Mahabharata · Chapter 16.35

tataste puraṣaśreṣṭhāḥ samājagmuḥ parasparam /
vigatakrodhamātsaryāḥ sarve vigatakalmaṣāḥ //

vidhiṃ paramamāsthāya brahmarṣivihitaṃ śubham /
saṃhṛṣṭamanasaḥ sarve devaloka ivāmarāḥ //

putraḥ pitrā ca mātrā ca bhāryāśca patibhiḥ saha /
bhrātrā bhrātā sakhā caiva sakhyā rājansamāgatāḥ //

pāṇḍavāstu maheṣvāsaṃ karṇaṃ saubhadrameva ca /
sampraharṣātsamājagmurdraupadeyāṃścaka sarvaśaḥ //

tataste prīyamāṇā vai karṇena saha pāṇḍavāḥ /
sametya pṛthivīpāla sauhṛde ca sthitā'bhavan //

parasparaṃ samāgamya yodhāste bharatarṣabha /
muneḥ prasādātte hyevaṃ kṣatriyā naṣṭamanyavaḥ //

asauhṛdaṃ parityajya sauhṛde paryavasthitāḥ /
evaṃ samāgatāḥ sarve gurubhirbāndhavaiḥ saha //

putraiśca puruṣavyāghrāḥ kuravo'nye ca pārthivāḥ /
tāṃ rātrimakilāmevaṃ vihṛtya prītamānasāḥ //

menire paritoṣeṇa nṛpāḥ svargasado yathā /
nātra śoko bhayaṃ trāso nāratirnāyaśo'bhavat //

parasparaṃ samāgamya yodhānāṃ bharatarṣabha / samāgatāstāḥ pitṛbhirbhrātṛbhiḥ patibhiḥ sutaiḥ /
mudaṃ paramikāṃ prāpya nāryo duḥkhamathātyajan //

devalokaṃ gatā ye ca ye ca brahmasado gatāḥ /
ye cāpi vāruṇaṃ lokaṃ ye ca golokamāśritāḥ //

tathā vaivasvataṃ lokaṃ ye ca yakṣānupāgatāḥ /
rākṣasāṃśca piśācāṃśca kurūṃścāpi tathottarān //

vicitrāśca gatīranye ye prāptāḥ karmabhirnarāḥ / sarve te tadvayorūpaveṣāstatra samabhyayuḥ //

ekāṃ rātriṃ vihṛtyaivaṃ te vīrāstāśca yoṣitaḥ /
āmantryānyonyamāśliṣya tato jagmuryathāgataṃ //

tato visarjayāmāsa lokāṃstānmunipuṅgavaḥ /
kṣaṇenāntarhitāścaiva prekṣatāmeva te'bhavan //

avagāhya mahātmānaḥ puṇyāṃ bhāgīrathīṃ nadīm /
sarathāḥ sadhvajāścaiva svāni veśmāni bhejire //

devalokaṃ yayuḥ kecitkecidbrahmasadastathā /
kecicca vāruṇaṃ lokaṃ kecitkauberamāpnuvan //

tato vaivasvataṃ lokaṃ keciccaivāpnuvannṛpāḥ /
rākṣasānāṃ piśācānāṃ keciccāpyuttarānkurūn //

vicitragatayaḥ sarve yānavāpyāmaraiḥ saha /
ājagmuste mahātmānaḥ savāhāḥ sapadānugāḥ //

gateṣu teṣu sarveṣu salilastho mahāmuniḥ / dharmasīlo mahātejāḥ kurūṇāṃ hitakṛtadā /
tataḥ provāca tāḥ sarvāḥ kṣatriyā nihateśvarāḥ /

yāyāḥ patikṛtām̐llokānicchanati paramastriyaḥ /
tā jāhnavījalaṃ kṣipramavagāhantvatandritāḥ //

tatastasya vacaḥ śrutvā śraddadhānā varāṅganāḥ /
śvaśuraṃ samanujñāpya viviśurjāhnavījalam //

vimuktā mānuṣairdehaistatastā bhartṛbhiḥ saha /
samājagmustadā sādhvyaḥ sarvā evaṃ viśāmpate //

evaṃ krameṇi sarvāstāḥ śīlavatyaḥ pativratāḥ /
praviśya toyaṃ nirmuktā jagmurbhartṛsalokatām //

divyarūpasamāyuktā divyābharaṇabhūṣitāḥ /
divyamālyāmbaradharā yathā'sāṃ patayastathā //

tāḥ śīlaguṇasampannā vimānasthā gataklumāḥ /
sarvāḥ sarvaguṇopetāḥ svasthānaṃ pratipedire //

yasya yasya tu yaḥ kāmastasminkāle babhūva ha /
tantaṃ visṛṣṭavānvyāso varado dharmavatsalaḥ //

tacchrutvā naradevānāṃ punarāgamanaṃ narāḥ /
jahṛṣurmuditāścāsannānādeśagatā api //

te naṣṭabhayasaṅkalpā narā vigatakalmaṣāḥ / babhūvuḥ pauravāḥsarve taddṛṣṭvā'ścaryamuttamam //

priyaiḥ samāgamaṃ teṣāṃ yaḥ samyak śṛṇuyānnaraḥ / priyāṇi labhate nityamiha ca pretya caiva saḥ /
iṣṭabāndhavasaṃyogamanāyāsamanāmayam //

yaścaitacchrāvayedvidvānviduṣo dharmavittamaḥ /
sa yaśaḥ prāpnuyālloke paratra ca śubhāṃ gatim //

svādhyāyayuktā manujāstapoyuktāśca bhārata /
sādhvācārā damopetā dānanirdhūtakalmaṣāḥ //

ṛjavaḥ śucayaḥ śāntā hiṃsānṛtavivarjitāḥ / āstikāḥ śraddadhānāśca dhṛtimantaśca mānavāḥ /
śrutvā'ścaryamidaṃ parva hyavāpsyanti parāṃ gatim //

punaste darśanaṃ prāptāḥ punaśca parikīrtitāḥ / punaḥpunaḥ prayacchanti śṛṇvatāmabhayaṃ sadā //