Mahabharata · Chapter 14.33

atrāpyudāharantīmamitihāsaṃ purātanam /
brāhmaṇasya ca saṃvādaṃ janakasya ca bhāmini //

brāhmaṇaṃ janako rājā sannaṃ kasmiṃścidāgasi /
viṣaye me na vastavyamiti śiṣṭyarthamabravīt //

ityuktaḥ pratyuvācātha brāhmaṇo rājasattamam /
ācakṣva viṣayaṃ rājanyāvāṃstava vaśe sthitaḥ //

so'nyasya viṣaye rājño vastumicchāmyahaṃ vibho /
vacaste kartumicchāmi yathāśāstraṃ mahīpate //

ityuktastu tadā rājā brāhmaṇena yaśasvinā /
muhuruṣṇaṃ viniḥsvasya na kiñcitpratyabhāṣata //

tamāsīnaṃ dhyāyamānaṃ rājānamamitaujasam /
kaśmalaṃ sahasā'gacchadbhānumantamiva grahaḥ //

samāśvāsya tato rājā vigate kaśyame tadā /
tato mūhūrtādiva taṃ brāhmaṇaṃ vākyamabravīt //

pitṛpaitāmahe rājye vaśye janapade sati /
viṣayaṃ nādhigacchāmi vicinvanpṛthivīmaham //

nādhyagacchaṃ yadā pṛthvyāṃ mithilā mārgitā mayā /
nādhyagacchaṃ yadā tasyāṃ svaprajā mārgitā mayā //

nādhyagacchaṃ yadā tasyāṃ tadā me kaśmalo'bhavat /
tato me kaśmalasyānte matiḥ punarupasthitā //

tadā na viṣayaṃ manye sarvo vā viṣayo mama /
ātmā'pi cāyaṃ na mama sarvā vā pṛthivī mama //

yathā mama tathā'nyeṣāmiti manye dvijottama /
uṣyatāṃ yāvadutsāho bhujyatāṃ yāvadiṣyate //
brāhmaṇa uvāca /

pitṛpaitāmahe rājye vaśye janapade sati /
brūhi kāṃ matimāsthāya mamatvaṃ varjitaṃ tvayā //

kāṃ vai buddhiṃ samāśritya sarvo vai viṣayastava /
nāvaiṣi viṣayaṃ yena sarvo vā viṣayastava //
janaka uvāca /

antavanta ihārambhā viditāḥ sarvakarmasu /
nādhyagacchamahaṃ tasmānmamedamiti yadbhavet //

kasyedamiti kasya svamiti vedavacastathā /
nādhyagacchamahaṃ buddhyā mamedamiti yadbhavet //

etāṃ buddhiṃ samāśritya mamatvaṃ varjitaṃ mayā /
śṛṇu buddhiṃ ca yāṃ jñātvā sarvatra viṣayo mama //

nāhamātmārthamicchāmi gandhānghrāṇagatānapi /
tasmānme nirjitā bhūmirvaśe tiṣṭhati nityadā //

nāhamātmārthamicchāmi rasānāsye'pi vartataḥ /
āpo me nirjitāstasmādvaśe tiṣṭhanti nityadā //

nāhamātmārthamicchāmi rūpaṃ jyotiśca cakṣuṣaḥ /
tasmānme nirjitaṃ jyotirvaśe tiṣṭhati nityadā //

nāhamātmārthamicchāmi sparśāṃstvaci gatāśca ye /
tasmānme nirjito vāyurvaśe tiṣṭhati nityadā //

nāhamātmārthamicchāmi śabdāñśrotragatānapi /
ākāśaṃ me jitaṃ tasmādvaśe tiṣṭhati nityadā //

nāhamātmārthamicchāmi mano nityaṃ manontare /
mano me nirjitaṃ tasmādvaśe tiṣṭhati nityadā //

devebhyaśca pitṛbhyaśca bhūtebhyo'tithibhiḥ saha /
ityarthaṃ sarva eveti samārambhā bhavanti vai //

tataḥ prahasya janakaṃ brāhmaṇaḥ punarabravīt /
tvajjijñāsārthamadyeha viddhi māṃ dharmamāgatam //

tvamasya brahminābhasya durvārasyānivartinaḥ /
satvaneminiruddhasya cakrasyaikaḥ pravartakaḥ //