Mahabharata · Chapter 16.10

śāntanuḥ pālayāmāsa yathāvadvasudhāmimām / tathā vicitravīryaśca bhīṣmeṇa paripālitaḥ /
pālayāmāsa nastāto viditaṃ vo na saṃśayaḥ //

yathā ca pāṇḍurbhātā me dayito bhavatāmabhūt /
sa cāpi pālayāmāsa yathāvattacca vettha ha //

anantaraṃ hi pitaramanujñāto yudhiṣṭhiraḥ / nātra kiñcinmṛṣā jātu bhāṣateti matirmama //

mayā ca bhavatāṃ samyak śuśrūṣā yā kṛtā'naghāḥ /
asamyagvā mahābhāgāstatkṣantavyamatandritaiḥ //

yadā duryodhanenedaṃ bhuktaṃ rājyamakaṇṭakam /
api tatra na vo mando durbuddhiraparāddhavān //

tasyāparādhāddurbuddherabhimānānmahīkṣitām / vimardaḥ sumahānāsīdanayātsvakṛtādatha /
ghātitāḥ kauraveyāśca pṛthivī ca vināśitā //

tanmayā sādhu vā'pīdaṃ yadi vā'sādhu vai kṛtam /
tadvo hṛdi na kartavyaṃ mayā baddho'yamañjaliḥ //

vṛddho'yaṃ hataputro'yaṃ duḥkhito'yaṃ narādhipaḥ /
pūrvarājñāṃ ca putro'yamiti kṛtvā'nujānatha //

iyaṃ ca kṛpaṇā vṛddhā hataputrā tapasvinī /
gāndhārī putraśokārtā tulyaṃ yācati vo mayā //

hataputrāvimau vṛddhau viditvā duḥkhitau tathā /
anujānīta bhadraṃ vo vrajāva śaraṇaṃ ca vaḥ //

ayaṃ ca kauravo rājā kuntīputro yudhiṣṭhiraḥ / sarvairbhavadbhirdravyaḥ sameṣu viṣameṣu ca /
na jātu viṣamaṃ caiva gamiṣyati kadācana //

catvāraḥ sacivā yasya bhrātaro vipulaujasaḥ /
lokakapālasamā hyete sarvadharmārthadarśinaḥ //

caturṇāṃ lokapālānāṃ madhye viparivartate / brahmeva bhagavāneṣa sarvabhūtajagatpatiḥ //

evameva mahābāhurbhīmārjunayamairvṛtaḥ / yudhiṣṭhiro mahātejā bhavataḥ pālayiṣyati //

avaśyameva vaktavyamiti kṛtvā bravīmi vaḥ / eṣa nyāso mayā dattaḥ sarveṣāṃ vo yudhiṣṭhiraḥ /
bhavanto'sya ca vīrasya nyāsabhūtāḥ kṛtā mayā //

yadeva taiḥ kṛtaṃ kiñcidvyalīkaṃ vaḥ sutairmama /
yadanyeni madīyena tadanujñātumarhatha //

bhavadbhirna hi me manyuḥ kṛtapūrvaḥ kathañcana /
atyantagurubhaktānāmeṣo'ñjaliridaṃ namaḥ //

teṣāmasthirabuddhīnāṃ lubdhānāṃ kāmacāriṇām /
kṛte yāce'dya vaḥ sarvāngāndhārīsahito'naghāḥ //

ityuktāṃstena te sarve paurajānapadā janāḥ /
nocurbāṣpakalāḥ kiñcidvīkṣāñcakruḥ parasparam //