મહાભારત · અધ્યાય 16.33

ભદ્રે દ્રક્ષ્યસિ ગાન્ધારિ પુત્રાન્ભ્રાતૄન્સ્વકાન્ગણાન્ ।
વધૂશ્ચ પતિભિઃ સાર્ધં નિશિ સુપ્તોસ્થિતા ઇવ ॥

કર્ણં દ્રક્ષ્યતિ કુન્તી ચ સૌભદ્રં ચાપિ યાદવી ।
દ્રૌપદી પઞ્ચપુત્રાંશ્ચ પિતૄન્ભ્રાતૄંસ્તથૈવ ચ ॥

પૂર્વમેવૈષ હૃદયે વ્યવસાયોઽભકવન્મમ ।
યદાઽસ્મિ ચોદિતો રાજ્ઞા ભવત્યા પૃથયૈવ ચ ॥

ન તે શોચ્યા મહાત્માનઃ સર્વ એવ નરર્ષભાઃ ।
ક્ષત્રધર્મપરાઃ સન્તસ્તથા હિ નિધનં ગતાઃ ॥

ભવિતવ્યમવશ્યં તત્સુરકાર્યમનિન્દિતે ।
અવતેરુસ્તતઃ સર્વે દેવા ભાગૈર્મહીતલમ્ ॥

ગન્ધર્વાપ્સરસશ્ચૈવ પિશાચા ગુહ્યરાક્ષસાઃ ।
તથા પુણ્યજનાશ્ચૈવ સિદ્ધા દેવર્ષયોપિ ચ ॥

દેવાશ્ચ દાનવાશ્ચૈવ તથા દેવર્ષયોઽમલાઃ ।
તે એતે નિધનં પ્રાપ્તાઃ કુરુક્ષેત્રે રણાજિરે ॥

ગન્ધર્વરાજો યો ધીમાન્ધૃતરાષ્ટ્ર ઇતિ શ્રુતઃ ।
સ એવ માનુષે લોકે ધૃતરાષ્ટ્રઃ પતિસ્તવ ॥

પાણ્ડું મરુદ્ગણાદ્વિદ્ધિ વિશિષ્ટતમમચ્યુતમ્ ।
ધર્મસ્યાંશોઽભવત્ક્ષત્તા રાજા ચૈવ યુધિષ્ઠિરઃ ॥

કલિં દુર્યોધનં વિદ્ધિ શકુનિં દ્વાપરં નૃપમ્ ।
દુઃશાસનાદીન્વિદ્ધિ ત્વં રાક્ષસાન્શુભદર્શને ॥

મરુદ્ગણાદ્ભીમસેનં બલવન્તમરિન્દમમ્ । વિદ્ધિં ત્વં તુ નરમૃષિમિમં પાર્થં ધનઞ્જયમ્ ।
નારાયણં હૃષીકેશમશ્વિનૌ યમજૌ તથા ॥

દ્વિધા કૃત્વાઽત્મનો દેહમાદિત્યં તપતાં વરમ્ ।
લોકાંશ્ચ તાપયાનં વૈ કર્ણં વિદ્ધિ પૃથાસુતમ્ ॥

યઃ સ વૈરાર્થમુદ્ભૂતઃ સન્ઘર્ષજનનસ્કતથા ।
તં કર્ણં વિદ્ધિ કલ્યાણિ ભાસ્કરં શુભદર્શને ॥

યશ્ચ પાણ્ડવદાયાદો હતઃ ષઙ્મિર્મહારથૈઃ ।
સ સોમ ઇહ સૌભદ્રો યોગાદેવાભવદ્દ્વિધા ॥

દ્રૌપદ્યા સહ સમ્ભૂતં ધૃષ્ટદ્યુમ્નં ચ પાવકાત્ ।
અગ્રેર્ભાગં શુભં વિદ્ધિ રાક્ષસં તુ શિખણ્ડિનમ્ ॥

દ્રોણં બૃહસ્પતેર્ભાગં વિદ્ધિ દ્રૌણિં ચ રુદ્રજમ્ ।
ગાઙ્ગેયો વસુવીર્યેણ દેવો માનુષતાં ગતઃ ॥

એવમેતે મહાપ્રજ્ઞે દેવા માનુષ્યમેત્ય હિ ।
તતઃ પુનર્ગતાઃ સ્વર્ગં કૃતે કર્મણિ શોભને ॥

યચ્ચ વૈ હૃદિ સર્વેષાં દુઃખમેતચ્ચિરં સ્થિતમ્ ।
તદદ્ય વ્યપનેષ્યામિ પરલોકકૃતાદ્ભયાત્ ॥

સર્વે ભવન્તો ગચ્છન્તુ નદીં ભાગીરથીં પ્રતિ ।
તત્ર દ્રક્ષ્યથ તાન્સર્વાન્યે હતાસ્તત્ર સંયુગે ॥
વૈશમ્પાયન ઉવાચ ।

ઇતિ વ્યાસસ્ય વચનં શ્રુત્વા સર્વા જનસ્તદા ।
મહતા સિંહનાદેન ગઙ્ગામભિમુખો યયૌ ॥

ધૃતરાષ્ટ્રશ્ચ સામાત્યઃ પ્રયયૌ સહ પાણ્ડવૈઃ ।
સહિતો મુનિશાર્દૂલૈર્ગન્ધર્વૈશ્ચ સમાગતૈઃ ॥

તતો ગઙ્ગાં સમાસાદ્ય ક્રમેણ સ જનાર્ણવઃ ।
નિવાસમકરોત્સર્વો યથાપ્રીતિ યથાસુખમ્ ॥

રાજા ચ પાણ્ડવૈઃ સાર્ધમિષ્ટે દેશે સહાનુગઃ ।
નિવાસમકરોદ્ધીમાન્સસ્ત્રીવૃદ્ધપુરઃસરઃ ॥

જગામ તદહસ્ચાપિ તેષાં વર્ષશતં યથા ।
નિશાં પ્રતીક્ષમાણાનાં દિદૃક્ષૂણાં મૃતાન્નૃપાન્ ॥

અથ પુણ્યં ગિરિવરમસ્તમભ્યગમદ્રવિઃ ।
તતઃ કૃતાભિષેકાસ્તે નૈશં કર્મ સમાચરન્ ॥