Mahabharata · Chapter 16.16
tataḥ prabhāte rājā sa dhṛtarāṣṭroṃ'bikāsutaḥ /
ānāyya pāṇḍavānvīrānvanaṣāse kṛtakṣaṇaḥ //
gāndhārīsahito dhīmānabhyanandadyathāvidhi /
kārtikyāṃ kārayitveṣṭiṃ brāhmaṇairvedapāragaiḥ //
agnihotraṃ puraskṛtya valkalājinasaṃvṛtaḥ /
vadhūjanavṛto rājā niryayau bhavanāttataḥ //
tataḥ striyaḥ kauravapāṇḍavānāṃ yāñcāparāḥ kauravarājavaṃśyāḥ /
tāsāṃ nādaḥ prādurāsīttadānīṃ vaicitrivīrye nṛpatau prayāte //
tato lājaiḥ sumanobhiśca rājā vicitrābhistadgṛhaṃ pūjayitvā /
saṃyojyāśvairbhṛtyavargaṃ ca sarvaṃ tataḥ samutsṛjya yayau narendraḥ //
tato rājā prāñjalirvepamāno yudhiṣṭhiraḥ sasvaraṃ bāṣpakaṇṭhaḥ /
vinadyoccairgāṃ mahārāja sādho kva yāsyasītyapatattāti bhūmau //
tathā'rjunastīvraduḥkhābhitapto muhurmuhurniḥ śvasanbhāratāgryaḥ /
yudhiṣṭhiraṃ maivamityevamuktvā nigṛhyātho dīnataro babhūva //
vṛkodaraḥ phalgunaścaiva vīrau mādrīputrau viduraḥ sañjayaśca /
vaiśyāputraḥ sahito gautamena dhaumyo viprāścānvayurbāṣpakaṇṭhāḥ //
kuntī gāndhārīṃ baddhanetrāṃ vrajantīṃ skandhāsaktaṃ hastamathodvahantī /
rājā gāndhāryāḥ skandhadeśe'vasajya pāṇiṃ yayau dhṛtarāṣṭraḥ pratītaḥ //
tathā kṛṣṇā draupadī yādavī ca bālāpatyā cottarā kauravī ca /
citrāṅgadā yāśca kāścitstriyo'nyāḥ sārdhaṃ rājñā prasthitāstā vadhūbhiḥ //
tāsāṃ nādo rudatīnāṃ tadā'sī- drājanduḥkhātkurarīṇāmivoccaiḥ /
tato niṣpeturbrāhmaṇakṣatriyāṇāṃ viṭśūdrāṇāṃ caiva bhāryāḥ samantāt //
tanniryāṇe duḥkhitaḥ pauravargo gajāhvaye caiva babhūva rājan / yathāpūrvaṃ gacchatāṃ pāṇḍavānāṃ
dyūte rājankauravāṇāṃ sabhāyām //
yā nāpaśyaccandramā naiva sūryo
rāmāḥ kāścittāḥ sma tasminnarendre / mahāvanaṃ gacchati kauravendre
śokenārtā rājamārgaṃ prapeduḥ //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0