Mahabharata · Chapter 14.59

udaṅkasya varaṃ dattvā govindo dvijattama /
ata ūrdhvaṃ mahābāhuḥ kiṃ cakāra mahāyaśāḥ //
vaiśampāyana uvāca /

udaṅkāya varaṃ dattvā prāyātsātyakinā saha /
dvārakāmeva govindaḥ śīghravegairmahāhayaiḥ //

sarāṃsi saritaścaiva vanāni ca girīṃstathā /
atikramyāsasādātha ramyāṃ dvāravatīṃ purīm //

vartamāne mahārāja mahe raivatakasya ca /
upāyātpuṇḍarīkākṣo yuyudhānānugastadā //

alaṅkṛtastu sa girirnānārūpairvicitritaiḥ /
babhau ratnamayaiḥ kośaiḥ saṃvṛtaḥ pururṣarṣabha //

kāñcanasragbhiragryābhiḥ sumanobhistathaiva ca /
vāsobhiśca mahāśailaḥ kalpavṛkṣaistathaiva ca //

dīpavṛkṣaiśca sauvarṇairabhīkṣṇamupaśobhitaḥ /
guhānirjharadeśeṣu divābhūto babhūva ha //

etākābhirvicitrābhiḥ saghaṇṭābhiḥ samantataḥ / pumbhiḥ strībhiśca sanghuṣṭaḥ pragīta iva cābhavat /
atīva prekṣaṇīyo'bhūnmerurmunigaṇairiva //

mattānāṃ hṛṣṭarūpāṇāṃ strīṇāṃ puṃsāṃ ca bhārata /
gāyatāṃ parvatendrasya divispṛgiva niḥsvanaḥ //

pramattamattasammattakṣveḍitoddhuṣṭasankulaḥ /
tathā kilakilāśabdairbhūdharo'bhūnmanoharaḥ //

vipaṇāpaṇavānramyo bhakṣyabhojyavihāravān /
vastramālyotkarayuto vīṇāveṇumṛdaṅgavān //

surāmaireyamiśreṇa bhakṣyabhojyena caiva ha /
dīnāndhakṛpaṇādibhyo dīyamānena cāniśam / babhau paramakalyāṇo mahastasya mahāgireḥ //

puṇyāvasathavānvīraiḥ puṇyakṛdbhirniṣevitaḥ /
vihāro vṛṣṇivīrāṇāṃ mahe raivatasya ha //

sa nānāveśmasankīrṇo devaloka ivābabhau /
tadā ca kṛṣṇasānnidhyānmudā devagaṇairyutaḥ //

stuvantyantarhitā devā gandharvāśca saharṣibhiḥ /
sādhakaḥ sarvadharmāṇāmasurāṇāṃ vināśakaḥ //

tvaṃ sraṣṭā sṛjyamādhāraṃ kāraṇaṃ dharmavedavit /
tvayā satkriyate deva ja jānīmo'tra māyayā //

kevalaṃ tvā'bhijānīmaḥ śaraṇaṃ parameśvaram /
brahmādīnāṃ ca govinda sānnidhvaṃ śaraṇaṃ namaḥ //

iti stute mānuṣaiśca pūjite devakīsute / śakrasadmapratīkāśo babhūva sa hi śailarāṭ //

tataḥ sampūjyamānaḥ sa viveśa bhavanaṃ śubham /
govindaḥ sātyakiścaiva jagmaturbhavanaṃ svakam //

viveśa ca prahṛṣṭātmā cirakālapravāsataḥ /
kṛtvā nasukaraṃ karma dānaveṣviva vāsavaḥ //

upāyāntaṃ tu vārṣṇeyaṃ bhojavṛṣṇyandhakāstathā /
abhyagaccanmahātmānaṃ devā iva śatakratum //

sa tānabhyarcya medhāvī pṛṣṭvā ca kuśalaṃ tadā /
abhyavādayata prītaḥ pitaraṃ mātaraṃ tadā //

tābhyāṃ sa sampariṣvaktaḥ sāntvitaśca mahābhujaḥ /
upopaviṣṭaiḥ sarvaistairvṛṣṇibhiḥ parivāritaḥ //

sa viśrānto mahātejāḥ kṛtapādāvanejanaḥ /
kathayāmāsa tatsarvaṃ pṛṣṭaḥ pitrā mahāhavam //