Mahabharata · Chapter 14.37

tadavyaktamanudriktaṃ sarvavyāpi dhruvaṃ sthiram /
navadvāraṃ puraṃ vidyāttriguṇaṃ pañcadhātukam //

ekādaśaparikṣepaṃ manovyākaraṇātmakam /
buddhisvāmikamityetatparamekādaśaṃ bhavet //

trīṇi srotāṃsi yānyasminnāpyāyante punaḥpunaḥ /
pranāḍyastisra evaitāḥ pravarntate guṇātmikāḥ //

tamo rajastathā satvaṃ guṇānetānpracakṣate /
anyonyamithunāḥ sarve tathā'nyonyānujīvinaḥ //

anyonyāpāśrayāścāpi tathā'nyonyānuvartinaḥ /
anyonyavyatiṣaktāśca triguṇāḥ pañcadhātavaḥ //

tamaso mithunaṃ satvaṃ satvasya mithunaṃ rajaḥ /
rajasaścāpi satvaṃ syātsatvasya mithunaṃ tamaḥ //

niyamyate tamo yatra rajastatra nivartate /
niyamyate rajo yatra satvaṃ tatra pravartate //

naiśātmakaṃ tamo vidyāttriguṇaṃ mohasañjñitam / adharmalakṣaṇaṃ caiva niyataṃ pāpakarmasu /
tāmasaṃ rūpametattu dṛśyate cāpi saṅgatam //

prakṛtyātmakamevāhū rajaḥ paryāyakārakam /
sattve tu sarvabhūteṣu dṛśyamutpattilakṣaṇam //

prakāśaṃ sarvabhūteṣu lāghavaṃ śraddhadhānatā /
sātvikaṃ rūpamevaṃ tu lāghavaṃ sādhusammitam //

eteṣāṃ guṇatattvāni vakṣyante tattvahetubhiḥ /
samāsavyāsayuktāni tattvatastāni bodhata //

sammoho jñānamatyāgaḥ karmaṇāmavinirṇayaḥ /
svapnaḥ stambho bhayaṃ lobhaḥ śokaḥ sukṛtadūṣaṇam //

asmṛtiścāvipākaśca nāstikyaṃ bhinnavṛttitā /
nirviśeṣatvamandhatvaṃ jaghanyaguṇavṛttitā //

akṛte kṛtamānitvamajñāne jñānamānitā /
amaitrī vikṛto bhāvo hyaśraddhā mūḍhabhāvanā //

anārjavamasañjñatvaṃ karma pāpamacetanā /
gurutvaṃ sannabhāvatvamavaśitvamavāggatiḥ //

sarva ete guṇā vṛttāstāmasāḥ samprakīrtitāḥ /
ye cānye vihitā bhāvā loke'sminbhāvasañjñitāḥ //

tatratatra niyamyante sarve te tāmasā guṇāḥ /
parivādakathā nityaṃ mevabrāhmaṇavairitā //

atyāgaścātimānaśca moho manyustathā'kṣamā /
matsaraścaiva bhūteṣu tāmasaṃ vṛttamiṣyate //

vṛthārambhā hi ye kecidvṛthā dānāni yāni ca /
vṛthābhakṣaṇamityetattāmasaṃ vṛttamiṣyate //

ativādo'titikṣā ca mātsaryamabhimānitā /
aśraddadhānatā caiva tāmasaṃ vṛttamiṣyate //

evaṃvidhāśca ye kecilloke'sminpāpakarmiṇaḥ /
manuṣyā bhinnamaryādāste sarve tāmasāḥ smṛtāḥ //

teṣāṃ yonīḥ pravakṣyāmi niyatāḥ pāpakarmiṇām / avāṅnirayabhāvā ye tiryaṅnirayagāminaḥ /

sthāvarāṇi ca bhūtāni paśavo vāhanāni ca /
kravyādā dandaśūkāśca kṛmikīṭavihaṅgamāḥ //

abjātā jantavaścaiva sarve cāpi catuṣpadāḥ /
unmattā badhirā mūkā ye cānye pāparogiṇaḥ //

magnāstamasi durvṛttāḥ svakarmakṛtalakṣaṇāḥ /
avāksrotasa ityete magnāstamasi tāmasāḥ //

teṣāmutkarṣamudrekaṃ vakṣyāmyahamataḥ param /
yathā te sukṛtāṃ lokām̐llabhante puṇyakarmiṇaḥ //

anyathā pratipannāstu vivṛddhā ye ca karmasu /
svakarmaniratānāṃ ca brāhmaṇānāṃ śubhaiṣiṇām //

saṃskāreṇordhvamāyānti yatamānāḥ salokatām /
svarge gacchanti devānāmityeṣā vaidikī śrutiḥ //

anyathā pratipannāste vibuddhāḥ sveṣu karmasu /
punarāvṛttidharmāṇaste bhavantīha mānuṣāḥ //

pāpayoniṃ samāpannāścaṇḍālā mūkacūcukāḥ //
varṇānparyāyaśaścāpi prāpnuvantyuttarottaram //

śūdrayonimatikramya ye cānye tāmasā guṇāḥ /
srotomadhye samāgamya vartante tāmase guṇe //

abhiṣvaṅgastu kāmeṣu mahāmoha iti smṛtaḥ /
ṛṣayo munayo devā muhyantyatra sukhepsavaḥ //

tamomoho mahāmohastāmisro hyandhasañjñitaḥ /
maraṇaṃ tvandhatāmisrastāmisraḥ krodha ucyate //

varṇato guṇataścaiva yonitaścaiva tattvataḥ /
sarvametatamo viprāḥ kīrtitaṃ vo yathāvidhi //

ko nvetadbudhyate sādhu ko nvetatsādhu paśyati /
atattve tattvadarśī yastamasastacca lakṣaṇam //

tamoguṇā bahuvidhāḥ prakīrtitā yathāvaduktaṃ ca tamaḥ parāvaram /
naro hi yo veda guṇānimānsadā sa tāmasaiḥ sarvaguṇaiḥ pramucyate //