Mahabharata · Chapter 18.4
tato yudhiṣṭhiro rājā devaiḥ sarṣimarudgaṇaiḥ /
stūyamāno yayau tatra yatra te kurupuṅgavāḥ //
dadarśa tatra govindaṃ brāhmeṇa vapuṣā'nvitam /
tenaiva dṛṣṭapūrveṇa sādṛśyenaiva sūcitam //
dīpyamānaṃ svavapuṣā divyairastrairupasthitam /
cakraprabhṛtibhirghorairdivyaiḥ puruṣavigrahaiḥ //
upāsyamānaṃ vīreṇa phalgunena suvarcasā /
tathāsvarūpaṃ kaunteyo dadarśa madhusūdanam //
tāvubhau puruṣavyāghrau samudvīkṣya yudhiṣṭhiram /
yathāvatpratipedāte pūjayā devapūjitau //
aparasminnathoddeśe karṇaṃ śastrabhṛtāṃ varam /
dvādaśādityasahitaṃ dadarśa kurunandanaḥ //
athāparasminnuddeśe marudgaṇavṛtaṃ vibhum /
bhīmasenamathāpaśyattenaiva vapuṣā'nvitam //
vāyormūrtimataḥ pārśve divyamūrtisamanvitam /
śriyā paramayā yuktaṃ siddhiṃ paramikāṃ gatam //
aśvinostu tathā sthāne dīpyamānau svatejasā /
nakulaṃ sahadevaṃ ca dadarśa kurunandanaḥ //
tathā dadarśa pāñcālīṃ kamalotpalamālinīm /
vapuṣā svargamākramya tiṣṭhantīmarkavarcasam //
tatraināṃ sahasā rājā spraṣṭumaicchadyudhiṣṭhiraḥ /
tato'sya bhagavānindraḥ kathayāmāsa devarāṭ //
śrīreṣā draupadīrūpā tvadarthe mānuṣaṃ gatā /
ayonijā lokakāntā puṇyagandhā yudhiṣṭhira //
ratyarthaṃ bhavatāṃ hyeṣā nirmitā śūlapāṇinā /
drupadasya kule jātā bhavadbhiścopajīvitā //
ete pañca mahābhāgā gandharvāḥ pāvakaprabhāḥ /
draupadyāstanayā rājanyuṣmākamamitaujasaḥ //
paśya gandharvarājānaṃ dhṛtarāṣṭraṃ manīṣiṇam /
enaṃ ca tvaṃ vijānīhi bhrātaraṃ pūrvajaṃ pituḥ //
ayaṃ te pūrvajo bhrātā kaunteyaḥ pāvakadyutiḥ / sūryaputro rathiśreṣṭho rādheya iti viśrutaḥ / ādityasahito bhāti paśyainaṃ puruṣarṣabham //
sādhyānāmatha devānāṃ viśveṣāṃ marutāmapi / gaṇeṣu paśya rājendra vṛṣṇandhakamahārathān /
sātyakipramukhānvīrānbhojāṃścaiva mahābalān //
somena sahitaṃ paśya saubhadramaparājitam /
abhimanyuṃ maheṣvāsaṃ niśākarasamadyutim //
eṣa pāṇḍurmaheṣvāsaḥ kuntyā mādryā ca saṅgataḥ /
vimānena sadā'bhyeti pitā tava mamāntikam //
vasubhiḥ sahitaṃ paśya bhīṣmaṃ śāntanavaṃ nṛpam /
droṇaṃ bṛhaspateḥ pārśve gurumenaṃ niśāmaya //
ete cānye mahīpālā yodhāstava ca pāṇḍava /
gandharvasahitā yānti yakṣapuṇyajanaistathā //
guhyakānāṃ gatiṃ cāpi kecitprāptā narādhipāḥ /
tyaktvā dehaṃ jitaḥ svargaḥ puṇyavāgbuddhikarmabhiḥ //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0