Mahabharata · Chapter 18.3

sthite muhūrtaṃ pārthe tu dharmarāje yudhiṣṭhiṣṭhire /
ājagmustatra kauravyaṃ devāḥ śakrapurogamāḥ //

sa ca vigrahavāndharmo rājānaṃ samparīkṣya tam /
tatrājagāma yatrāsau kururājo yudhiṣṭhiraḥ //

teṣu bhāsuradeheṣu puṇyābhijanakarmasu /
samāgateṣu deveṣu vyagamattattamo nṛpa //

nādṛśyanta ca tāstatra yātanāḥ pāpakarmaṇām /
nadī vaitaraṇī caiva kūṭaśālmalinā saha //

lohakumbhyaḥ śilāścaiva nādṛśyanta bhayānakāḥ /
vikṛtāni śarīrāṇi yāni tatra samantataḥ //

dadarśa rājā kauravyastānsarvānsumahāprabhān //

tato vāyuḥ sukhasparśaḥ puṇyagandhavahaḥ śuciḥ /
vavau devasamīpasthaḥ śītalo'tīva bhārata //

marutaḥ saha śakreṇa vasavaścāśvinau saha / sādhyā rudrāstathā'dityā ye cānye'pidivaukasaḥ /

sarve tatra samājagmuḥ siddhāśca paramarṣayaḥ /
yatra rājā mahātejā dharmaputraḥ sthito'bhavat //

tataḥ śakraḥ surapatiḥ śriyā paramayā yutaḥ /
yudhiṣṭhiramuvācedaṃ sāntvapūrvamidaṃ vacaḥ //

yudhiṣṭhira mahābāho prītā devagaṇāstvayā /
ehyehi puruṣavyāghra kṛtametāvatā vibho //

siddhiḥ prāptā mahābāho lokāścāpyakṣayāstava /
bhrātṝṇāṃ suhṛdāṃ caiva gatirnityā supūjitā //

na ca manyustvayā kāryaḥ śṛṇu cedaṃ vaco mama /
avaśyaṃ narakastāta draṣṭavyaḥ sarvarājabhiḥ //

śubhānāmanaśubhānāṃ ca dvau rāśī puruṣarṣabha /
yaḥ pūrvaṃ sukṛtaṃ bhuṅkte paścānnirayameti saḥ //

pūrvaṃ narakabhāgyastu paścātsvargamupaiti saḥ /
bhūyiṣṭhaṃ pāpakarmā yaḥ sa pūrvaṃ svargamaśnute //

bhūyiṣṭhaśubhakarmā tvamalpajihmatayā'cyuta / tena tvamevaṃ gamito mayā śreyorthinā nṛpa //

vyājena hi tvayā droṇa upacīrṇaḥ sutaṃ prati /
vyājenaiva tato rājandarśito narakastava //

yathaiva tvaṃ tathā bhīmastathā pārtho yamau tathā / draupadī ca tathā kṛṣṇā vyājena narakaṃ gatāḥ /
āgaccha naraśārdūla muktāste caiva kalmaṣāt //

svapakṣyāścaiva ye tubhyaṃ pārthivā nihatā raṇe /
sarve svargamanuprāptāstānpaśya bharatarṣabha //

karṇaścaiva maheṣvāsaḥ sarvaśastrabhṛtāṃvaraḥ /
sa gataḥ paramāṃ siddhiṃ yadarthaṃ paritapyase //

taṃ paśya puruṣavyāghramādityatanayaṃ vibho /
svasthānasthaṃ mahābāho jahi śokaṃ nararṣabha //

bhrātṝnputrāṃstathā paśya svapakṣyāṃścaiva pārthivān /
svaṃsvaṃ sthānamanuprāptānvyetu te mānaso jvaraḥ //

kṛcchraṃ pūrvaṃ cānubhūya itaḥprabhṛti kaurava /
vihārasva mayā sārdhaṃ gataśoko nirāmayaḥ //

karmaṇāṃ tāta puṇyānāṃ jñānānāṃ tapasāṃ svayam /
dānānāṃ ca mahābāho phalaṃ prāpnuhi pārthivaḥ //

adya tvāṃ devagandarvā divyāścāpsaraso divi /
upasevantu kalyāṇaṃ virajambarabhūṣaṇāḥ //

rājasūyajitāṃ lokānaśvamedhabhinirmitān /
prāpnuhi tvaṃ mahābāho tapasaśca mahāphalam //

uparyupari rājñāṃ hi tava lokāḥ yudhiṣṭira /
hariścandramasaḥ pārtha yeṣu tvaṃ vihariṣyasi //

māndhātā yatra rājarṣiryatra rājā bhagīrathaḥ /
dauṣyantiryatra bharatastatra tvaṃ vihariṣyasi //

eṣā devanadī puṇyā pārtha trailokyapāvanī /
ākāśagaṅgā rājenrra tatrāplutya gamiṣyasi //

atra snātasya bhāvaste mānuṣo vigamiṣyati /
gataśoko nirāyāso muktavairo bhaviṣyasi //

evaṃ bruvati devendre kauravendraṃ yudhiṣṭhiram /
dharmo vigrahavānsākṣāduvāca sutamātmanaḥ //

bhobho rājanmahāprājña prītosmi tava putraka /
madbhaktyā satyavākyaiśca kṣamayā ca damena ca //

eṣā tṛtīyā jijñāsā tava rājankṛtā mayā /
na śakyase cālayituṃ svabhāvātpārtha hetutaḥ //

pūrvaṃ parīkṣito hi tvaṃ praśnāddvaitavane mayā /
araṇīsahitasyārthe tacca nistīrṇavānasi //

sodaryeṣu vinaṣṭeṣu draupadyā tatra bhārata /
śvarūpadhāriṇā tatra punastvaṃ me parīkṣitaḥ //

idaṃ tṛtīyaṃ bhrātṝṇāmarthe yatasthātumicchasi /
viśuddhosi mahābhāga sukhī vigatakalmaṣaḥ //

na ca te bhrātaraḥ pārtha narakārhā viśāmpatai /
māyaiṣā devarājena mahendreṇi prayojitā //

avaśyaṃ narakāstāta draṣṭavyāḥ sarvarājabhiḥ /
tatastvayā prāptamidaṃ muhūrtaṃ duḥkhamuttamam //

na savyasācī bhīmo vā yamau vā puruṣarṣabhau /
karṇo vā satyavāk śūro narakārhāściraṃ nṛpa //

na kṛṣṇā rājaputrī ca narakārhā kathañcana /
ehyehi bharataśreṣṭha paśya cemāṃstrilokagān //
vaiśampāyana uvāca /

evamuktaḥ sa rājarṣistava pūrvapitāmahaḥ /
jagāma saha dharmeṇi savaiśca tridivālayaiḥ //

gaṅgāṃ devanadīṃ puṇyāṃ pāvanīmṛṣisaṃstutām /
avagāhya tato rājā tanuṃ tatyāja mānuṣīm //

tato vivyavapurbhūtvā dharmarājo yudhiṣṭhiraḥ /
nirvairo gatasantāpo jale tasminsamāplutaḥ //

tato yayau vṛto devaiḥ kururājo yudhiṣṭhiraḥ /
dharmeṇa sahito dhīmāṃstūyamāno maharṣibhiḥ //

yatra te puruṣavyāghrāḥ śūrā vigatamanyavaḥ /
pāṇḍavā dhārtarāṣṭrāśca svāni sthānāni bhejire //