Mahabharata · Chapter 16.36

etacchrutvā nṛpo vidvānhṛṣṭo'bhūjjanamejayaḥ /
pitāmahānāṃ sarveṣāṃ gamanāgamanaṃ tadā //

abravīcca mudā yuktaḥ punarāgamanaṃ prati /
kathaṃ na tyaktadehānāṃ punastadrūpadarśanam //

ityuktaḥ sa dvijaśreṣṭho vyāsaśiṣyaḥ pratāpavān /
provāca vadatāṃśreṣṭhastaṃ nṛpaṃ janamejayam //
vaiśampāyana uvāca /

avipraṇāśaḥ sarveṣāṃ karmaṇāmiti niścayaḥ /
karmajāni śarīrāṇi śarīrākṛtayastathā //

mahābhūtāni nityāni bhūtādhipatisaṃśrayāt /
teṣāṃ ca nityasaṃvāso na vināśo viyujyatām //

anāśayā kṛtaṃ karma tasya ceṣṭaḥ phalāgamaḥ /
ātmā caibhiḥ samāyuktaḥ sukhaduḥkhamupāśnute //

avināśyastathā nityaṃ kṣetrajña iti niścayaḥ /
bhūtānāmātmabhāvo yo dhruvosau saṃvijānatām //

yāvanna kṣīyate karma tāvattasya svarūpatā /
kṣīṇakarmā naro loke rūpānyatvamupāśnute //

nānābhūtāstathaikatvaṃ śarīraṃ prāpya saṃhatāḥ /
bhavanti te tathā nityāḥ pṛthagbhāvaṃ vijānatām //

aśvamedhaśrutiśceyamaśvasañjñapanaṃ prati /
lokāntaragatā nityaṃ prāṇā nityā hi vājinaḥ //

ahaṃ hitaṃ vadāmyetatpriyaṃ cettava pārthiva /
devayānā hi panthānaḥ śrutāste yajñasaṃstare //

sukṛto yatra yajñaste tatra devā hitāstava /
yadā samanvitā devāḥ paśūnāṃ gamaneśvarāḥ //

gamimantaśca teneṣṭvā nānye nityā bhavantyuta /
nitye'sminpañcake varge nitye cātmani pūruṣaḥ //

asya nāśaṃ samāyogaṃ yaḥ paśyati vṛthāmatiḥ /
viyoge śocate'tyarthaṃ sa bāla iti me matiḥ //

viyoge doṣadarśī yaḥ saṃyogaṃ sa visarjayet /
asaṅge saṅgamo nāsti duḥkhaṃ bhāvi viyogajama //

parāparajñastvaparo nābhimānādudīkṣitaḥ /
aparajñaḥ parāṃ buddhiṃ spṛṣṭvā mohādvimucyate //

adarśanādāpatitaḥ punaścādarśanaṃ gataḥ /
nāhaṃ taṃ vedmi nāsau māṃ na ca me'sti virāgatā //

yenayena śarīreṇi karotyayamanīśvaraḥ / tenatena śarīreṇa tadavaśyamupāśnute /
mānasaṃ manasā'pnoti śarīraṃ ca śarīravān //