Mahabharata · Chapter 14.42

ahaṅkārātprasūtāni mahābhūtāni pañca vai /
pṛthivī vāyurākāśamāpo jyotiśca pañcamam //

teṣu bhūtāni muhyanti mahābhūteṣu pañcasu /
śabdasparśanarūpeṣu rasagandhakriyāsu ca //

mahābhūtavikārānte pralaye pratyupasthite /
sarvaprāṇabhūtāṃ dhīrā mahadutpadyate bhayam //

yadyasmājjāyate bhūtaṃ tatra tatpravilīyate /
līyante pratilomāni jāyante cottarottaram //

tataḥ pralīne sarvasminbhūte sthāvarajaṅgame /
smṛtimantastadā dhīrā na līyante kadācana //

śabdaḥ sparśastathā rūpaṃ raso gandhaśca pañcamaḥ /
kriyāḥ karaṇayuktāḥ syuranityā mohasañjñitāḥ //

lobhaprajanasambhūtā nirviśeṣā hyakiñcanāḥ /
māṃsaśoṇitasaṅghātā anyonyasyopajīvinaḥ //

bahirātmāna ityete dīnāḥ kṛpaṇajīvinaḥ /
prāṇāpānāvudānaśca samāno vyāna eva ca //

antarātmani cāpyete niyatāḥ pañca vāyavaḥ /
vāṅmanobuddhirityebhiḥ sārdhamaṣṭātmakaṃ jagat //

tvagghrāṇaśrotracakṣūṃṣi rasanā vākca saṃyatāḥ /
viśuddhaṃ ca mano yasya buddhiścāvyabhicāriṇī //

aṣṭau yasyāgnayo hyete dahante'haṅkriyāḥ sadā /
sa tadbrahma śubhaṃ yāti tasmādbhūyo na vidyate //

ekādaśa ca yānyāhurindriyāṇi viśeṣataḥ /
ahaṅkārātprasūtāni tāni vakṣyāmi nāmataḥ //

śrotraṃ tvak cakṣuṣī jihvā nāsikā caiva pañcamī /
pādau pāyurupasthaśca hastau vāgdaśamī bhavet //

indriyagrāma ityeṣa mana ekādaśaṃ bhavet /
etaṃ grāmaṃ jayetpūrvaṃ tato brahma prakāśate //

buddhīndriyāṇi pañcāhuḥ pañca karmendriyāṇi ca /
śrotrādīnyapi pañcāhurbuddhiyuktāni tattvataḥ //

aviśeṣāṇi cānyāni karmayuktāni yāni tu /
ubhayatra mano jñeyaṃ buddhistu dvādaśī bhavet //

ityuktānīndriyāṇyetānyekādaśa yathākramam /
manyante kṛtamityevaṃ viditvā tāni paṇḍitāḥ //

trīṇi sthānāni bhūtānāṃ caturthaṃ nopapadyate / sthalamāpastathā'kāśaṃ janma cāpi caturvidham //

aṇḍajodbhijjasaṃsvedajarāyujamathāpi ca /
caturdhā janma ityetadbhūtagrāmasya lakṣyate //

aparāṇyatha bhūtāni khecarāṇi tathaiva ca /
aṇḍajāni vijānīyātsarvāṃścaiva sarīsṛpān //

svedajāḥ kṛmayaḥ proktā jantavaśca yathākramam /
janmadvitīyamityetajjaghanyataramucyate //

bhittvā tu pṛthivīṃ yāni jāyante kālaparyayāt /
udbhijjāni ca tānyāhurbhūtāni dvijasattamāḥ //

dvipādabahupādāni tiryaggatimatīni ca /
jarāyujāni bhūtāni vikṛtānyapi sattamāḥ //

dvividhā khalu vijñeyā brahmayoniḥ sanātanā /
tapaḥ karma ca yatpuṇyamityeṣa viduṣāṃ nayaḥ //

vividhaṃ karma vijñeyamijyā dānaṃ ca tanmakhe /
vedasyādhyayanaṃ puṇyamiti vṛddhānuśāsanam //

etadyo vetti vidhivatsa muktaḥ syāddvijarṣabhāḥ /
vimuktaḥ sarvapāpebhya iti caiva nibodhata //

ataḥ paraṃ pravakṣyāmi sarvaṃ vividhamindriyam //

ākāśaṃ prathamaṃ bhūtaṃ śrotramadhyātmamucyate /
adhibhūtaṃ tathā śabdo diśaścātrādhidaivatam //

dvitīyaṃ mārutaṃ bhūtaṃ tvagadhyātmaṃ ca viśrutam /
spraṣṭavyamadhibhūtaṃ tu vidyuttatrādhidaivatam //

tṛtīyaṃ jyotirityāhuścakṣuradhyātmamiṣyate /
adhibhūtaṃ tato rūpaṃ sūryastatrādhidaivatam //

caturthamāpo vijñeyaṃ jihvā cādhyātmamiṣyate /
adhibhūtaṃ rasaścātra somastatrādhidaivatam //

pṛthivī pañcamaṃ bhūtaṃ ghrāṇaścādhyātmamucyate /
adhibhūtaṃ tathā gandho vāyustatrādidaivatam //

eṣu pañcasu bhūteṣu catuṣṭayavidhiḥ smṛtaḥ /
ataḥ paraṃ pravakṣyāmi sarvaṃ trividhamindriyam //

pādāvadhyātmamityāhurbrāhmaṇāstatvadarśinaḥ /
adhibhūtaṃ tu gantavyaṃ viṣṇustatrādhidaivatam //

avāggatirapānaśca pāyuradhyātmamiṣyate /
adhibhūtaṃ visargaśca mitrastatrādhidaivatam //

prajanaḥ sarvabhūtānāmupastho'dhyātmamucyate /
adhibhūtaṃ tathā śukraṃ daivataṃ ca prajāpatiḥ //

hastāvadhyātmamityāhuradyātmaviduṣo janāḥ /
adhibhūtaṃ ca karmāṇi śakrastatrādhidaivatam //

vaiśvadevī manaḥpūrvā vāgadhyātmamihocyate /
vaktavyamadhibhūtaṃ ca vahnistatrādhidaivatam //

adhyātmaṃ mana ityāhuḥ pañcabhūtātmacārakam /
adhibhūtaṃ ca saṅkalpaścandramāścādhidaivatam //

ahaṅkārastathā'dhyātmaṃ sarvasaṃsārakāraṇam /
abhimāno'dhibhūtaṃ ca rudrastatrādhidaivatam //

adhyātmaṃ buddhirityāhuḥ ṣaḍindriyavicāriṇī /
adhibhūtaṃ tu vijñeyamahastatrādhidaivatam //

yathāvadadhyātmavidhireṣa vaḥ kīrtito mayā /
jñānamasya hi dharmajñāḥ prāptaṃ jñānavatāmiha //

indriyāṇīndriyārthāśca mahābhūtāni pañca ca /
sarvāṇyetāni sandhāya manasā sampradhārayet //

kṣīṇe manasi sarvasminna janmasukhamiṣyate /
jñānasampannasattvānāṃ tatsukhaṃ viduṣāṃ matam //

ataḥ paraṃ pravakṣyāmi sūkṣmabhāvakarīṃ śivām /
nivṛttiṃ sarvabhūteṣu mṛdunā dāruṇena vā //

guṇāguṇamanāsaṅgamekacaryamanantaram /
etadbrāhmaṇajaṃ vṛttamāhurekapadaṃ sukham //

vidvānkūrma ivāṅgāni kāmānsaṃhṛtya sarvaśaḥ /
virajāḥ sarvato mukto yo naraḥ sa sukhī sadā //

kāmānātmani saṃyamya kṣīṇatṛṣṇaḥ samāhitaḥ /
sarvabhūtasuhṛnmaitro brahmabhūyāya kalpate //

indriyāṇāṃ nirodhena sarveṣāṃ viṣayaiṣiṇām /
munerjanapadatyāgādadhyātmāgniḥ samidhyate //

yathā'gnirindhanairiddho mahājyotiḥ prakāśate /
tathendriyanirodhena mahānātmā prakāśatade //

yadā paśyati bhūtāni prasannātmā'tmano hṛdi /
svayañjyotistadāsūkṣmātsūkṣmaṃ prāpnotyanuttamam //

agnī rūpaṃ rasaṃ sroto vāyuḥ sparśanameva ca / mahī gandhadharā ghrāṇamākāśaḥ śravaṇaṃ tathā /
dṛśyamādityamevāhuradhyātmaviduṣo janāḥ //

rogaśokasamāviṣṭaṃ pañcasrotaḥsamāvṛtam /
pañcabhūtasamāyuktaṃ navadvāraṃ dvidaivatam //

rajasvalamathādṛśyaṃ triguṇaṃ saptadhātukam /
saṃsargābhirataṃ mūḍhaṃ śarīramiti dhāraṇā //

duścaraṃ jīvaloke'sminsatvaṃ prati samāśritam /
etadeva hi loke'sminkālacakraṃ pravartate //

etanmahārṇavaṃ ghoramagādhaṃ mohasañjhitam /
visṛjansankṣipeccaiva mohayansvāpayañjagat //

kāmaṃ krodhaṃ bhayaṃ lobhamabhidrohamathānṛtam /
indriyāṇāṃ nirodhena satastyajati dustyajān //

yasyaite nirjitā loke triguṇāḥ pañcadhātavaḥ /
vyomni tasya paraṃ sthānamānantamatha lakṣyate //

pañcendriyamahākūlāṃ manaḥsrotobhayāvahām /
nadīṃ mohahradāṃ tīrtvā kāmakrodhāvubhau jayet //

sa sarvadoṣanirmuktastataḥ paśyati tatparam /
mano manasi sandhāya paśyannātmānamātmani //

sarvavitsarvabhūteṣu drakṣyatyātmānamātmani /
ekadhā bahudhā caiva vikurvāṇastatastataḥ //

dhruvaṃ paśyati rūpāṇi dīpāddīpaśataṃ yathā /
sa vai viṣṇuśca mitraśca varuṇo'gniḥ prajāpatiḥ //

sa hi dhātā vidhātā ca sa prabhuḥ sarvatomukhaḥ /
hṛdayaṃ sarvabhūtānāṃ mahānātmā prakāśate //

taṃ viprasaṅghāśca surāsurāśca yakṣāḥ piśācāḥ pitaro vayāṃsi /
rakṣogaṇā bhūtagaṇāśca sarve maharṣayaścaiva sadā stuvanti //