Mahabharata · Chapter 14.47

sannyāsaṃ tapa ityāhurvṛddhā niścitavādinaḥ /
brāhmaṇā brahmayonisthā jñānaṃ brahma paraṃ viduḥ //

atidūrātmakaṃ brahma vedavidyāvyapāśrayam /
nirdvandvaṃ nirguṇaṃ nityamacintyaguṇamuttamam //

jñānena tapasā caiva dhīrāḥ paśyanti tatparam /
nirṇiktamanasaḥ pūtā vyutkrāntarajaso'malāḥ //

tapasā kṣemamadhvānaṃ gacchanti parameśvaram /
sannyāsaniratā nityaṃ ye ca brahmavido janāḥ //

tapaḥ pradīpa ityāhurācāro dharmasādhakaḥ /
jñānaṃ vai paramaṃ vidyātsannyāsaṃ tapa uttamam //

yastu veda nirābādhaṃ jñānaṃ tattvaviniścayāt /
sarvabhūtasthamātmānaṃ sa sarvavidihocyate //

yo vidvānsahavāsaṃ ca vivāsaṃ caiva paśyati /
tathaivekatvanānātve sa duḥkhātpratimucyate //

yo na kāmayate kiñcinna kiñcidavamanyate /
iha lokastha evaiṣa brahmabhūyāya kalpate //

pradhānaguṇatattvajñaḥ sarva bhūtavidhānavit /
nirmamo nirahaṅkāro mucyate nātra saṃśayaḥ //

nirdvandvo nirnamaskāro niḥsvadhākāra eva ca /
nirguṇaṃ nityamadvandvaṃ praśamenaiva gacchati //

hitvā guṇamayaṃ sarvaṃ karma jantuḥ śubhāśubham /
ubhe satyānṛte hitvā mucyate nātra saṃśayaḥ //

avyaktabījaprabhavo buddhiskandhamayo mahān /
mahāhaṅkāraviṭapa indriyāntarakoṭaraḥ //

mahābhūtaviśākhaśca viśeṣapratiśākhavān /
sadāpatraḥ sadāpuṣpaḥ śubhāśubhaphalodayaḥ //

ājīvyaḥ sarvabhūtānāṃ brahmavṛkṣaḥ sanātanaḥ /
enaṃ chittvā ca bhittvā ca tattvajñānāsinā budhaḥ //

hitvā saṅgamayānpāśānmṛtyujanmajarodayān /
nirmamo nirahaṅkāro mucyate nātra saṃśayaḥ //

dvāvimau pakṣiṇau nityau sankṣepau cāpyacetanau /
etābhyāṃ tu paro yonyaścetanāvānsa ucyate //

acetanaḥ satvasaṅkhyāvimuktaḥ sattvātparaṃ cetayate'ntarātmā /
sa kṣetravitsarvasaṅkhyātabuddhi- rguṇātigo mucyate sarvapāpaiḥ //