Mahabharata · Chapter 14.30

atrāpyudāharantīmamitihāsaṃ purātanam /
kārtavīryasya saṃvādaṃ samudrasya ca bhāmini //

kārtavīryārjuno nāma rājā bāhusahasravān /
yena sāgaraparyantā dhanuṣā nirjitā mahī //

sa kadācitsamudrānte vicaranbaladarpitaḥ /
avīkiraccharaśataiḥ samudramiti naḥ śrutam //

taṃ samudro namaskṛtya kṛtāñjaliruvācaha /
mā muñca vīra nārācānbrūhi kiṃ karavāṇi te //

madāśrayāṇi bhūtāni tvadvisṛṣṭairmaheṣubhiḥ /
vadhyante rājaśārdūla tebhyo dehyabhayaṃ vibho //
arjuna uvāca /

matsamo yadi sangrāme śarāsanadharaḥ kvacit /
vidyate taṃ samācakṣva yaḥ samo me mahāmṛdhe //
samudra uvāca /

maharṣirjamadagniste yadi rājanpurā śrutaḥ /
tasya putrastavātithyaṃ yathāvatkartumarhati //

tataḥ sa rājā prayayau krodhena mahatā vṛtaḥ /
sa tamāśramamāgamya rāmamevānvapadyata //

sa rāmapratikūlāni cakāra saha bandhubhiḥ /
āyāsaṃ janayāmāsa rāmasya ca mahātmanaḥ //

tatastejaḥ prajajvāla rāmasyāmitatejasaḥ /
pradahanripusainyāni tadā kamalalocane //

tataḥ paraśumādāya sa taṃ bāhusahasriṇam /
cincheda sahasā rāmo bahuśākhamiva drumam //

taṃ hataṃ patitaṃ dṛṣṭvā sametāḥ sarvabāndhavāḥ /
asīnādāya śaktīrśca bhārgavaṃ paryadhāvayan //

rāmo'pi dhanurādāya rathamāruhya satvaraḥ /
visṛjañśaravarṣāṇi vyadhamatpārthivaṃ balam //

tatastu kṣatriyāḥ kecijjamadagniṃ nihatya ca /
viviśurgiridurgāṇi mṛgāḥ siṃhārditā iva //

teṣāṃ svavihitaṃ karma tadbhayānnānutiṣṭhatām /
prajā vṛṣalatāṃ prāptā brāhmaṇānāmadarśanāt //

evaṃ te draviḍā'bhīrāḥ puṇḍrāśca śabaraiḥ saha /
vṛṣalatvaṃ parigatā vyutthānātkṣatradharmataḥ //

tataśca hatavīrāsu kṣatriyāsu punaḥ punaḥ /
dvijairutpāditaṃ kṣatraṃ jāmadagnyo nyakṛntata //

ekaviṃśatime yāte rāmaṃ vāgaśarīriṇī /
divyā provāca madhurā sarvalokapariśrutā //

rāmarāma nivartasva kaṃ guṇaṃ tāta paśyasi /
kṣatrabandhūnimānprāṇairviprayojya punaḥ punaḥ //

tathaiva taṃ mahātmānamṛcīkapramukhāstadā /
pitāmahā mahābhāga nivartasvetyathābruvan //

piturvadhamamṛṣyaṃstu rāmaḥ provāca tānṛṣīn /
nārhantīha bhavanto māṃ nivārayitumityuta //
pitara ūcuḥ /

nārhase kṣatrabandhūṃstvaṃ nihantuṃ jayatāṃvara /
neha yuktaṃ tvayā hantuṃ brāhmaṇena satā nṛpān //