Mahabharata · Chapter 14.10

evametadbrahmabalaṃ garīyo na brāhmaṇātkiñcidanyadrarīyaḥ /
āvikṣitasya tu balaṃ na mṛṣye vajramasmai prahariṣyāmi ghoram //

dhṛtarāṣṭra gaccha prahito maruttaṃ saṃvartena saṅgataṃ taṃ vadasva
bṛhaspatiṃ tvamupaśikṣasva rāja- nvajraṃ vā te prahariṣyāmi ghoram //
vyāsa uvāca /

tato gatvā dhṛtarāṣṭro narendraṃ provācedaṃ vacanaṃ vāsavasya //

gandharvaṃ māṃ dhṛtarāṣṭraṃ nibodha tvāmāgataṃ vaktukāmaṃ narendra /
aindraṃ vākyaṃ śṛṇu me rājasiṃha yatprāha lokādhipatirmahātmā //

bṛhaspatiṃ yājakaṃ tvaṃ vṛṇīṣva vajraṃ vā te prahariṣyāmi ghoram /
vacaścedetanna kariṣyase me prāhaitadetāvadacintyakarmā //
marutta uvāca /

tvaṃ caivaitadvettha purandaraśca viśvedevā vasavaścāśvinau ca /
mitradrohe niṣkṛtirnāsti loke mahatpāpaṃ brahmahatyāsamaṃ tat //

bṛhaspatiryājayatāṃ mahendraṃ devaśreṣṭhaṃ vajrabhṛtāṃ variṣṭham /
saṃvarto māṃ yājayitā'dya rāja- nna te vākyaṃ tasya vā rocayāmi //
gandharva uvāca /

ghoro nādaḥ śrūyatāṃ vāsavasya nabhastale garjato rājasiṃha /
vyaktaṃ vajraṃ mokṣyate te mahendraḥ kṣemaṃ rājaṃścintyatāmeṣa kālaḥ //
vyāsa uvāca /

ityevamukto dhṛtarāṣṭreṇa rāja- ñśrutvā nādaṃ nadato vāsavasya /
taponityaṃ dharmavidāṃ variṣṭhaṃ saṃvartaṃ taṃ jñāpayāmāsa kāryam //
marutta uvāca /

paśyātmānaṃ plavamānaṃ tvamārā- dadhvā dūraṃ tena na dṛśyate'dya /
prapadye'haṃ śarma viprendra tvattaḥ prayaccha tasmādabhayaṃ vipramukhya //

ayamāyāti ve vajrī diśo vidyotayandasa /
amānuṣeṇa ghoreṇi sadasyāstrāsitā hi naḥ //
saṃvarta uvāca /

bhayaṃ śakrādvyetu te rājasiṃha praṇotsye'haṃ bhayametatsughoram /
saṃstambhinyā vidyayā kṣiprameva mā bhaistvamasyābhibhavātpratītaḥ //

ahaṃ saṃstambhayiṣyāmi mā bhaistvaṃ śakrato nṛpa /
yarveṣāmeva devānāṃ kṣayitānyāyudhāni me //

diśo vajraṃ vrajatāṃ vāyuretu varṣaṃ bhūtvā varṣatāṃ kānaneṣu /
āpaḥ plavantvantarikṣe vṛthā ca saudāmanī dṛśyate mā'pi bhaistvam //

vahnirdevastrātu vā sarvataste kāmānsarvānvarṣatu vāsavo vā /
vajraṃ tathā sthāpayatāṃ vadhāya mahāghoraṃ puvamānaṃ jalaughaiḥ //
marutta uvāca /

ghoraḥ śabdaḥ śrūyate vai mahāsvano vajrasyaiṣa sahito mārutena /
ātmā hi me pravyathate muhurmuhu- rna me svāsthyaṃ jāyate cādya vipra //
saṃvarta uvāca /

vajrādugrādvyetu bhayaṃ tavādya vāto bhūtvā vrajatu narendra vajram /
bhayaṃ tvaktvā varamanyaṃ vṛṇīṣva kaṃ te kāmaṃ tapasā sādhayāmi //
marutta uvāca /

indraḥ sākṣātsahasā'bhyetu vipra haviryajñe pratigṛhṇātu caiva /
svaṃsvaṃ haviścaiva juṣantu devā hutaṃ somaṃ pratigṛhṇantu caiva //
saṃvarta uvāca /

ayamindro haribhirāyāti rāja- ndevaiḥ sarvaistvaritaiḥ stūyamānaḥ /
mantrāhūto yajñamimaṃ mayā'dya paśyaśvainaṃ mantravisrastakāyam //
vyāsa uvāca /

tato devaiḥ sahito devarājo rathe yuṅktvā tānharīnvājimukhyān /
āyādyajñamatha rājñaḥ pipāsu- rāvikṣitasyāprameyasya somam //

tamāyāntaṃ sahitaṃ devasaṅghaiḥ pratyudyayau sapurodhā maruttaḥ /
cakre pūjāṃ devarājāya cāgryāṃ yathāśāstraṃ vidhivatprīyamāṇaḥ //
saṃvarta uvāca /

susvāgataṃ te puruhūteha vidva- nyajño'pyayaṃ sannihite tvayīndra /
śośubhyate balavṛtraghna bhūyaḥ pibasva somaṃ sutamudyataṃ mayā //
marutta uvāca /

śivena māṃ paśya namaśca te'stu prāpto yajñaḥ saphalaṃ jīvitaṃ me /
ayaṃ yajñaṃ kurute me surendra bṛhaspateravaro janmanā ca /
indra uvāca /

jānāmi te gurumenaṃ tapodhanaṃ bṛhaspateranujaṃ tigmatejasam
yasyāhvānādāgato'haṃ narendra prītirme'dya tvayi manyuḥ pranaṣṭaḥ //
saṃvarta uvāca /

yadi prītastvamasi vai devarāja tasmātsvayaṃ śādhi yajñe vidhānam /
svayaṃ sarvānkuru bhāgānsurendra jānātvayaṃ sarvalokaśca deva //
vyāsa uvāca /

evamuktastvāṅgirasena śakraḥ samādideśa svayameva devān /
sabhāḥ kriyantāmāvasathāśca mukhyāḥ sahasraśaścitrabhūtāḥ samṛddhāḥ //

klṛptāḥ sthūṇāḥ kurutārohaṇāni gandharvāṇāmapsarasāṃ ca śīghram /
yatra nṛtyerannapsarasaḥ samastāḥ svargopamaḥ kriyatāṃ yajñavāṭaḥ //

ityuktāste cakrurāśu pratītā divaukasaḥ śakravākyānnarendra /
tato vākyaṃ prāha rājānamindraḥ prīto rājanpūjyamāno maruttam //

eṣa tvayā'hamiha rājansametya ye cāpyante tava pūrve narendra /
sarvāścānyā devatāḥ prīyamāṇā havistubhyaṃ pratigṛhṇantu rājan //

āgneyaṃ vai lohitamālabhantāṃ vaiśvadevaṃ bahurūpaṃ hi rājan /
nilaṃ cokṣāṇaṃ medyamapyālabhantāṃ calacchiśnaṃ sampradiṣṭaṃ dvijāgryāḥ //

tato yajño vavṛdhe tasya rāja- nyatra devāḥ svayamannāni jahruḥ /
yasmiñśakro brāhmaṇaiḥ pūjyamānaḥ sadasyo'bhūddharimāndevarājaḥ //

tataḥ saṃvartaścaityagato māhātmā yathā vahniḥ prajvalito dvitīyaḥ /
havīṃṣyuccairāhvayandevasaṅghā- ñjuhāvāgnau mantravatsupratītaḥ //

tataḥ pītvā balabhitsomamagryaṃ ye cāpyante somapā devasaṅghāḥ /
sarve'nujñātāḥ prayayuḥ pārthivena yathājoṣaṃ tarpitāḥ prītimantaḥ //

tato rājā jātarūpasya rāśī- npadepade kārayāmāsa hṛṣṭaḥ /
dvijātibhyo visṛjanbhūri vittaṃ rarāja vitteśa ivārihantā //

tato vittaṃ vividhaṃ sannidhāya yathotsāhaṃ kārayitvā ca kośam /
anujñāto guruṇāṃ sannivṛttya śaśāsa gāmakhilāṃ sāgarāntām //

evanguṇaḥ sambabhūveha rājā yasya kratau tatsuvarṇaṃ prabhūtam /
tattvaṃ samādāya narendra vittaṃ yajasva devāṃstapanīyairvidhānaiḥ //
vaiśampāyana uvāca /

tato rājā pāṇḍavo hṛṣṭarūpaḥ śrutvā vākyaṃ satyavatyāḥ sutasya /
manaścakre tena vittena yaṣṭuṃ tato'mātyairmantrayāmāsa bhūyaḥ //