Mahabharata · Chapter 2.12

prāyaśo rājalokaste kathito vadatāṃ vara /
vaivasvatasabhāyāṃ tu yathā vadasi me prabho //

varuṇasya sabhāyāṃ tu nāgāste kathitā vibho /
daityendrāścāpi bhūyiṣṭhāḥ saritaḥ sāgarāstathā //

tathā dhanapateryakṣā guhyakā rākṣasāstathā /
gandharvāpsarasaścaiva bhagavāṃśca vṛṣadhvajaḥ //

pitāmahasabhāyāṃ tu kathitāste maharṣabhaḥ /
sarve devanikāyāśca sarvaśāstrāṇi vaiva ha //

śakrasya tu sabhāyāṃ tu devāḥ saṅkīrtitā mune /
uddeśataśca gandharvā vividhāśca maharṣayaḥ //

eka eva tu rājarṣirhariścandro mahāmune /
kathitaste sabhāyāṃ vai devendrasya mahātmanaḥ //

kiṃ karma tenācaritaṃ tapo vā niyatavrata /
yenāsau saha śakreṇa spardhade sumahāyaśāḥ //

pitṛlokagataścaiva tvayā vipra pitā mama /
dṛṣṭaḥ pāṇḍurmahābhāgaḥ kathaṃ vā'pi samāgataḥ //

kimuktavāṃśca bhagavaṃstanmamācakṣva suvrata /
tvattaḥ śrotuṃ sarvamidaṃ paraṃ kautūhalaṃ hi me //
nārada uvāca /

yanmāṃ pṛcchasi rājendra hariścandraṃ prati prabho /
tatte'haṃ sampravakṣyāmi māhātmyaṃ tasya dhīmataḥ //

ikṣvākūṇāṃ kule jātastriśaṅkurnāma pārthivaḥ /
ayodhyādhipatirvīro viśvāmitreṇa saṃsthitaḥ //

tasya satyavatī nāma patnī kekayavaṃśajā /
tasyāṃ garbhaḥ samabhavaddharmeṇa kurunandana //

sā ca kāle mahābhāgā rājanmāsaṃ praviśya ca / kumāraṃ janayāmāsa hariścandramakalmaṣam /
sa vai rājā hariścandrastraiśaṅkava iti smṛtaḥ //

sa rājā balavānāsītsamrāṭ sarvamahīkṣitām /
tasya sarve mahīpālāḥ śāsanāvanatāḥ sthitāḥ //

tenaikaṃ rathamāsthāya jaitraṃ hemavibhūṣitam /
śastrapratāpena jitā dvīpāḥ sapta janeśvara //

sa nirjitya mahīṃ kṛtsnāṃ saśailavanakānanām /
ājahāra mahārāja rājasūyaṃ mahākratum //

tasya sarve mahīpālā dhanānyājahrurājñayā /
dvijānāṃ pariveṣṭārastasminyajñe ca te'bhavan //

samāptayajño vidhivaddhariścandraḥ pratāpavān /
abhiṣiktaśca śuśubhe sāmrājyena narādhipaḥ //

rājasūye'bhiṣiktaśca samāptavaradakṣiṇe //

prādācca draviṇaṃ prītyā yācakānāṃ nareśvaraḥ /
yathoktavantaste tasmiṃstataḥ pañcaguṇādhikam //

atarpayacca vividhairvasubhirbrāhmaṇāṃstadā /
prasarpakāle samprāpte nānādigbhyaḥ samāgatān //

bhakṣyabhojyaiśca vividhairyathākāmapuraskṛtaiḥ / ratnaughatarpitaistuṣṭairdvijaiśca samudāhṛtam /
tejasvī ca yaśasvī ca nṛpebhyo'bhyadhiko'bhavat /

etasmātkāraṇādrājanhariścandro virājate /
tebhyo rājasahasrebhyastadvidvi bharatarṣabha //

samāpya ca hariścandro mahāyajñaṃ pratāpavān /
abhiṣiktaśca śuśubhe sāmrājyena narādhipa //

ye cānye ca mahīpālā rājasūyaṃ mahākratum / yajante te sahendreṇa modante bharatarṣabha /

ye cāpi ni naṃ prāptāḥ saṅgrāmeṣvapalāyinaḥ /
te tatsadanam tādya mondate bharatarṣabha //

tapasā ye ca tīvreṇa tyajantīha kalevaram /
te tatsthānaṃ samāsādya śrīmanto bhānti nityaśaḥ //

pitā ca tvā'ha kaunteya pāṇḍuḥ kauravanandana /
hariścandre śriyaṃ dṛṣṭvā nṛpatau jātavismayaḥ //

vijñāya mānuṣaṃ lokamāyāntaṃ māṃ narādhipa /
provāca praṇato bhūtvā vadethāstvaṃ yudhiṣṭhiram //

samartho'si mahīṃ jetuṃ bhrātaraste sthitā vaśe /
rājasūyaṃ kratuśreṣṭhamahārasveti bhārata //

tvayīṣṭavati putre'haṃ hariścandravadāśu vai /
modiṣye bahulāḥ śaśvatsamāḥ śakrasya saṃsadi //

evaṃ bhavatu vakṣye'haṃ tava putraṃ narādhipam /
bhūlokaṃ yadi gaccheyamiti pāṇḍumathābruvam //

tasya tvaṃ puruṣavyāghra saṅkalpaṃ kuru pāṇḍava /
gantāsitvaṃ mahendrasya pūrvaiḥ saha salokatām //

bahuvighnaśca nṛpate kratureṣa smṛto mahān /
chidrāṇyasya vāñchanti yajñaghnā brahmarākṣasāḥ //

yuddhaṃ ca kṣatraśamanaṃ pṛthivīkṣayakāraṇam /
kiñcideva nimittaṃ ca bhavatyatra kṣayāvaham //

etatsañcintya rājendra yatkṣamaṃ tatsamācara /
apramattotthito nityaṃ cāturvarṇyasya rakṣaṇe //

bhava edhasva modasva dhanaistarpaya ca dvijān / etatte vistareṇoktaṃ yanmāṃ tvaṃ paripṛcchasi /
āpṛcche tvāṃ gamiṣyāmi dāśārhanagarīṃ prati //
vaiśampāyana uvāca /

evamākhyāya pārthebhyo nārado janamejaya /
jagāma tairvṛto rājannṛṣibhiryaiḥ samāgataḥ //

gate tu nārade pārtho bhrātṛbhiḥ saha kauravaḥ /
rājasūyaṃ kratuśreṣṭhaṃ cintayāmāsa pārthivaḥ //