Mahabharata · Chapter 2.18

jarā nāmāsmi bhadraṃ te rākṣasī kāmarūpiṇī /
tava veśmani rājendra pūjitā nyavasaṃ sukham //

gṛhe gṛhe manuṣyāṇāṃ nityaṃ tiṣṭhāmi rākṣasī /
gṛhadevīti nāmnā vai purā sṛṣṭā svayammbhuvā //

dānavānāṃ vināśāya sthāpitā divyarūpiṇī /
yo māṃ bhaktyā likhetkuḍye saputrāṃ yauvanānvitām //

gṛhe tasya bhavedvṛddhiranyathā kṣayamāpnuyāt /
tvadgṛhe tiṣṭhamānā'haṃ pūjitā'haṃ sadā vibho //

likhitā caiva kuḍyeṣu putrairbahubhirāvṛtā /
gandhapuṣpaistathā dhūpairbhakṣyabhojyaiḥ supūjitā //

sā'haṃ pratyupakārārthaṃ cintayantyaniśaṃ nṛpa / taveme putraśakale dṛṣṭavatyasmi dhārmikā /

saṃśliṣite mayā daivātkumāraḥ samapadyata /
tava bhāgyānmahārāja hetumātramahaṃ tviha //

meruṃ vā khādituṃ śaktā kiṃ punastava bālakam /
gṛhasampūjanāttuṣṭyā mayā pratyarpitastava //

mama nāmnā ca loke'sminkhyāta eva bhaviṣyati /
kṛṣṇa uvāca /
evamuktvā tu sā rājaṃstatraivāntaradhīyata /
sa saṅgṛhya kumāraṃ taṃ praviveśa gṛhaṃ nṛpaḥ //

tasya bālasya yatkṛtyaṃ taccakāra nṛpastadā /
ājñāpayacca rākṣasyā magadheṣu mahotsavam //

tasya nāmākaroccaiva pitāmahasamaḥ pitā /
jarayā sandhito yasmājjarāsandho bhavatvayam //

so'vardhata mahātejā māgadhādhipateḥ sutaḥ /
pramāṇabalasampanno hutāhutirivānalaḥ //

evaṃ sa vavṛdhe rājankumāraḥ puṣkarekṣaṇaḥ /
kālena mahatā cāpi yauvanastho babhūva ha //
mātāpitrornandakaraḥ śuklapakṣe yathā śaśī //