Mahabharata · Chapter 16.34

tato niśāyāṃ prāptāyāṃ kṛtasāyāhnikakriyāḥ /
vyāsamabhyagamansarve ye tatrāsansamāgatāḥ //

dhṛtarāṣṭrastu dharmātmā pāṇḍavaiḥ sahitastadā /
śucirekamanāḥ sārdhamṛṣibhistairupāviśat //

gāndhāryā saha nāryastu sahitāḥ samupāviśan /
paurajānapadaścāpi janaḥ sarvo yathā vayaḥ //

tato vyāso mahātejāḥ puṇyaṃ bhāgīrathījalam /
avatīryājuhāvātha sam̐rvāllokānmahāmuniḥ //

pāṇḍavānāṃ ca ye yodhāḥ kauravāṇāṃ ca sarvaśaḥ / rājānaśca mahābhāgā nānādeśanivāsinaḥ /
pratīkṣya tasthuste sarve teṣāmāgamanaṃ prati //

tataḥ sutumulaḥ śabdo jalānte janamejaya /
prādurāsīdyathāyogaṃ kurupāṇḍavasenayoḥ //

tataste pārthivāḥ sarve bhīṣmadroṇapurogamāḥ /
sasainyāḥ salilāttasmātsamuttasthuḥ sahasraśaḥ //

virāṭadrupadau caiva sahaputrau sasainikau /
draupadeyāśca saubhadro rākṣasaśca ghaṭotkacaḥ //

karṇaduryodhanau caiva śakuniśca mahārathaḥ /
duḥśāsanādayaścaiva dhārtarāṣṭrā mahābalāḥ //

jārāsandhirbhagadatto jalasandhaśca vīryavān /
bhūriśravāḥ śalaḥ śalyo vṛṣasenaśca sānujaḥ //

lakṣmaṇo rājaputraśca dhṛṣṭadyumnassahātmajaḥ /
śikhaṇḍiputrāḥ sarve ca dhṛṣṭaketuśca sānuja //

acalo vṛṣakaścaiva rākṣasaścāpyalāyudhaḥ /
bāhlikaḥ somadattaśca cekitānaśca pārthivaḥ //

ete cānye ca bahavo bahutvādye na kīrtitāḥ /
sarve bhāsuradehāste samuttasthurjalāttataḥ //

yasy vīrasya yo veṣo yo dhvajo yacca vāhanam /
yadvarma yatpraharaṇaṃ tena tena sa dṛśyate //

divyāmbaradharāḥ sarve sarve bhrājiṣṇukuṇḍalāḥ /
nirvairā nirahaṅkārā vigatakrodhamatsarāḥ //

gandharvairupagīyantaḥ stūyamānāśca bandibhiḥ /
divyamālyasrajopetāstathā divyāpsarovṛtāḥ //

dhṛtarāṣṭrasya ca tadā divyaṃ cakṣurnarādhipa /
muniḥ satyavatīputraḥ prītaḥ prādāttapobalāt //

divyajñānabalopetā gāndhārī ca yaśasvinī /
dadarśa putrāṃstānsarvānye cānye'pi mṛghe hatāḥ //

tadadbhutamacintyaṃ ca sumahadromaharṣamam /
vismitaḥ sa janaḥ sarvo dadarśānimiṣekṣaṇaḥ //

tadutsavamahodagraṃ hṛṣṭanārīnarākulam /
āścaryabhūtaṃ dadṛśe citraṃ paṭagataṃ yathā //

dhṛtarāṣṭrastu tānsarvānpaśyandivyena cakṣuṣā /
mumude bharataśreṣṭha prasādāttasya vai muneḥ //