Mahabharata · Chapter 15.9

praviśya tvarjuno rājannāśramaṃ satyavādinaḥ /
dadarśāsīnamekānto muniṃ satyavatīsutam //

sa tamāsādya dharmajñamupatasthe mahāvratam /
arjunosmīti nāmāstai nivedyābhyavadattataḥ //

svāgataṃ te'stviti prāha muniḥ satyavatīsutaḥ /
āsyatāmiti hovāca prasannātmā mahāmuniḥ //

tamapratītamanasaṃ niḥśvasantaṃ punaḥpunaḥ /
nirviṣṇamanasaṃ dṛṣṭvā pārthaṃ vyāso'bravīdidam //

nakhakeśadaśākumbhavāriṇā kiṃ samukṣitaḥ /
āvīrajānugamanaṃ brāhmaṇo vā hatastvayā //

yuddhe parājito vā'si dataśrīriva lakṣyase / na tvāṃ prabhinnaṃ jānāmi kimidaṃ bharatarṣabha /
śrotavyaṃ cenmayā pārtha kṣaśripramākhyātumarhasi //
arjuna uvāca /

yaḥ sa meghavapuḥ śrīmānbṛhatpaṅkajalocanaḥ /
sa kṛṣṇaḥ saha rāmeṇa tyaktvā dehaṃ divaṃ gataḥ //

tadanusmṛtya sammohaṃ tadā śokaṃ mahāmate /
prayāmi sarvadā mahyaṃ mumūrṣā copajāyate //

tadvākyasparśanālokasukhaṃ cāmṛtasannibham / saṃsmṛtya devadevasya pramuhyityamṛtātmanaḥ //

mausale vṛṣṇivīrāṇāṃ vināśo brahmaśāpajaḥ /
babhūva vīrāntakaraḥ prabhāse romaharṣaṇaḥ //

ete śūrā mahātmānaḥ siṃhadarpā mahābalāḥ /
bhojavṛṣṇyandhakā brahmannanyonyaṃ tairhataṃ yudhi //

gadāparighaśaktīnāṃ sahāḥ parighabāhavaḥ /
ta erakābhirnihatāḥ paśya kālasya paryayam //

hataṃ pañcaśataṃ teṣāṃ sahasraṃ bāhuśālinām /
nidhanaṃ samanuprāptaṃ samāsādyetaretaram //

punaḥpunarna mṛṣyāmi vināśamamitaujasām /
cintayāno yadūnāṃ ca kṛṣṇasya ca yaśasvinaḥ //

śoṣaṇaṃ sāgarasyeva mandarasyeva cālanam /
nabhasaḥ patanaṃ caiva śaityamagnestathaiva ca //

aśraddheyamahaṃ manye vināśaṃ śārṅgadhanvanaḥ /
na ceha sthātumicchāmi loke kṛṣṇavinākṛtaḥ //

itaḥ kaṣṭataraṃ cānyacchṛṇu tadvai tapodhana /
mano me dīryate yena cintayānasya vai muhuḥ //

paśyato vṛṣṇidārāśca mama brahmansahasraśaḥ /
ābhīrairabhibhūyājau hṛtāḥ pañcanadālayaiḥ //

dhanurādāya tatrāhaṃ nāśakaṃ tasya pūraṇe /
yathāpurā ca me vīryaṃ bhujayorna tathā'bhavat //

astrāṇi me pranaṣṭāni vividhāni mahāmune /
śarāśca kṣayamāpannāḥ kṣaṇenaiva samantataḥ //

puruṣascāprameyātmā śaṅkhacakragadādharaḥ /
caturbhujaḥ pītavāsāḥ śyāmaḥ padmadalekṣaṇaḥ //

yaśca yāti purastānme rathasya sumahādyutiḥ /
pradahanripusainyāni na paśyāmyahamadya tam //

yena pūrvaṃ pradagdhāni śatrusainyāni tejasā /
śarairgāṇḍīvanirmuktairahaṃ paścādaśātayam //

tamapaśyanviṣīdāmi ghūrṇāmīva ca sattama /
parinirviṇṇacetāśca śāntiṃ nopalabhe'pi ca //

devakīnandanaṃ devaṃ vāsudevamajaṃ prabhum / vinā janārdanaṃ vīraṃ nāhaṃ jīvitumutsahe //

śrutvaiva hi gataṃ viṣṇuṃ mamāpi mumuhurdiśaḥ /
pranaṣṭajñātivīryasya śūnyasya paridhāvataḥ //

upadeṣṭuṃ mama śreyo bhavānarhati sattama //
vyāsa uvāca /

devāṃśā devabhūtena sambhūtāste gatāssaha /
dharmavyavasthārakṣārthaṃ devena samupekṣitāḥ //

brahmaśāpavinirdagdhā vṛṣṇyandhakasamahārathāḥ /
vinaṣṭāḥ kuruśārdūla na tāñśocitumarhasi //

bhavitavyaṃ tathā tacca diṣṭametanmahātmanām /
upekṣitaṃ ca kṛṣṇena śaktenāpi vyapohitum //

trailokyamapi govindaḥ kṛtsnaṃ sthāvarajaṅgamam /
prasahedanyathā kartuṃ kutaḥ śāpaṃ mahātmanām //

striyaśca tāḥ purā śaptāḥ prabhāse kupitena vai / aṣṭāvakreṇa muninā tadarthaṃ tvadbalakṣayam //

rathasya purato yāti yaḥ sa cakragadādharaḥ /
tava snehātpurāṇarṣirvāsudevaścaturbhujaḥ //

kṛtvā bhārāvataraṇaṃ pṛthivyāḥ pṛthulocanaḥ /
mokṣayitvā tanuṃ prāptaḥ kṛṣṇaḥ svasthānamuttamam //

tvayā'pīha mahatkarma devānāṃ puruṣarṣabha /
kṛtaṃ bhīmasahāyena yamābhyāṃ ca mahābhuja //

kṛtakṛtyāṃśca vo manye saṃsiddhānkurupuṅgava /
gamanaṃ prāptakālaṃ va idaṃ śreyaskaraṃ vibho //

balaṃ buddhiśca tejaśca pratipattiśca bhārata /
bhavanti bhavakāleṣu vipadyante viparyaye //

kālamūlamidaṃ sarvaṃ jagadbījaṃ dhanañjaya /
kāla eva samādatte punareva yadṛcchayā //

sa eva balavānbhūtvā punarbhavati durbalaḥ /
sa eveśaśca bhūtveha parairājñāpyate punaḥ //

kṛtakṛtyāni cāstrāṇi gatānyadya yathāgatam /
punareṣyanti te hastaṃ yadā kālo bhaviṣyati //

kālo gantuṃ gatiṃ mukhyāṃ bhavatāmapi bhārata /
etacchreyo hi vo manye paramaṃ bharatarṣabha //
vaiśampāyana uvāca /

etadvacanamājñāya vyāsasyāmitatejasaḥ /
anujñāto yayau pārtho nagaraṃ nāgasāhvayam //

praviśya ca purīṃ vīraḥ samāsādya yudhiṣṭhiram /
ācaṣṭa tadyathāvṛttaṃ vṛṣṇyandhakakulaṃ prati //