મહાભારત · અધ્યાય 16.9

એવમેતત્કરિષ્યામિ યથાઽત્થ પૃથિવીપતે ।
ભૂયશ્ચૈવાનુશાસ્યોઽહં ભવતા પાર્થિવર્ષભ ॥

ભીષ્મે સ્વર્ગમનુપ્રાપ્તો ગતે ચ મધુસૂદને ।
વિદુરે સઞ્જયે ચૈવ કોઽન્યો માં વક્તુમર્હતિ ॥

યત્તુ મામનુશાસ્તીહ ભવાનદ્ય હિતે સ્થિતઃ ।
કર્તાસ્મિ તન્મહીપાલ નિર્વૃતો ભવ પાર્થિવ ॥
વૈશમ્પાયન ઉવાચ ।

એવમુક્તઃ સ રાજર્ષિર્ધર્મરાજેન ધીમતા ।
કૌન્તેયં સમનુજ્ઞાતુમિયેષ ભરતર્ષભ ॥

પુત્ર વિશ્રામ્યતાં તાવન્મમાપિ બલવાઞ્શ્રમઃ ।
ઇત્યુક્ત્વા પ્રાવિશદ્રાજા ગાન્ધાર્યા ભવનં તદા ॥

તમાસનગતં દેવી ગાન્ધારી ધર્મચારિણી ।
ઉવાચ કાલે કાલજ્ઞા પ્રજાપતિસમં પતિમ્ ॥

અનુજ્ઞાતઃ સ્વયં તેન વ્યાસેનિ ત્વં મહર્ષિણા ।
યુધિષ્ઠિરસ્યાનુમતે કદાઽરણ્યં ગમિષ્યસિ ॥
ધૃતરાષ્ટ્ર ઉવાચ ।

ગાન્ધાર્યહમનુજ્ઞાતઃ સ્વયં પિત્રા મહાત્મના ।
યુધિષ્ઠિરસ્યાનુમતે ગન્તાસ્મિ નચિરાદ્વનમ્ ॥

અહં હિ તાવત્સર્વેષાં તેષાં દુર્દ્યૂતદેવિનામ્ । પુત્રાણાં દાતુમિચ્છામિ પ્રેત્યભાવાનુગં વસુ ।
સર્વપ્રકૃતિતિસાન્નિધ્યં કારયિત્વા સ્વવેશ્મનિ ॥
વૈશમ્પાયન ઉવાચ ।

ઇત્યુક્ત્વા ધર્મરાજાય પ્રેષયામાસ વૈ તદા ।
સ ચ તદ્વચનાત્સર્વં સમાનિન્યે મહીપતિઃ ॥

તતઃ પ્રતીતમનસો બ્રાહ્મણાઃ કુરુજાઙ્ગલાઃ ।
ક્ષત્રિયાશ્ચૈવ વૈશ્યાશ્ચ શૂદ્રાશ્ચૈવ સમાયયુઃ ॥

તતો નિષ્ક્રમ્ય નૃપતિસ્તસ્માદન્તઃકપુરાત્તદા ।
દદ્દશે તં જનં સર્વં સર્વાશ્ચ પ્રકૃતીસ્તથા ॥

સમવેતાંશ્ચ તાન્સર્વાન્પૌરાઞ્જાનપદાંસ્તથા ।
તાનાગતાનભિપ્રેક્ષ્ય સમસ્તં ચ સુહૃઞ્જનમ્ ॥

બ્રાહ્મણાંશ્ચ મહીપાલ નાનાદેશસમાગતાન્ ।
ઉવાચ મતિમાન્રાજા ધૃતરાષ્ટ્રોઽમ્બિકાસુતઃ ॥

ભવન્તઃ કુરુવશ્ચૈવ ચિરકાલં સહોષિતાઃ ।
પરસ્પરસ્ય સુહૃદઃ પરસ્પરહિતે રતાઃ ॥

યદિદાનીમહં બ્રૂયામસ્મિન્કાલ ઉપસ્થિતે ।
તથા ભવદ્ભિઃ કર્તવ્યમવિચાર્ય વચો મમ ॥

અરણ્યગમને બુદ્ધિર્ગાન્ધારીસહિતસ્ય મે ।
વ્યાસસ્યાનુમતે રાજ્ઞસ્તથા કુન્તીસુતસ્ય મે ॥

ભવન્તોપ્યનુજાનન્તુ માન્યા વોઽભૂદ્વિચારણા ॥

અસ્માકં ભવતાં ચૈવ યેયં પ્રીતિર્હિ શાશ્વતી ।
ન ચ સાઽન્યેષુ દેશેષુ રાજ્ઞામિતિ મતિર્મમ ॥

શાન્તોસ્મિ વયસાઽનેન તથા પુત્રવિનાકૃતઃ ।
ઉપવાસકૃશશ્ચાસ્મિ ગાન્ધારીસહિતોઽનઘાઃ ॥

યુધિષ્ઠિરગતે રાજ્યે પ્રાપ્તશ્ચાસ્મિ સુખં મહત્ ।
મન્યે દુર્યોધનૈશ્વર્યાદ્વિશિષ્ટં બહુભિર્ગુણૈઃ ॥

મમ ચાન્ધસ્ય વૃદ્ધસ્ય હતપુત્રસ્ય કા ગતિઃ ।
ઋતે વનં મહાભાગાસ્તન્માઽનુજ્ઞાતુમર્હથ ॥

તસ્ય તદ્વચનં શ્રુત્વા સર્વે તે કુરુજાઙ્ગલાઃ ।
બાપ્પસન્દિગ્ધયા વાચા રુરુદુર્ભરતર્ષભ ॥

તાનવિબ્રુવતઃ કિઞ્ચિત્સર્વાઞ્શોકપરાયણાન્ ।
પુનરેવ મહાતેજા ધૃતરાષ્ટ્રોઽબ્રવીદિદમ્ ॥