Mahabharata · Chapter 16.18

evametanmahābāho yathā vadasi pāṇḍavaḥ /
kṛtamuddharaṇaṃ pūrvaṃ mayā vaḥ sīdatāṃ nṛpāḥ //

dyūtāpahṛtarājyānāṃ patitānāṃ sukhādapi /
jñātibhiḥ paribhūtānāṃ kṛtamuddharaṇaṃ mayā //

kathaṃ pāṇḍorna naśyeta santatiḥ puruṣarṣabhāḥ /
yaśaśca vo na naśyeta iti coddharaṇaṃ kṛtam //

yūyamindrasamāḥ sarve devatulyaparākramāḥ /
mā pareṣāṃ mukhaprekṣāḥ sthetyevaṃ tatkṛtaṃ mayā //

kathaṃ dharmabhṛtāṃ śreṣṭho rājā tvaṃ vāsavopamaḥ /
punarvane na duḥkhī syā iti coddharaṇaṃ kṛtam //

nāgāyutasamaprāṇaḥ khyātavikramapauruṣaḥ /
nāyaṃ bhīmotyayaṃ gacchediti coddharaṇaṃ kṛtam //

bhīmasenādavarajastathā'yaṃ vāsavopamaḥ /
vijayo nāvasīdeta iti coddharaṇaṃ kṛtam //

nakulaḥ sahadevaśca tathemau guruvartinau /
kṣudhā kathaṃ na sīdetāmiti coddharaṇaṃ kṛtam //

iyaṃ ca bṛhatī śyāmā tathā'tyāyatalocanā /
vṛthā sabhātale kliṣṭā mā bhūditi ca tatkṛtaṃ //

apekṣatāmeva vo bhīma vepantīṃ kadalīmiva /
strīdharmiṇīmariṣṭāṅgīṃ tathā dyūtaparājitām //

duḥśāsano yadā maurkhyāddāsīvatparyakarṣata /
tadaiva viditaṃ mahyaṃ parābhūtamidaṃ kulam //

niṣaṇṇāḥ kuravaścaiva tadā me śvaśurādayaḥ /
sā daivaṃ nāthamicchantī vyalapatkurarī yathā //

keśapakṣe parāmṛṣṭā pāpen hatabuddhinā /
yadā duḥśāsanenaiṣā tadā muhyāmyahaṃ nṛpāḥ //

yuṣmattejovivṛddhyartaṃ mayā hyuddharaṇaṃ kṛtam /
tadānīṃ vidulāvākyairiti tadvitta putrakāḥ //

kathaṃ na rājavaṃśo'yaṃ naśyetprāpya sutānmama /
pāṇḍoriti mayā putrastasmāduddharaṇaṃ kṛtam //

na tasya putrāḥ pautrā vā kṣatavaṃśasya pārthiva /
labhte sukṛtām̐llokānyasmādvaṃśaḥ praṇaśyati //

bhuktaṃ rājyaphalaṃ putrā bharturme vipulaṃ purā /
mahādānāni dattāni pītaḥ somo yathāvidhi //

nāhamātmaphalārthaṃ vai vāsudevamacūcudam /
vidulāyāḥ pralāpaistaiḥ pālanārthaṃ ca tatkṛtam //

nāhaṃ rājyaphalaṃ putrāḥ kāmaye putranirjitam /
patilokānahaṃ puṇyānkāmaye tapasā pibho //

śvaśrūśvaśurayoḥ kṛtvā śuśrūṣāṃ vanavāsinoḥ /
tapasā śoṣayiṣyāmi yudhiṣṭhira kalevaram //

nivartasva kuruśreṣṭha bhīmasenādibhiḥ saha /
dharme te dhīyatāṃ buddhirmanastu mahadastu ca //