Mahabharata · Chapter 2.9

yudhiṣṭhira sabhā divyā varuṇasyāmitaprabhā /
pramāṇena yathā yāmyā śubhaprākāratoraṇā //

antaḥ salilamāsthāya vihitā viśvakarmaṇā /
divyai ratnamayairvṛkṣaiḥ phalapuṣpapradairyutā //

nīlapītaiḥ sitāḥ śyāmaiḥ sitairlohitakairapi /
avatānaistathā gulmairmañjarījāladhāribhiḥ //

tathā śakunayastasyāṃ vicitrā madhurasvarāḥ /
anirdeśyā vapuṣmantaḥ śataśo'tha sahasraśaḥ //

sā sabhā sukhasaṃsparśā na śītā na ca dharmadā /
veśmāsanavatī ramyā sitā varuṇapālitā //

yasyāmāste sa varuṇo vāruṇyā ca samanvitaḥ /
divyaratnāmbaradharo divyābharaṇabhūṣitaḥ //

dvitīyena tu nāmnā vai gaurīti bhuvi viśrutā /
patnyā savaruṇo devaḥ pramodati sukhī sukham //

sragviṇo divyagandhāśca divyagandhānulepanāḥ /
ādityāstatra varuṇaṃ jaleśvaramupāsate //

vāsukistakṣakaścaiva nāgaścairāvatastathā /
kṛṣṇaśca lohitaścaiva padmaścitraśca vīryavān //

kambalāśvatarau nāgau dhṛtarāṣṭrabalāhakau /
maṇimānkuṇḍadhāraśca karkoṭakadhanañjayau //

pāṇimānkuṇḍadhāraśca balavānpṛthivīpate /
prahrādo muṣikādaśca tathaiva janamejayaḥ //

patākino maṇḍalinaḥ phaṇavantaśca sarvaśaḥ /
artho dharmaśca kāmaśca vasuḥ kapila eva ca //

anantaśca mahānāgo yaṃ dṛṣṭvā jalajeśvaraḥ /
abhyarcayati satkārairāsanena ca taṃ vibhuḥ //

vāsukipramukhāścaiva sarve prāñjalayaḥ sthitāḥ /
anujñātāśca śeṣeṇa yathārhamupaviśya ca //

ete cānye ca bahavaḥ sarpāstasyāṃ yudhiṣṭhira / vainateyaśca garuḍo ye cāsya paricāriṇaḥ /
upāsate mahātmānaṃ varuṇaṃ vigataklamāḥ //

balirvairocano rājā narakaḥ pṛthivīñjayaḥ /
saṃhrādo vipracittiśca kālakhañjāśca dānavāḥ //

suhanurdurmukhaḥ śaṅkhaḥ sumanāḥ sumatistataḥ /
ghaṭodaro mahāpārśvaḥ krathanaḥ piṭharastathā //

viśvarūpaḥ svarūpaśca virūpo'tha mahāśirāḥ /
daśagrīvaśca vālī ca meghavāsā daśāvaraḥ //

ṭiṭṭibho viṭabhūtaśca saṃhrādaścendratāpanaḥ /
daityadānavasaṅghāśca sarve rucirakuṇḍalāḥ //

sragviṇo maulinaścaiva tathā divyaparicchadāḥ /
sarve labdhavarāḥ śūrāḥ sarve vigatamṛtyavaḥ //

te tasyāṃ varuṇaṃ devaṃ dharmapāśadharaṃ sadā /
upāsate mahātmānaṃ sarve sucaritavratāḥ //

tathā samudrāścatvāro nadī bhāgīrathī ca sā /
kālindī vidiśā veṇā nardamā vegavāhinī //

vipāśā ca śatadruśca candrabhāgā sarasvatī /
irāvatī vitastā ca sindhurdevanadī tathā //

godāvarī kṛṣṇaveṇī kāverī ca saridvarā /
kimpunā ca viśalyā ca tathā vaitaraṇī nadī //

tṛtīyā jyeṣṭhilā caiva śoṇaścāpi mahānadaḥ /
carmaṇvatī tathā caiva parṇāśā ca mahānadī //

sarayūrvāravatyā'tha lāṅgalī ca saridvarā /
karatoyā tathā'treyī lauhityaśca mahānadaḥ //

laṅghatī gomatī caiva sandhyā trisrotasī tathā /
etāścanyāśca rājendra sutīrthā lokaviśrutāḥ //

saritaḥ sarvataścānyāstīrthāni ca sarāṃsi ca / kūpāśca saprasravaṇā dehavanto yudhiṣṭhira /

palvalāni taṭākāni dehavantyatha bhārata /
diśastathā mahī caiva tathā sarve mahīdharāḥ //

upāsate mahātmānaṃ sarve jalacarāstathā /
gītavāditravantaśca gandharvāpsarasāṃ gaṇāḥ //

stuvanto varuṇaṃ tasyāṃ sarva eva samāsate /
mahīdharā ratnavanto rasā ye ca pratiṣṭhitāḥ //

kathayantaḥ sumadhurāḥ kathāstatra samāsate /
vāruṇaśca tathā mantrī sunābhaḥ paryupāsate //

putrapautraiḥ parivṛto gonāmnā puṣkareṇa ca /
sarve vigrahavantaste tamīśvaramupāsate //

eṣā mayā sampatatā vāruṇī bharatarṣabha /
dṛṣṭapūrvā sabhā ramyā kuberasya sabhāṃ śṛṇu //