મહાભારત · અધ્યાય 16.15

વિદુરેણૈવમુક્તસ્તુ ધૃતરાષ્ટ્રો જનાધિપઃ ।
પ્રીતિમાનભવદ્રાજન્રાજ્ઞો જિષ્ણોશ્ચ કર્મણા ॥

તતોઽભિરૂપાન્ભીષ્માય બ્રાહ્મણાનૃષિસત્તમાન્ ।
પુત્રાર્થે સુહૃદાં ચૈવ સ સમીક્ષ્ય સહસ્રશઃ ॥

કારયિત્વાઽન્નપાનાનિ યાનાન્યાચ્છાદનાનિ ચ ।
સુવર્ણમણિરત્નાનિ દાસીદાસપરિચ્છદાન્ ॥

કમ્બલાનિ ચ રત્નાનિ ગ્રામાન્ક્ષેત્રં તથા ધનમ્ ।
સાલઙ્કારાન્ગજાનશ્વાન્કન્યાશ્ચૈવ વરસ્ત્રિયઃ ॥

આદિશ્યાદિશ્ય સર્વેભ્યો દદૌ સ નૃપસત્તમઃ ।
દ્રોણં સન્કીર્ત્ય ભીષ્મં ચ સોમદત્તં ચ બાહ્લિકમ્ ॥

દુર્યોધનં ચ રાજાનં પુત્રાંશ્ચૈવ પૃથક્પૃથક્ ।
જયદ્રથપુરોગાંશ્ચ સુહૃદશ્ચાપિ સર્વશઃ ॥

સ શ્રાદ્ધયજ્ઞો વવૃતે બહુગોધનદક્ષિણઃ ।
અનેકધનરત્નૌઘો યુધિષ્ઠિરમતે તદા ॥

અનિશં યત્ર પુરુષા ગણકા લેખકાસ્તદા ।
યુધિષ્ઠિરસ્ય વચનાદપૃચ્છન્ત સ્મ તં નૃપમ્ ॥

આજ્ઞાપય કિમેતેભ્યઃ પ્રદેયં દીયતામિતિ ।
તદુપસ્થિતમેવાત્ર વચનાન્તે દદુસ્તદા ॥

શતે દેયે દશશતં સહસ્રં ચાયુતં તથા ।
દીયતે વચનાદ્રાજ્ઞઃ કુન્તીપુત્રસ્ય ધીમતઃ ॥

એવં સ વસુધારાભિર્વર્ષમાણો નૃપામ્બુદઃ ।
તપ્રયામાસ વિપ્રાંસ્તાન્વર્ષન્ભૂમિમિવામ્બુદઃ ॥

તતોઽન્તન્તરમેવાત્ર સર્વવર્ણાન્મહામતે ।
અન્નપાનરસૌઘેણ પ્લાવયામાસ પાર્થિવઃ ॥

સવસ્ત્રધનરત્નૌઘો મૃદઙ્ગનિનદસ્વનઃ ।
ગવાશ્વમકરાવર્તો નાનારત્નમહાકરઃ ॥

ગ્રામાગ્રહારદ્વીપાઢ્યો મણિહેમજલાર્ણવઃ ।
જગત્સમ્પ્લાવયામાસ ધૃતરાષ્ટ્રોડુપોદ્ધતઃ ॥

એવં સ પુત્રપૌત્રાણાં પિતૄણામાત્મનસ્તથા ।
ગાન્ધાર્યાશ્ચ મહારાજ પ્રદદાવૌર્દ્વદેહિકમ્ ॥

પરિશ્રાન્તો યદાસીત્સ દદદ્દાનાન્યનેકશઃ ।
નિવર્તયામાસ તદા દાનયજ્ઞં નરાધિપઃ ॥

એવં સ રાજા કૌરવ્યશ્ચક્રે દાનમહાક્રતુમ્ ।
નટનર્તકલાસ્યાઢ્યં બહ્વન્નરસદક્ષિણમ્ ॥

દશાહમેવં દાનાનિ દત્ત્વા રાજાંઽબિકાસુતઃ ।
બભૂવ પુત્રપૌત્રાણામનૃણો ભરતર્ષભ ॥