Mahabharata · Chapter 14.39

ataḥ paraṃ pravakṣyāmi tṛtīyaṃ guṇamuttamam /
sarvabhūtahitaṃ loke satāṃ dharmamaninditam //

ānandaḥ prītirudrekaḥ prākāśyaṃ sukhameva ca /
akārpaṇyamasaṃrambhaḥ santoṣaḥ śraddadhānatā //

kṣamā dhṛtirahiṃsā ca samatā satyamārjavam /
akrodhaścānasūyā ca śaucaṃ dākṣyaṃ parākramaḥ //

mudhājñānaṃ mudhāvṛttaṃ mudhāsevā mudāśramaḥ /
evaṃ yo yuktadharmaḥ syātsomutrātyantamaśnute //

nirmamo nirahaṅkāro nirāśīḥ sarvataḥ samaḥ /
akāmahata ityeva satāṃ dharmaḥ sanātanaḥ //

viśrambho hrīstitikṣā ca tyāgaḥ śaucamatandritā /
ānṛśaṃsyamasammoho dayā bhūteṣvapaiśunam //

harṣastuṣṭirvismayaśca vinayaḥ sādhuvṛttitā /
śāntikarmaviśuddhiśca bhāvaśuddhirvimocanam //

upekṣā brahmacaryaṃ ca parityāgaśca sarvaśaḥ /
nirmamatvamanāśīṣṭvamaparikṣatadharmatā //

mudhādānaṃ mudhāyajño mudhādhītaṃ mudhāvratam /
mudhāpratigrahaścaiva madhādhramo mudhātapaḥ //

evaṃvṛttāstu ye kecilloke'sminsatvasaṃśrayāḥ /
brāhmaṇā brahmayonisthāste dhīrāḥ sādhudarśinaḥ //

hitvā sarvāṇi pāpāni niḥśokā hyajarāmarāḥ /
divyaṃ prāpya tu te dhīrāḥ kurvate vai tatastanūḥ //

īśitvaṃ ca vaśitvaṃ ca laghutvaṃ cāṇutā tathā /
vikurvate mahātmāno devāstridivagā iva //

ūrdhvasrotasa ityete devā vaikārikāḥ smṛtāḥ /
vikurvantaḥ prakṛtyā vai divaṃ prāptāstatastataḥ //

yadyadicchanti tatsarvaṃ bhajante vibhajanti ca / ityetatsātvikaṃ vṛttaṃ kathitaṃ vo dvijarṣabhāḥ /
etadvijñāya labhate vidhivadyadyadicchati //

prakīrtitāḥ sattvaguṇā viśeṣato yathāvaduktaṃ guṇavṛttameva ca /
narastu yo veda guṇānimānsadā guṇānsa bhuṅkte na guṇaiḥ sa yujyate //