મહાભારત · અધ્યાય 14.39

અતઃ પરં પ્રવક્ષ્યામિ તૃતીયં ગુણમુત્તમમ્ ।
સર્વભૂતહિતં લોકે સતાં ધર્મમનિન્દિતમ્ ॥

આનન્દઃ પ્રીતિરુદ્રેકઃ પ્રાકાશ્યં સુખમેવ ચ ।
અકાર્પણ્યમસંરમ્ભઃ સન્તોષઃ શ્રદ્દધાનતા ॥

ક્ષમા ધૃતિરહિંસા ચ સમતા સત્યમાર્જવમ્ ।
અક્રોધશ્ચાનસૂયા ચ શૌચં દાક્ષ્યં પરાક્રમઃ ॥

મુધાજ્ઞાનં મુધાવૃત્તં મુધાસેવા મુદાશ્રમઃ ।
એવં યો યુક્તધર્મઃ સ્યાત્સોમુત્રાત્યન્તમશ્નુતે ॥

નિર્મમો નિરહઙ્કારો નિરાશીઃ સર્વતઃ સમઃ ।
અકામહત ઇત્યેવ સતાં ધર્મઃ સનાતનઃ ॥

વિશ્રમ્ભો હ્રીસ્તિતિક્ષા ચ ત્યાગઃ શૌચમતન્દ્રિતા ।
આનૃશંસ્યમસમ્મોહો દયા ભૂતેષ્વપૈશુનમ્ ॥

હર્ષસ્તુષ્ટિર્વિસ્મયશ્ચ વિનયઃ સાધુવૃત્તિતા ।
શાન્તિકર્મવિશુદ્ધિશ્ચ ભાવશુદ્ધિર્વિમોચનમ્ ॥

ઉપેક્ષા બ્રહ્મચર્યં ચ પરિત્યાગશ્ચ સર્વશઃ ।
નિર્મમત્વમનાશીષ્ટ્વમપરિક્ષતધર્મતા ॥

મુધાદાનં મુધાયજ્ઞો મુધાધીતં મુધાવ્રતમ્ ।
મુધાપ્રતિગ્રહશ્ચૈવ મધાધ્રમો મુધાતપઃ ॥

એવંવૃત્તાસ્તુ યે કેચિલ્લોકેઽસ્મિન્સત્વસંશ્રયાઃ ।
બ્રાહ્મણા બ્રહ્મયોનિસ્થાસ્તે ધીરાઃ સાધુદર્શિનઃ ॥

હિત્વા સર્વાણિ પાપાનિ નિઃશોકા હ્યજરામરાઃ ।
દિવ્યં પ્રાપ્ય તુ તે ધીરાઃ કુર્વતે વૈ તતસ્તનૂઃ ॥

ઈશિત્વં ચ વશિત્વં ચ લઘુત્વં ચાણુતા તથા ।
વિકુર્વતે મહાત્માનો દેવાસ્ત્રિદિવગા ઇવ ॥

ઊર્ધ્વસ્રોતસ ઇત્યેતે દેવા વૈકારિકાઃ સ્મૃતાઃ ।
વિકુર્વન્તઃ પ્રકૃત્યા વૈ દિવં પ્રાપ્તાસ્તતસ્તતઃ ॥

યદ્યદિચ્છન્તિ તત્સર્વં ભજન્તે વિભજન્તિ ચ । ઇત્યેતત્સાત્વિકં વૃત્તં કથિતં વો દ્વિજર્ષભાઃ ।
એતદ્વિજ્ઞાય લભતે વિધિવદ્યદ્યદિચ્છતિ ॥

પ્રકીર્તિતાઃ સત્ત્વગુણા વિશેષતો યથાવદુક્તં ગુણવૃત્તમેવ ચ ।
નરસ્તુ યો વેદ ગુણાનિમાન્સદા ગુણાન્સ ભુઙ્ક્તે ન ગુણૈઃ સ યુજ્યતે ॥