Mahabharata · Chapter 14.9

kaccitsukhaṃ svapiṣi tvaṃ bṛhaspate kaccinmanojñāḥ paricārakāste /
kacciddevānāṃ sukhakāmosi vipra kacciddevāstvāṃ paripālayanti //
bṛhaspatiruvāca /

sukhaṃ śaye śayane devarāja tathā manojñāḥ paricārakā me /
tathā devānāṃ sukhakāmosmi nityaṃ devāśca māṃ subhṛśaṃ pālayanti //
indra uvāca /

kuto duḥkhaṃ mānasaṃ dehajaṃ vā pāṇḍurvivarṇaśca kutastvamadya /
ācakṣva me brāhmaṇa yāvadetā- nnihanmi sarvāṃstava duḥkhakartṝn //
bṛhaspatiruvāca /

maruttamāhurmaghavanyakṣyamāṇaṃ mahāyajñenottamadakṣiṇena /
saṃvarto yājayatīti me śrutaṃ tadicchāmi na sa taṃ yājayet //
indra uvāca /

sarvānkāmānanuyātosi vipra tvaṃ devānāṃ mantrayase purodhāḥ /
ubhau ca te jarāmṛtyū vyatītau kiṃ saṃvartastava kartā'dya vipra //
bṛhaspatiruvāca /

devaiḥ saha tvamasurānsampraṇudya jighāṃsase cāpyuta sānubandhān /
yaṃyaṃ samṛddhaṃ paśyasi tatratatra duḥkhaṃ sapatneṣu samṛddhibhāvaḥ //

atosmi devendra vivarṇarūpaḥ sapatno me vardhate tanniśamya /
sarvopāyairmaghavansanniyaccha saṃvartaṃ vā pārthivaṃ vā maruttam //
indra uvāca /

ehi gaccha prahito jātavedo bṛhaspatiṃ paridātuṃ marutte /
ayaṃ vai tvāṃ yājayitā bṛhaspati- stathā'maraṃ caiva kariṣyatīti //
agniruvāca /

ahaṃ gacchāmi tava śakrādya dūto bṛhaspatiṃ paridātuṃ marutte /
vācaṃ satyāṃ puruhūtasya kartuṃ bṛhaspateścāpacitiṃ cikīrṣuḥ //
vyāsa uvāca /

tataḥ prāyāddhūmaketurmahātmā vanaspatīnvīrudhaścāvamṛdgan /
kāmāddhimānte parivartamānaḥ kāṣṭhātigo mātariśveva nardan //
maruta uvāca /

āśvaryamadya paśyāmi rūpiṇaṃ vahnimāgatam /
āsanaṃ salilaṃ pādyaṃ gāṃ copānaya vai mune //
agniruvāca /

āsanaṃ salilaṃ pādyaṃ pratinandāmi te'nagha /
indreṇa tu samādiṣṭaṃ viddhi māṃ dūtamāgatam //
maruta uvāca /

kaccicchrīmāndevarājaḥ sukhī ca kacciccāsmānprīyate dhūmaketo /
kacciddevā asya vaśe yathāva- tprabrūhi tvaṃ mama kārtsnyena deva //
agniruvāca /

śakro bhṛśaṃ susukhī pārthivendra prātiṃ cecchatyajarāṃ vai tvayā saḥ /
devāśca sarve vaśagāstasya rāja- nsandeśaṃ tvaṃ śṛṇu me devarājñaḥ //

yadarthaṃ māṃ prāhiṇottvatsakāśaṃ bṛhaspatiṃ paridātuṃ marutte /
ayaṃ gururyājayatāṃ nṛpa tvāṃ martyaṃ santamamaraṃ tvāṃ karotu //
maruta uvāca /

saṃvarto'yaṃ yājayitā dvijo māṃ bṛhaspaterañjalireṣa tasya /
na caivāsau yājayitvā mahendraṃ martyaṃ santaṃ yājayannadya śobhet //
agniruvāca /

ye vai lokā devaloke mahāntaḥ samprāpsyase tāndevarājaprasādāt /
tvāṃ cedasau yājayedvai bṛhaspati- rnūnaṃ svargaṃ tvaṃ jayeḥ kīrtiyuktaḥ //

tathā lokā mānuṣā ye ca divyāḥ prajāpateścāpi ye vai mahāntaḥ /
tete jitā devarājyaṃ ca kṛtsnaṃ bṛhaspatiryājayeccennarendra //
saṃvarta uvāca /

mā smaiva tvaṃ punarāgāḥ kathañci- dbṛhaspatiṃ paridātuṃ marutte /
mā tvāṃ dhakṣye cakṣuṣā dāruṇena sankruddho'haṃ pāvaka tvaṃ nibodhaḥ //
vyāsa uvāca /

tato devānagamaddhūmaketu- dīhādbhīto vyathito'śvatthaparṇavat /
taṃ vai dṛṣṭvā prāha śakro mahātmā bṛhaspateḥ sannidhau havyavāham //

yastvaṃ gataḥ prahito jātavedo bṛhaspatiṃ paridātuṃ marutte /
tatkiṃ prāha sa nṛpo yakṣyamāṇaḥ kaccidvacaḥ pratigṛhṇāti tacca /
agniruvāca /

na te vācaṃ rocayate marutto bṛhaspaterañjaliṃ prāhiṇotsaḥ /
saṃvarto māṃ yājayitetyuvāca punaḥ punaḥ sa mayā yācyamānaḥ //

uvācedaṃ mānuṣā ye ca divyā / prajāpaterye ca lokā mahāntaḥ /
tāṃścellabheyaṃ saṃvidaṃ tena kṛtvā tathāpi neccheyamiti pratītaḥ //
indra uvāca /

punargatvā pārthivaṃ tvaṃ sametya vākyaṃ madīyaṃ prāpaya svārthayuktam /
punaryadyukto na kariṣyate vaca- stvatto vajraṃ samprahartāsmi tasmai //
agniruvāca /

gandharvarāḍyātvayaṃ tatra dūto bibhemyahaṃ vāsava tatra gantum /
saṃrabdho māmabravīttīkṣṇaroṣaḥ saṃvarto vākyaṃ caritabrahmacaryaḥ //

yadyāgaccheḥ punarevaṃ kathañci- dbṛhaspatiṃ paridātuṃ marutte /
daheyaṃ tvāṃ cakṣuṣā dāruṇena sankruddha ityetadavaihi śakra //
śakra uvāca /

tvamevānyāndahase jātavedo na hi tvadanyo vidyate bhasmakartā /
tvatsaṃsparśātsarvaloko bibheti aśraddheyaṃ vadase havyavāha //
agniruvāca /

divaṃ devendra pṛthivīṃ ca sarvāṃ saṃveṣṭayestvaṃ svabalenaiva śakra /
evaṃvidhasyeha satastavāsau kathaṃ vṛtrastridivaṃ prāgjahāra //
indra uvāca /

nagaṇḍikākārayogaṃ kare'ṇuṃ na cārisomaṃ prapibāmi vahne /
na kṣīṇaśaktau prahārāmi vajraṃ ko me sukhāya prahareta martyaḥ //

pravrajayeyaṃ kālakeyānpṛthivyā- mapākarṣandānavānantarikṣāt /
divaḥ prahlādamavasānamānayaṃ ko me'sukhāya prahareta mānavaḥ //
agniruvāca /

yatra śaryātiṃ cyavano yājayiṣya- nsahāśvibhyāṃ somamagṛhṇadekaḥ /
taṃ tvaṃ kruddhaḥ pratyaṣedhīḥ purastā- ccharyātiyajñaṃ sma taṃ mahendra //

vajraṃ gṛhītvā ca purandara tvaṃ samprāhārṣīścyavanasyātighoram /
sa te vipraḥ saha vajreṇi bāhu- mapāgṛhṇāttapasā jātamanyuḥ //

tato roṣātsarvato ghorarūpaṃ sapatnaṃ te janayāmāsa bhūyaḥ /
madaṃ nāmnā cāsuraṃ viśvarūpaṃ yaṃ tvaṃ dṛṣṭvā cakṣuṣī sannyamīlaḥ //

hanurekā jagatīsthā tathaikā divaṃ gatā mahato dānavasya /
sahasraṃ dantānāṃ śatayojanānāṃ sutīkṣṇānāṃ ghorarūpaṃ babhūva //

vṛttāḥ sthūlā rajatastambhavarṇā daṃṣṭrāścatasro dve śate yojanānām /
sa tvāṃ dantānvidaśannabhyadhāva- jjighāṃsayā śūlamudyamya ghoram //

taṃ nāpaśyastvaṃ tadā ghorarūpaṃ sarve vai tvāṃ dadṛśurdarśanīyam /
yasmādbhītaḥ prāñjalistvaṃ maharṣi- māgacchethāḥ śaraṇaṃ dānavaghna //

kṣātrādbalādbrahmabalaṃ garīyo na brahmataḥ kiñcidanyadgarīyaḥ /
sohaṃ jānanbrahmatejo yathāva- nna saṃvarta gantumicchāmi śakra //