Mahabharata · Chapter 14.31

atrāpyudāharantīmamitihāsaṃ purātanam /
śrutvā ca tattathā kāryaṃ bhavatā dvijasattama //

alarko nāma rājarṣirabhavatsumahātapāḥ /
dharmajñaḥ satyavādī ca mahātmā sudṛḍhavrataḥ //

sa sāgarāntāṃ dhanuṣā vinirjitya mahīmimām /
kṛtvā suduṣkaraṃ karma manaḥ sūkṣme samādadhe //

sthitasya vṛkṣamūle'tha tasya cintā babhūva ha /
utsṛya sumahadrājyaṃ sūkṣmaṃ prati mahāmate //
alarka uvāca /

manaso me balaṃ jātaṃ mano jitvā dhruvo jayaḥ /
anyatra bāṇānasyāmi śatrubhiḥ parivāritaḥ //

yadidaṃ cāpalātkarma sarvānmartyāṃścikīrṣati /
manaḥ prati sutīkṣṇāgrānahaṃ mokṣyāmi sāyakān //
mana uvāca /

neme bāṇāstariṣyanti māmalarka kathañcana /
tavaiva marma bhetsyanti bhinnamarmā mariṣyasi //

anyānbāṇānsamīkṣasva yaistvaṃ māṃ sūdayiṣyasi /
tatchrutvā sa vicintyātha tato vacanamabravīt //

āghrāya subahūngandhāṃstāneva pratigṛdhyati /
tasmāddhrāṇaṃ prati śarānpratimokṣyāmyahaṃ śitān //
ghrāṇa uvāca /

neme bāṇāstariṣyanti māmalarka kathañcana /
tavaiva marma bhetsyanti bhinnamarmā mariṣyasi //

anyānyāṇānsamīkṣasva yaistvaṃ māṃ sūdayiṣyasi /
tacchrutvā sa vicintyātha tato vacanamabravīt //

iyaṃ svādūnrasānbhuktvā tāneva prati gṛdhyati /
tasmājjihvāṃ prati śarānpratimokṣyāmyahaṃ śitān //
jihvovāca /

neme vāṇāstariṣyanti māmalarka kathañcana /
tavaiva marma bhetsyanti tato hāsyasi jīvitam //

anyānvāṇānsamīkṣasva yaistvaṃ māṃ sūdayiṣyasi /
tacchrutvā sa vicintyātha tato vacanamabravīt //

spṛṣṭvā tvagvividhānsparśāṃstāneva pratigṛdhyati /
tasmāttvacaṃ pāṭayiṣye vividhaiḥ kaṅkapatribhiḥ //
tvaguvāca /

neme bāṇāstariṣyanti māmalarka kathañcana /
tavaiva marma bhetsyanti bhinnamarmā mariṣyasi //

anyānbāṇānsamīkṣasva yaistvaṃ māṃ sūdayiṣyasi /
tacchrutvā sa vicintyātha tato vacanamabravīt //

śrutvā tu vividhāñśabdāṃstāneva pratigṛdhyati /
tasmācchrotraṃ prati śarānprati muñcāmyahaṃ śitān //
śrotramuvāca /

neme bāṇāstariṣyanti māmalarka kathañcana /
tavaiva marma bhetsyanti tato hāsyati jīvitam //

anyānbāṇānsamīkṣasva yaistvaṃ māṃ sūdayiṣyasi /
tacchrutvā sa vicintyātha tato vacanamabravīt //

dṛṣṭvā rūpāṇi bahuśastānyeva pratigṛdhyati /
tasmāccakṣurhaniṣyāmi niśitaiḥ sāyakairaham //
cakṣuruvāca /

neme bāṇāstariṣyanti māmalarka kathañcana /
tavaiva marma bhetsyanti bhinnamarmā mariṣyasi //

anyānbāṇānsamīkṣasva yaistvaṃ māṃ sūdayiṣyati tacchrutvā sa vicintyātha tato vacanamabravīt //

iyaṃ niṣṭhā bahuvidhā prajñayā tvadyavasyati /
tasmādbuddhiṃ prati śarānpratimokṣyāmyahaṃ śitān //
buddhiruvāca /

neme bāṇāstariṣyanti māmalarka kathañcana / tavaiva marma bhetsyanti bhinnamarmā mariṣyasi /
anyānbāṇānsamīkṣasva yaistvaṃ māṃ sūdayiṣyasi //
pitara ūcuḥ /

tato'larkastapo ghoraṃ tatraivāsthāya duṣkaram /
nādhyagacchatparaṃ śaktyā bāṇameteṣu saptasu //

susamāhitacetāstu sa tato'cintayatprabhuḥ / sa vicintya ciraṃ kālamalarko dvijasattama /
nādhyagacchatparaṃ śreyo yogānmatimatāṃvaraḥ //

sa ekāgraṃ manaḥ kṛtvā niścalo yogamāsthitaḥ /
indriyāṇi jaghānāśu bāṇenaikena vīryavān //

yogenātmānamāviśya siddhiṃ paramikāṃ gataḥ /
vismitaścāpi rājarṣirimāṃ gāthāṃ jagāda ha //

aho kaṣṭaṃ yadasmābhiḥ sarvaṃ bāhyamanuṣṭhitam / bhogatṛṣṇāsamāyuktaiḥ pūrvaṃ rājyamupāsitam /
iti paścānmayā jñātaṃ yogānnāsti paraṃ sukham //

iti tvamanujānīhi rāma mā kṣatriyānvadhīḥ /
taṣo ghoramupātiṣṭha tataḥ śreyo'bhipatsyase //

ityuktaḥ pitṛbhiḥ sotha tapo ghoraṃ samāsthitaḥ /
jāmadagnyo mahābhāge siddhiṃ ca paramāṃ gataḥ //