Mahabharata · Chapter 2.10

sabhā vaiśravaṇī rājañśatayojanamāyatā /
vistīrṇā saptatiścaiva yojanāni sitaprabhā //

tapasā nirjitā rājansvayaṃ vaiśravaṇena sā /
śaśiprabhā prāvaraṇā kailāsaśikharopamā //

guhyakairuhyamānā sā khe viṣakteva śobhate /
divyā hemamayairuccaiḥ prāsādairupaśobhitā //

mahāratnavatī citrā divyagandhā manoramā / sitābhraśikharākārā plavamāneva dṛśyate /

divyā hemamayai raṅgairvidyudbhiriva citritā /
tasyāṃ vaiśravaṇo rājā vicitrābharaṇāmbaraḥ //

strīsahasrairvṛtaḥ śrīmānāste jvalitakuṇḍalaḥ / saha patnyā mahārāja ṛddhyā saha virājate /

sarvābharaṇabhūṣiṇyā vapuṣmatyā dhaneśvaraḥ / divākaranibhe puṇye divyāstaraṇasaṃvṛte /
divyapādopadhāne ca niṣaṇṇaḥ paramāsane //

mandārāṇāmudārāṇāṃ vanāni pariloḍayan /
saugandhīkavanānāṃ ca gandhaṃ gandhavaho vahan //

nalinyāścālakākhyāyā nandanasya vanasya ca /
śīto hṛdayasaṃhlādī vāyustamupasevate //

tatra devāḥ sagandharvā gaṇairapsarasāṃ vṛtāḥ /
divyatānairmahārāja gāyantisma sabhāgatāḥ //

miśrakeśī ca rambhā ca citrasenā śucismitā /
cārunetrā ghṛtācī ca menakā puñjikasthalā //

viśvācī sahajanyā ca pramlocā urvaśī //

vargā ca saurabheyī ca samīcī budbudā latā /
etāḥ sahasraśaścānyā nṛttagītaviśāradāḥ //

upatiṣṭhanti dhanadaṃ gandharvāpsarasāṃ gaṇāḥ /
aniśaṃ divyavāditrairnṛttagītaiśca sa sabhā //

aśūnyā rucirā bhāti gandharvāpsarasāṃ gaṇaiḥ /
kinnarā nāma gandharvā narā nāma tathā'pare //

māṇibhadro'tha dhanadaḥ śvetabhadraśca guhyakaḥ /
kaśerako gaṇḍakaṇḍūḥ pradyotaśca mahābalaḥ //

kustambaruḥ piśācaśca gajakarṇo viśālakaḥ /
varāhakarṇastāmrauṣṭhaḥ phalakakṣaḥ phalodakaḥ //

haṃsacūḍaḥ śaikhāvarto hemanetro vibhīṣaṇaḥ /
puṣpānanaḥ piṅgalakaḥ śoṇitodaḥ pravālakaḥ //

vṛkṣavāsyaniketaśca cīravāsāśca bhārata /
ete cānye ca bahavo yakṣāḥ śatasahasraśaḥ //

sadā bhagavatī lakṣmīstatraiva nalakūbaraḥ /
ahaṃ ca bahuśastasyāṃ bhavantyanye ca madvidhāḥ //

brahmarṣayo bhavantyatra tathā devarṣayo'pare /
kravyādāśca tathaivānye gandharvāśca mahābalāḥ //

upāsate mahātmānaṃ tasyāṃ dhanadamīśvaram /
bhagavānbhūtasaṅghaiśca vṛtaḥ śatasahasraśaḥ //

umāpatiḥ paśupatiḥ śūlabhṛdbhaganetrahā /
tryambako rājaśārdūla devī ca vigataklamā //

vāmanairvikaṭaiḥ kubjaiḥ kṣatajākṣairmahāravaiḥ /
medomāṃsāśanairugrairugradhanvā mahābalaḥ //

nānāpraharaṇairugrairvātairiva mahājavaiḥ /
vṛtaḥ sakhāyamanvāste sadaiva dhanadaṃ nṛpa //

prahṛṣṭāḥ śataśaścānye bahuśaḥ saparicchadāḥ /
gandharvāṇāṃ ca patayo viśvāvasurhahā huhūḥ //

tumburuḥ pravataścaiva śailūṣaśca tathā'paraḥ /
citrasenaśca gītajñastathā citrarathopi ca //

ete cānye ca gandharvā dhaneśvaramupāsate /
vidyādharādhipaścaiva cakradharmā sahānujaiḥ //

upācarati tatra sma dhanānāmīśvaraṃ prabhum /
kinnarāḥ śataśastatra dhanānāmīśvaraṃ prabhum //

āsate cāpi rājāno bhagadattapurogamāḥ /
drumaḥ kimpuruṣeśaśca upāste dhanadeśvaram //

rākṣasādhipatiścaiva mahendro gandhamādanaḥ /
saha yakṣaiḥ sagandharvaiḥ saha sarvairniśācaraiḥ //

vibhīṣaṇaśca dharmiṣṭha upāste bhrātaraṃ prabhum /
himavānpāriyātraśca vindhyakailāsamandarāḥ //

malayo darduraścaiva mahendro gandhamādanaḥ /
indrakīlaḥ sunābhaśca tathā divyau ca parvatau //

ete cānye ca bahavaḥ sarve merupurogamāḥ /
upāsate mahātmānaṃ dhanānāmīśvaraṃ prabhum //

ndīśvaraśca bhagavānmahākālastathaiva ca /
śaṅkukarṇamukhāḥ sarve divyāḥ pāriṣadāstathā //

kāṣṭhaḥ kuṭī mukho dantī vijayaśca tapodhikaḥ /
śvetaśca vṛṣabhastatra nardannāste mahābalaḥ //

dhanadaṃ rākṣasāścānye piśācāśca upāsate /
pāriṣadaiḥ parivṛtamupāyāntaṃ maheśvaram //

sadā hi devadeveśaṃ śivaṃ trailokyabhāvanam /
praṇamya mūrdhnā paulastyo bahurūpamumāpatim //

tato'bhyanujñāṃ samprāpya mahādevāddhaneśvaraḥ /
āste kadācidbhagavānbhavo dhanapateḥ sakhā //

nidhipravaramukhyau ca śaṅkhapadmau dhaneśvarau /
sarvānnidhīnpragṛhyātha upāstāṃ vai dhaneśvaram //

sā sabhā tādṛśī ramyā mayā dṛṣṭāntarikṣagā /
pitāmahasabhāṃ rājankīrtayiṣye nibodha tām //