મહાભારત · અધ્યાય 16.21

તતસ્તત્ર મુનિશ્રેષ્ઠા રાજાનં દ્રષ્ટુમભ્યયુઃ ।
નારદઃ પર્વતશ્ચૈવ દેવલશ્ચ મહાતપાઃ ॥

દ્વૈપાયનઃ સશિષ્યશ્ચ સિદ્ધાશ્ચાન્યે મનીષિણઃ ।
શતયૂપશ્ચ રાજર્ષિર્વૃદ્ધઃ પરમધાર્મિકઃ ॥

તેષાં કુન્તી મહારાજ પૂજાં ચક્રે યથાવિધિ ।
તે ચાપિ તુતુષુસ્તસ્યાસ્તાપસાઃ પરિચર્યયા ॥

તત્ર ધર્મ્યાઃ કથાસ્તાત ચક્રુસ્તે પરમર્ષયઃ ।
રમયન્તો મહાત્માનં ધૃતરાષ્ટ્રં જનાધિપમ્ ॥

કથાન્તરે તુ કસ્મિંશ્ચિદ્દેવર્ષિર્નારદસ્તતઃ ।
કથામિમામકથયત્સર્વપ્રત્યક્ષદર્શિવાન્ ॥
નારદ ઉવાચ ।

પુરા પ્રજાપતિસમો રાજાઽસીદકુતોભયઃ ।
સહસ્રચિત્યિ ઇત્યુક્તઃ શતયૂપપિતામહઃ ॥

સ પુત્રે રાજ્યમાસજ્જ્યિ જ્યેષ્ઠે પરમધાર્મિકે ।
સહસ્રચિત્યો ધર્માત્મા પ્રવિવેશ વનં નૃપઃ ॥

સ ગત્વા તપસઃ પારં દીપ્તસ્ય વસુધાધિપઃ ।
પુરન્દરસ્ય સંસ્થાનં પ્રતિપેદે મહાદ્યુતિઃ ॥

દૃષ્ટપૂર્વઃ સ બહુશો રાજન્સમ્પતતા મયા ।
મહેન્દ્રસદને રાજા તપસા દગ્ધકિલ્બિષઃ ॥

તથા શૈલાલયો રાજા ભગત્તપિતામહઃ ।
તપોબલેનૈવ નૃપો મહેન્દ્રસદનં ગતઃ ॥

તથા પૃષધ્રો રાજાઽસીદ્રાજન્વજ્રધરોપમઃ ।
સ ચાપિ તપસા લેભે નાકપૃષ્ઠમિતો ગતઃ ॥

અસ્મિન્નરણ્યે નૃપતે માન્ધાતુરપિ ચાત્મજઃ ।
પુરુકુત્સો નૃપઃ સિદ્ધિં મહતીં સમવાપ્તવાન્ ॥

ભાર્યા સમભવદ્યસ્ય નર્મદા સરિતાં વરા ।
સોસ્મિન્નરણ્યે નૃપતિસ્તપસ્તપ્ત્વા દિવં ગતઃ ॥

શશલોમા ચ રાજાઽસીદ્રાજન્પરમધાર્મિકઃ ।
સમ્યગસ્મિન્વને તપ્ત્વા તતો દિવમવાપ્તવાન્ ॥

દ્વૈપાયનપ્રસાદાચ્ચ ત્વમપીદં તપોવનમ્ ।
રાજન્નવાપ્ય દુષ્પ્રાપાં સિદ્ધિમગ્ર્યાં ગમિષ્યસિ ॥

ત્વં ચાપિ રાજશાર્દૂલ તપસોન્તે શ્રિયા વૃતઃ । ગાન્ધારીસહિતો ગન્તા ગતિં તેષાં મહાત્મનાં

પાણ્ડુઃ સ્મરતિ તે નિત્યં બલહન્તુઃ સમીપગઃ ।
ત્વાં સદૈવ મહારાજ શ્રેયસા સ ચ યોક્ષ્યતિ ॥

તવ શુશ્રૂષયા ચૈવ ગાન્ધાર્યાશ્ચ યશસ્વિની ।
ભર્તુઃ સલોકતાં કુન્તી ગમિષ્યતિ વધૂસ્તવ ॥

યુધિષ્ઠિરસ્ય જનની સ હિ ધર્મઃ સનાતનઃ ।
વયમેતત્પ્રપશ્યામો નૃપતે દિવ્યવક્ષુષાઃ ॥

પ્રવેક્ષ્યતિ મહાત્માનં વિદુરશ્ચ યુધિષ્ઠિરમ્ ।
સઞ્જયસ્તદનુધ્યાનાદિતઃ સ્વર્ગમવાપ્સ્યતિ ॥
વૈશમ્પાયન ઉવાચ ।

એતચ્છ્રુત્વા કૌરવેન્દ્રો મહાત્મા સાર્ધં પત્ન્યા પ્રીતિમાન્સમ્બભૂવ ।
વિદ્વાન્વાક્યં નારદસ્ય પ્રશસ્ય ચક્રે પૂજાં ચાતુલાં નારદાય ॥

તતઃ સર્વે નારદં વિપ્રસઙ્ઘાઃ સમ્પૂજયામાસુરતીવ રાજન્ ।
રાજ્ઞઃ પ્રીત્યા ધૃતરાષ્ટ્રસ્ય તે વૈ પુનઃપુનઃ સમ્પ્રહૃષ્ટાસ્તદાનીમ્ ॥