hantuṃ haladharānujaḥ //