Mahabharata · Chapter 2.1

nārāyaṇaṃ namaskṛtya naraṃ caiva narottamam /
devīṃ sarasvatīṃ caivatato jayamudīrayet //
janamejaya uvāca /

arjuno jayatāṃ śreṣṭho mocayitvā mayaṃ tadā /
kiṃ cakāra mahātejāstanme brūhi dvijottama //
vaiśampāyana uvāca /

śṛṇu rājannavahitaścaritaṃ pūrvakasya te /
mokṣayitvā mayaṃ tatra pārthaḥ śastrabhṛtāṃ varaḥ //

gāṇḍivaṃ kārmukaśreṣṭhaṃ tūṇī cākṣayasāyakau /
divyānyastrāṇi rājendra durlabhāni nṛpairbhuvi //

rathadhvajapatākāśca śvetāśvāṃśca sa vīryavān / etāni pāvakātprāpya mudā paramayā yutaḥ /
tasthau pārtho mahāvīryastadā saha mayena saḥ //

tato'bravīnmayaḥ pārthaṃ vāsudevasya sannidhau /
pāṇḍavena paritrātastatkṛtaṃ pratyanusmaran //

prāñjaliḥ ślakṣṇayā vācā pūjayitvā punaḥ punaḥ /
maya uvāca /
asmācca kṛṣṇātsaṅkruddhātpāvakācca didhakṣataḥ //

tvayā trāto'smi kaunteya brūhi kiṃ karavāṇi te /
ahaṃ hi viśvakarmā vai asurāṇāṃ parantapa //

tasmātte vismayaṃ kiñcitkuryāmanyaiḥ suduṣkaram //
vaiśampāyana uvāca /

evamukto mahāvīryaḥ pārtho māyāvidaṃ mayam /
dhyātvā muhūrtaṃ kaunteyaḥ prahasanvākyamabravīt //

kṛtameva tvayā sarvaṃ svasti gaccha mahā'sura /
prītimānbhava me nityaṃ prītimanto vayaṃ ca te //

propakārādarthaṃ hi nādāsyāmīti me vratam /
uvāca /
yuktametattvayi vibho yadāttha puruṣarṣabha //

prītipūrvamahaṃ kiñcitkartumicchāmi te'rjuna /
ahaṃ hi viśvakarmā vai dānavānāṃ mahākaviḥ //

so'haṃ vai tvatkṛte kiñcitkartumicchāmi pāṇḍava /
dānavānāṃ purā pārtha prāsādā hi mayā kṛtāḥ //

ramyāṇi sukhagarbhāṇi bhogāḍhyāni sahasraśaḥ /
udyānāni ca ramyāṇi sarāṃsi vividhāni ca //

vicitrāṇi ca vastrāṇi kāmagāni rathāni ca /
nagarāṇi viśālāni sāṭṭaprākāravanti ca //

vāhanāni ca mukhyāni vicitrāṇi sahasraśaḥ / bilāni ramaṇīyāni sukhayuktāni vai bhṛśam /
ete kṛtā mayā tasmādicchāmi phalguna //
arjuna uvāca /

prāṇakṛcchrādvinirmuktamātmānaṃ manyase mayā /
evaṃ gate na śakṣyāmi kiñcitkārayituṃ tvayā //

na cāpi tava saṅkalpaṃ moghamicchāmi dānava /
kṛṣṇasya kriyatāṃ kiñcittathā pratikṛtaṃ mayi //
vaiśampāyana uvāca /

codito vāsudevastu mayaṃ prati nararṣabha /
muhūrtamiva sandadhyau kimayaṃ codyatāmiti //

tato vicintya manasā lokanāthaḥ prajāpitaḥ /
codayāmāsa taṃ kṛṣṇaḥ sabhā vai kriyatāmiti //

yadi tvaṃ kartukāmo'si priyaṃ śilpavatāṃ vara /
dharmarājasya dayitāṃ yādṛśīmiha manyase //

yāṃ kriyāṃ nānukuryuste mānavāḥ prekṣya viṣṭhitāḥ /
manuṣyaloke sakale tādṛśīṃ kuru vai sabhām //

yatra dvivyānabhiprāyānpaśyema vihitāṃstvayā /
āsurānmānupāṃścaiva tādṛśīṃ kuru vai sabhām //
vaiśampāyana uvāca /

pratigṛhya tu tadvākyaṃ samprahṛṣṭo mayastadā /
vimānapratimāṃ cakre pāṇḍavasya śubhāṃ sabhām //

tataḥ kṛṣṇaśca pārthaśca dharmarāje yudhiṣṭhire /
sarvametatsamāvedya darśayāmāsaturmayam //

tasmai yudhiṣṭhiraḥ pūjāṃ yathārhamakarottadā /
sa tu tāṃ pratijagrāha mayaḥ satkṛtya bhārata //

sa pūrvadevacaritaṃ tadā tatra viśāmpate /
kathayāmāsa daiteyaḥ pāṇḍuputreṣu bhārata //

sa kālaṃ kañcidāśvasya viśvakarmā vicintya tu /
sabhāṃ pracakame kartuṃ pāṇḍavānāṃ mahātmanām //

abhiprāyeṇa pārthānāṃ kṛṣṇasya ca mahātmanaḥ /
puṇye'hani mahātejāḥ kṛtakautukamaṅgalaḥ //

tarpayitvā dvijaśreṣṭhānpāyasena sahasraśaḥ /
dhanaṃ bahuvidhaṃ dattvā tebhya eva ca vīryavān //

sarvartuguṇasampannāṃ divyarūpāṃ manoramām /
daśakiṣkusahasrāṃ tāṃ māpayāmāsa sarvataḥ //