Mahabharata · Chapter 14.49
ko vā svidiha dharmāṇāmanuṣṭheyatamo mataḥ /
vyāhatāmiva paśyāmo dharmasya vividhāṃ gatim //
ūrddhvaṃ dehādvadantyeke naitadastīti cāpare /
kecitsaṃśayitaṃ sarvaṃ niḥsaṃśayamathāpare //
anityaṃ nityamityeke nāstyastītyapi cāpare /
tridhetyeke dvidhetyeke vyākīrṇamiti cāpare //
manyante brāhmaṇā eva brahmajñāstattvadarśinaḥ /
ekameke pṛthakcānye bahutvamiti cāpare //
deśakālāvubhau kecinnaitadastīti cāpare /
jaṭājinadharāścānye muṇḍāḥ kecidasaṃvṛtāḥ //
aśnānaṃ kecidicchanti snānamapyapare janāḥ /
manyante brāhmaṇā devā brahmajñāstattvadarśinaḥ //
āhāraṃ kecidicchanti keciccānaśane ratāḥ /
karma kecitpraśaṃsanti praśānti cāpare janāḥ //
kecinmokṣaṃ praśaṃsanti kecidbhogānpṛthagvidhān / dhanāni kecidicchanti nirdhanatvamathāpare /
upāsya sādhanaṃ tveke naitadastīti cāpare //
ahiṃsāniratāścānye keciddhiṃsāparāyaṇāḥ /
puṇyena yaśasā cānye naitadastīti cāpare //
sadbhāvaniratāścānye kecitsaṃśayite sthitāḥ /
duḥkhādanye sukhādanye dhyānamityapare janāḥ //
yajña ityapare viprāḥ pradānamiti cāpare /
tapastvanye praśaṃsanti svādhyāyamapare janāḥ //
jñānaṃ sannyāsamityeke svabhāvaṃ bhūtacintakāḥ /
sarvameke praśaṃsanti na sarvamiti cāpare //
evaṃ vyutthāpite dharme bahudhā viprabodhite /
niścayaṃ nādhigacchāmaḥ śreyaḥ kimiti sattama //
idaṃ śreya idaṃ śreya ityevaṃ vyusthito janaḥ /
yo hi yasminrato dharma sa taṃ pūjayate sadā //
tena no'vihitā prajñā manaśca bahulīkṛtam /
etadākhyātamicchāmaḥ śreyaḥ kimiti sattama //
ataḥ paraṃ tu yadguhyaṃ tadbhavānvaktumarhati /
satvakṣetrajñayoścāpi sambandhaḥ kena hetunā //
evamuktaḥ sa tairviprairbhagavām̐llokabhāvanaḥ /
tebhyaḥ śaśaṃsa dharmātmā yāthātathyena buddhimān //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0