Mahabharata · Chapter 18.1

nārāyaṇaṃ naskṛtya naraṃ caiva narottamam /
devīṃ sarasvatīṃ vyāsaṃ tato jayamudīrayet //
janamejaya uvāca /

svargaṃ triviṣṭapaṃ prāpya mama pūrvapitāmahāḥ /
pāṇḍavā dhārtarāṣṭrāśca kāni sthānāni bhejire //

etadicchāmyahaṃ śrotuṃ sarvaviccāsi me mataḥ /
maharṣiṇā'bhyanujñāto vyāsenādbhutakarmaṇā //
vaiśampāyana uvāca /

svargaṃ triviṣṭapaṃ prāpya tava pūrvapitāmahāḥ /
yudhiṣṭhiraprabhṛtayo yadakurvata tacchṛṇu //

svargaṃ triviṣṭapaṃ prāpya dharmarājo yudhiṣṭhiraḥ /
duryodhanaṃ śriyā juṣṭaṃ dadarśāsīnamāsane //

bhrājamānamivādityaṃ vīralakṣmyā'bhisaṃvṛtam /
devairbhrājiṣṇubhiḥ sādhyaiḥ sahitaṃ puṇyakarmabhiḥ //

tato yudhiṣṭhiro rājā duryodhanamamarṣitaḥ /
sahasā sannivṛtto'bhūcchriyaṃ dṛṣṭvā suyodhane //

bruvannuccairvacastānvai nāhaṃ duryodhanena vai /
sahitaḥ kāmaye lokām̐llabdhenādīrghadarśinā //

yatkṛte pṛthivī sarvā suhṛdo bāndhavāstathā /
hatāsmābhiḥ prasahyājau kilṣṭaiḥ pūrvaṃ mahāvane //

draupadī ca sabhāmadhye pāñcālī dharmacāriṇī /
paryākṛṣṭā'navadyāṅgī patnī no gurusannidhau //

asti devā na me kāmaḥ suyodhanamudīkṣitum /
tatrāhaṃ gantumicchāmi yatra te bhrātaro mama //

naivamityabravīttaṃ tu nāradaḥ prahasanniva /
svarge nivāse rājendra viruddhaṃ cāpi naśyati //

yudhiṣṭhira mahābāho maivaṃ vocaḥ kathañcana /
duryodhanaṃ prati nṛpaṃ śṛṇu cedaṃ vaco mama //

eṣa duryodhano rājā pūjyate tridaśaiḥ saha / sadbhiśca rājapravaraite ime svargavāsinaḥ /

vīralokagatiṃ prāptā yuddhe hutvā'tmanastanum /
yūyaṃ sarve surasamā yena yuddhena bādhitāḥ //

sa eṣa kṣatradharmeṇa sthānametadavāptavān /
bhaye mahati yo'bhīto babhūva pṛthivīpatiḥ //

na tanmanasi kartavyaṃ putra yaddyūtakāritam /
draupadyāśca parikleśaṃ na cintayitumarhasi //

ye cānye'pi parikleśā yuṣmākaṃ jñātikāritāḥ /
sangrāmeṣvathavā'nyatra na tānsaṃsmartumarhasi //

samāgaccha yathānyāyaṃ rājñā duryodhanena vai /
svargo'yaṃ neha vairāṇi bhanti manujādhipa //

nāradenaivamuktastu kururājo yudhiṣṭhiraḥ /
bhrātṝnpapraccha medhāvī vākyametaduvāca ha //

yadi duryodhanasyaite vīralokāḥ sanātanāḥ /
adharmajñasya pāpasya pṛthivīsuhṛdadruhaḥ //

yatkṛte pṛthivī naṣṭā sahasā sanaradvipā /
vayaṃ ca manyunā dagdhā vairaṃ praticikīrṣavaḥ //

ye te vīrī mahātmāno bhrātaro me mahāvratāḥ / satyapratijñā lokasya śūrā vai satyavādinaḥ /
teṣāmidānīṃ ke lokā draṣṭumicchāmi tānaham //

karṇaṃ caiva mahātmānaṃ kaunteyaṃ satyasaṅgaram /
dhṛṣṭadyumnaṃ sātyakiṃ ca dhṛṣṭadyumnasya cātmajān //

ye ca śastrairvadhaṃ prāptāḥ kṣatradharmeṇa pārthivāḥ /
kvanu te pārthivānbrahmannaitānpaśyāmi nārada //

virāṭadrupadau caiva dhṛṣṭaketumukhāṃśca tān / śikhaṇḍinaṃ ca pāñcālyaṃ draupadeyāṃśca sarvaśaḥ /
abhimanyuṃ ca durdharṣaṃ draṣṭumicchāmi nārada //