Mahabharata · Chapter 16.25

ājñāpayāmāsa tataḥ senāṃ bharatasattamaḥ /
arjunapramukhairguptāṃ lokapālopamairnaraiḥ //

yogoyoga iti prītyā tataḥ śabdo mahānabhūt /
krośatāṃ sādināṃ tatra yujyatāṃ yujyatāmiti //

kecidyānairnarā jagmuḥ kecidaśvairmahājavaiḥ /
kāñcanaiśca rathaiḥ kecijjvalitajvalanopamaiḥ //

gajendraiśca tathaivānye keciduṣṭrairnarādhipa /
padātayastathaivānye nakharaprāsayodhinaḥ //

paurajānapadāścaiva yānairbahuvidhaistathā /
anvayuḥ kururājānaṃ dhṛtarāṣṭraṃ didakṣavaḥ //

sa cāpi rājavacanādācāryo gautamaḥ kṛpaḥ /
senāmādāya senānīḥ prayayāvāśramaṃ prati //

tato dvijaiḥ parivṛtaḥ kururājo yudhiṣṭhiraḥ /
saṃstūyamāno bahubhiḥ sūtamāgadhabandibhiḥ //

pāṇḍureṇātapatreṇa dhriyamāṇena mūrdhani /
ratānīkena mahatā nirjagāma kurūdvahaḥ //

gajaiścācalasankāśairbhīmakarmā vṛkodaraḥ /
sajjayantrāyudhopetaiḥ prayayau pavanātmajaḥ //

mādrīputrāvapi tathā hayārohau susaṃvṛtau /
jagmatuḥ śīghragamanau sannaddhakavacadhvajau //

arjunaśca mahātejā rathenādityavarcasā /
vaśī śvetairhayairyuktairdivyenānvagamannṛpam //

draupadīpramukhāścāpi strīsaṅghāḥ śibikāgatāḥ /
stryadhyakṣaguptāḥ prayayurvisṛjanto'mitaṃ vasu //

samṛddharathahastyaśvaṃ veṇuvīṇānunāditam /
śuśubhe pāṇḍavaṃ sainyaṃ tattadā bharatarṣabha //

nadītīreṣu ramyeṣu saraḥsu ca viśāmpate /
vāsānkṛtvā krameṇātha jagmuste kurupuṅgavāḥ //

yuyutsuśca mahātejā dhaumyaścaivi purohitaḥ /
yudhiṣṭhirasya vacanātpuraguptiṃ pracakratuḥ //

tato yudhiṣṭhiro rājā kurukṣetramavātarat /
kramoṇottīrya yamunāṃ nadīṃ paramapāvinīm //

sa dadarśāśramaṃ dūrādrājarṣestasya dhīmataḥ /
śatayūpasya kauravya dhṛtarāṣṭrasya caiva ha //

tataḥ pramuditaḥ sarvo janastadvanamañjasā /
viveśa sumahānādairāpūrya bharatarṣabha //