Mahabharata · Chapter 14.20

yaḥ syādekānta āsīnastūṣṇīṃ kiñcidacintayan /
pūrvampūrvaṃ parityajya sa nirārambhako bhavet //

sarvamitraḥ sarvasahaḥ śame rakto jitendriyaḥ /
vyapetabhayamanyuśca kāmahā mucyate naraḥ //

ātmavatsarvabhūteṣu yaścarenniyataḥ śuciḥ / nityameva yathānyāyaṃ yaścarenniyatendriyaḥ /
amānī nirabhīmānaḥ sarvato mukta eva saḥ //

jīvitaṃ maraṇaṃ cobhe sukhaduḥkhe tathaiva ca /
lābhālābhe priyadveṣye yaḥ samaḥ sa ca mucyate //

na kasyacitspṛhayate nāvajānāti kicana /
nirdvandvo vītarāgātmā sarvathā mukta eva saḥ //

anamitraśca nirbandhuranapatyaśca yaḥ kvacit /
tyaktadharmārthakāmaśca nirārāṅkṣī ca mucyate //

naiva dharmī na cādharmī pūrvopacitahā ca yaḥ /
kṣīṇadhātuḥ praśāntātmā nirdvandvaḥ sa vimucyate //

akarmā cāvikāṅkṣaśca paśyejjagadaśāśvatam /
asvastamavaśaṃ nityaṃ janmamṛtyujarāyutam //

vairāgyabuddhiḥ satataṃ tāvaddoṣavyapekṣakaḥ /
ātmabandhavinirmokṣaṃ sa karotyacirādiva //

agandhamarasasparśamaśabdamaparigraham /
arūpamanabhijñeyaṃ dṛṣṭvā'tmānaṃ vimucyate //

pañcabhūtaguṇairhīnamamūrtimadalepakam /
aguṇaṃ guṇabhoktāraṃ yaḥ paśyati sa mucyate //

vihāya sarvasaṅkalpānbuddhyā śārīramānasān /
śanairnirvāṇamāpnoti nirindhana ivānalaḥ //

sarvasaṃskāranirmukto nirdvandvo niṣparigrahaḥ /
tapasā indriyagrāmaṃ yaścarenmukta eva saḥ //

vimuktaḥ sarvasaṃskāraistato brahmi sanātanam /
paramāpnoti saṃśāntamacalaṃ nityamakṣaram //

ataḥ paraṃ pravakṣyāmi yogaśāstramanuttamam /
yajjñātvā siddhamātmānaṃ loke paśyanti yoginaḥ //

tasyopadeśaṃ vakṣyāmi yathāvattannibodha me /
yairyogairbhāvayannityaṃ paśyatyātmānamātmani //

indriyāṇi tu saṃhṛtya mana ātmani dhārayet /
tīvraṃ taptvā tapaḥ pūrvaṃ mokṣayogaṃ samācaret //

tapasvī nityasaṅkalpo dambhāhaṅkāravarjitaḥ /
manīṣī manasā vipraḥ paśyatyātmānamātmani //

sa cecchakrotyayaṃ sādhuryoktumātmānamātmani /
tata ekāntaśīlaḥ sa paśyatyātmānamātmani //

saṃyataḥ satataṃ yukta ātmavānvijitendriyaḥ /
yathā ya ātmanā'tmānaṃ samprayuktaḥ prapaśyati //

yathāhi puruṣaḥ svapne dṛṣṭvā paśyatyasāviti /
tathārūpamivātmānaṃ sādhuyuktaḥ prapaśyati //

iṣīkāṃ ca yathā muñjātkaścinniṣkṛṣya darśayet /
yogī niṣkṛṣya cātmānaṃ tathā paśyati dehataḥ //

muñjaṃ śarīramityāhuriṣīkāmātmani śritām /
etannidarśanaṃ proktaṃ yogavidbhiranuttamam //

yadā hi yuktamātmānaṃ samyak paśyati dehabhūt /
na tasyeheśvaraḥ kaścittrailokyasyāpi yaḥ prabhuḥ //

anyānyāścaiva tanavo yatheṣṭaṃ pratipadyate /
vinirbhidya jarāṃ mṛtyuṃ na śocati na hṛṣyati //

devānāmapi devatvaṃ yuktaḥ kārayate vaśī /
brahma cāvyayamāpnoti hitvā dehamaśāśvatam //

vinaśyatsu ca lokeṣu na bhayaṃ tasya jāyate /
kliśyamāneṣu bhūteṣu na sa kliśyati kenacit //

duḥkhaśokamalairghoraiḥ saṅgasnehasamudbhavaiḥ /
na vicālyati yuktātmā nispṛhaḥ śāntamānasaḥ //

nainaṃ śastrāṇi vidhyante na mṛtyuścāsya vidyate /
nātaḥ sukhataraṃ kiñcilloke kvacana dṛśyate //

samyagyuktvā sa ātmānamātmanyeva pratiṣṭhite /
vinivṛttajarāduḥkhaḥ sukhaṃ svapiti cāpi saḥ //

dehānyatheṣṭamabhyeti hitvemāṃ mānuṣīṃ tanum /
nirvedastu na kartavyo bhuñjānena kathañcana //

samyagyukto yadātmānamātmanyeva prapaśyati /
tadaiva na spṛhayate sākṣādapi śatakratoḥ //

yogamekāntaśīlastu yathā vindati tacchṛṇu /
dṛṣṭapūrvāṃ diśaṃ cintya yasminsannivasetpare //

purasyābhyantare tasya manaḥ sthāpyaṃ na bāhyataḥ / purasyābhyantare tiṣṭhanyasminnāvasathe vaseta /
tasminnāvasathe dhāryaṃ sabādyābhyantaraṃ manaḥ //

pracintyāvasathe kṛtsnaṃ yasminkāye sa paśyati /
tasminkāye manaścāsya na ca kiñcana bāhyataḥ //

sanniyamyendriyagrāmaṃ nirghoṣaṃ nirjane vane /
kāyamabhyantaraṃ kṛtsnamekāgraḥ paricintayet //

intāṃstālu ca jihvāṃ ca galaṃ grīvāṃ tathaiva ca /
hṛdayaṃ cintayeccāpi tathā hṛdayabandhanam //

ityuktaḥ sa mayā śiṣyo medhāvī madhusūdana /
papraccha punarevemaṃ mokṣadharmaṃ sudurvacam //

bhuktaṃ bhuktamidaṃ koṣṭhe kathamannaṃ vipacyate /
kathaṃ rasatvaṃ vrajati śoṇitatvaṃ kathaṃ punaḥ //

tathā māṃsaṃ ca medaśca snāyvasthīni ca poṣayet /
kathametāni sarvāṇi śarīrāṇi śarīriṇām //

vardhante vardhamānasya vardhate ca kathaṃ balam /
nirāsanaṃ niṣkasanaṃ malānāṃ ca pṛthak pṛthak //

kuto vā'yaṃ praśvasiti ucchvasityapi vā punaḥ /
kaṃ ca deśamadhiṣṭhāya tiṣṭhatyātmā'yamātmani //

jīvaḥ kathaṃ vahati ca ceṣṭamānaḥ kalevaram /
kiṃvarṇaṃ kīdṛśaṃ caiva niveśayati vai manaḥ //

yāthātathyena bhagavanvaktumarhasi me'nagha /
iti samparipṛṣṭo'haṃ tena vipreṇi mādhava //

pratyabravaṃ mahābāho yathāśrutamarindama /
yathā svakoṣṭhe prakṣipya bhāṇḍaṃ bhāṇḍamanā bhavet //

tathā svakāye prakṣipya manodvārairaniścalaiḥ /
ātmānaṃ tatra mārgeta pramādaṃ parivarjayet //

evaṃ satatamudyuktaḥ prītātmā nacirādiva /
āsādayati tadbrahma yaddṛṣṭvā syātpradhānavit //

na tvasau cakṣuṣā grāhyo na ca sarvairapīndriyaiḥ /
manasaiva pradīpena mahānātmā pradṛśyate //

sarvataḥ pāṇipādāntaḥ sarvatokṣiśiromukhaḥ /
sarvataḥ śrutimām̐lloke sarvamāvṛtya tiṣṭhati //

jīvo niṣkrāntamātmānaṃ śarīrātsamprapaśyati /
sa tamutsṛjya dehaṃ svaṃ pārayedbrahma kevalam //

ātmānamālokayati manasā prahasanniva /
tadevamāśrayaṃ kṛtvā mokṣaṃ yāti tato mayi //

idaṃ sarvarahasyaṃ te mayā proktaṃ dvijottama /
āpṛcche sādhayiṣyāmi gaccha vipra yathāsukham //

ityuktaḥ sa tadā kṛṣṇa mayā śiṣyo mahātapāḥ /
agacchata yathākāmaṃ brāhmaṇaśchinnasaṃśayaḥ //
vāsudeva uvāca /

ityuktvā sa tadā vākyaṃ māṃ pārtha dvijasattamaḥ /
mokṣadharmāśritaṃ samyak tatraivāntaradhīyata //

kaccidetattvayā pārtha śrutmekāgracetasā /
tadāpi hi rathasthastvaṃ śrutavānetadeva hi //

naitatpārtha suvijñeyaṃ vyāmiśreṇeti me matiḥ /
nareṇākṛtasaṅgena viśuddhenāntarātmanā //

surahasyamidaṃ proktaṃ devānāṃ bharatarṣabha /
kaccittvidaṃ śrutaṃ pārtha manuṣyeṇeha karhicit //

na hyetacchrotumarho'nyo manuṣyastvāmṛte'nagha /
naitadanyeni vijñeyaṃ vyāmiśreṇāntarātmanā //

kriyāvadbhirhi kaunteya devalokaḥ samāvṛtaḥ /
na caitadiṣṭaṃ devānāṃ martyairupari vartanam //

parā hi sā gatiḥ pārtha yattadbrahma sanātanam /
yatrāmṛtatvaṃ prāpnoti tyaktvā duḥkhaṃ sadā sukhī //

imaṃ dharmaṃ samāsthāya ye'pi syuḥ pāpayonayaḥ /
striyo vaiśyāstathā śūdrāste'pi yānti parāṃ gatim //

kiṃ punarbrahmaṇāḥ pārtha kṣatriyā vā bahuśrutāḥ /
svadharmaratayo nityaṃ brahmalokaparāyaṇaḥ //

hetumaccaitaduddiṣṭamupāyāścāsya sādhane /
siddhiṃ phalaṃ ca mokṣaśca duḥkhasya ca vinirṇiyaḥ //

nātaḥ paraṃ sukhaṃ tvanyatkiñcitsyādbharatarṣabha /
śrutavāñśraddadhānaśca parākrāntaśca pāṇḍava //

yaḥ parityajyate martyo lokasāramasaravat /
etairupāyaiḥ sa kṣipraṃ parāṃ gatimavāpnute //

etāvadeva vaktavyaṃ nānto bhūyosti kiñcana /
ṣaṇmāsānnityayuktasya yogaḥ pārtha pravartate //