Mahabharata · Chapter 16.9

evametatkariṣyāmi yathā'ttha pṛthivīpate /
bhūyaścaivānuśāsyo'haṃ bhavatā pārthivarṣabha //

bhīṣme svargamanuprāpto gate ca madhusūdane /
vidure sañjaye caiva ko'nyo māṃ vaktumarhati //

yattu māmanuśāstīha bhavānadya hite sthitaḥ /
kartāsmi tanmahīpāla nirvṛto bhava pārthiva //
vaiśampāyana uvāca /

evamuktaḥ sa rājarṣirdharmarājena dhīmatā /
kaunteyaṃ samanujñātumiyeṣa bharatarṣabha //

putra viśrāmyatāṃ tāvanmamāpi balavāñśramaḥ /
ityuktvā prāviśadrājā gāndhāryā bhavanaṃ tadā //

tamāsanagataṃ devī gāndhārī dharmacāriṇī /
uvāca kāle kālajñā prajāpatisamaṃ patim //

anujñātaḥ svayaṃ tena vyāseni tvaṃ maharṣiṇā /
yudhiṣṭhirasyānumate kadā'raṇyaṃ gamiṣyasi //
dhṛtarāṣṭra uvāca /

gāndhāryahamanujñātaḥ svayaṃ pitrā mahātmanā /
yudhiṣṭhirasyānumate gantāsmi nacirādvanam //

ahaṃ hi tāvatsarveṣāṃ teṣāṃ durdyūtadevinām / putrāṇāṃ dātumicchāmi pretyabhāvānugaṃ vasu /
sarvaprakṛtitisānnidhyaṃ kārayitvā svaveśmani //
vaiśampāyana uvāca /

ityuktvā dharmarājāya preṣayāmāsa vai tadā /
sa ca tadvacanātsarvaṃ samāninye mahīpatiḥ //

tataḥ pratītamanaso brāhmaṇāḥ kurujāṅgalāḥ /
kṣatriyāścaiva vaiśyāśca śūdrāścaiva samāyayuḥ //

tato niṣkramya nṛpatistasmādantaḥkapurāttadā /
daddaśe taṃ janaṃ sarvaṃ sarvāśca prakṛtīstathā //

samavetāṃśca tānsarvānpaurāñjānapadāṃstathā /
tānāgatānabhiprekṣya samastaṃ ca suhṛñjanam //

brāhmaṇāṃśca mahīpāla nānādeśasamāgatān /
uvāca matimānrājā dhṛtarāṣṭro'mbikāsutaḥ //

bhavantaḥ kuruvaścaiva cirakālaṃ sahoṣitāḥ /
parasparasya suhṛdaḥ parasparahite ratāḥ //

yadidānīmahaṃ brūyāmasminkāla upasthite /
tathā bhavadbhiḥ kartavyamavicārya vaco mama //

araṇyagamane buddhirgāndhārīsahitasya me /
vyāsasyānumate rājñastathā kuntīsutasya me //

bhavantopyanujānantu mānyā vo'bhūdvicāraṇā //

asmākaṃ bhavatāṃ caiva yeyaṃ prītirhi śāśvatī /
na ca sā'nyeṣu deśeṣu rājñāmiti matirmama //

śāntosmi vayasā'nena tathā putravinākṛtaḥ /
upavāsakṛśaścāsmi gāndhārīsahito'naghāḥ //

yudhiṣṭhiragate rājye prāptaścāsmi sukhaṃ mahat /
manye duryodhanaiśvaryādviśiṣṭaṃ bahubhirguṇaiḥ //

mama cāndhasya vṛddhasya hataputrasya kā gatiḥ /
ṛte vanaṃ mahābhāgāstanmā'nujñātumarhatha //

tasya tadvacanaṃ śrutvā sarve te kurujāṅgalāḥ /
bāppasandigdhayā vācā rurudurbharatarṣabha //

tānavibruvataḥ kiñcitsarvāñśokaparāyaṇān /
punareva mahātejā dhṛtarāṣṭro'bravīdidam //