Mahabharata · Chapter 14.19

śubhānāmaśubhānāṃ ca neha nāśosti karmaṇām /
prāpyaprāpyānupacyante kṣetrekṣetre tathātathā //

yathā prasūyamānastu phalī dadyātphalaṃ bahu /
tathā syādvipulaṃ puṇyaṃ śuddhena manasā kṛtam //

pāpaṃ cāpi tathaiva syātpāpena manasā kṛtam /
purodhāya mano hīha karmaṇyātmā pravartate //

yathā karmasamāviṣṭaḥ kāmamanyusamāvṛtaḥ /
naro garbhaṃ praviśati tatrāpi śṛṇu cottaram //

śukraṃ śoṇitasaṃsṛṣṭaṃ striyā garbhāśayaṃ gatam /
kṣetraṃ karmajamāpnoti śubhaṃ vā yadi vā'śubham //

saukṣmyādavyaktayāvācca na ca kvacana sajjati /
samprāpya brāhmaṇaḥ kāyaṃ tasmāttadbrahma śāśvatam //

tadbījaṃ sarvabhūtānāṃ tena jīvanti jantavaḥ //

sa jīvaḥ sarvabhūtānāṃ garbhamāviśya bhāgaśaḥ / dadhāti cetanā sadyaḥ prāṇasthāneṣvavasthitaḥ /
tataḥ spandayate'ṅgāni sa garbhaścetanānvitaḥ //

yathā lohasya viṣyando niṣikto bimbavigraham /
upaiti tadvajjānīhi garbhe jīvapraveśanam //

lohapiṇḍaṃ yathā vahniḥ praviśya hyatitāpayet / tathā tvamapi jānīhi garbhe jīvopapādanam /

yathā ca dīpaḥ śaraṇaṃ dīpyamānaḥ prakāśayet /
evameva śarīrāṇi prakāśayati cetanaḥ //

yadyacca kurute karma śubhaṃ vā yadi vā'śubham /
pūrvadehakṛtaṃ sarvamavaśyamupabhujyate //

tatastu kṣīyate caiva punaścānyatpracīyate /
yāvattu mokṣayogasthaṃ dharmaṃ naivāvabudhyate //

tatte dharmaṃ pravakṣyāmi sukhī bhavati yena vai /
āvartamāno jātīṣu yathā'nyonyāsu sattama //

dānaṃ vrataṃ brahmacaryaṃ yathoktavratadhāraṇam /
damaḥ praśāntatā caiva bhūtānāṃ cānukampanam //

saṃyamaścānṛśaṃsya ca parasvādānavarjanam /
vyalīkānāmakaraṇaṃ bhūtānā manasā bhuvi //

mātāpitrośca śuśrūṣā devatātitipūjanam /
gurupūjā ghṛṇā śaucaṃ nityamindrayasaṃyamaḥ //

pravartanaṃ śubhānāṃ ca tatsatāṃ vratamucyate /
tato dharmaḥ prabhavati yaḥ prajāḥ pāti śāśvatīḥ //

sadbhirācarito dharmaḥ sadācāre pratiṣṭhitaḥ /
ubhayārtho bhavatyeva svargārtho mokṣatastathā //

evaṃ satsu sadā paśyettatrachāpyeṣā dhruvā sthitiḥ /
ācāro dharmamācaṣṭe yasminsanto vyavasthitāḥ //

teṣu tatkarma nikṣiptaṃ yaḥ sa dharmaḥ sanātanaḥ /
yastaṃ samabhipadyeta na sa durgatimāpnuyāt //

ato niyamyate lokaḥ pracyavandharmavartmasu /
yaśca yogī ca muktaśca sa aitebhyo viśiṣyate //

vartamānasya dharmeṇa puruṣasya yathā tathā /
saṃsāratāraṇaṃ hyasya kālena mahatā bhavet //

evaṃ pūrvakṛtaṃ karma sarvo jantuḥ prapadyate /
sarvaṃ tatkāraṇaṃ yena nikṛto'pyamihāgataḥ //

śarīragrahaṇaṃ cāsya kena pūrvaṃ prakalpitam /
ityevaṃ saṃśaye loke tacca vakṣyāmyataḥ param //

śarīramātmanaḥ kṛtvā sarvalokapitāmahaḥ /
trailokyamasṛjadbrahmā kṛtsnaṃ sthāvarajaṅgamam //

tataḥ pradhānamasṛjaccetanāṃ tu śarīriṇām /
yayā sarvamidaṃ vyāptaṃ yāṃ loke paramāṃ viduḥ //

idaṃ tatkṣaramityuktaṃ paraṃ tvamṛtamakṣaram /
trayāṇāṃ mithunaṃ sarvamekaikasya pṛthakpṛthak //

asṛjatsarvabhūtāni pūrvadṛṣṭaḥ prajāpatiḥ /
sthāvarāṇi ca bhūtāni ityeṣā paurvikī śrutiḥ //

tasya kālaparīmāṇamakarotsa pitāmahaḥ /
bhūteṣu parivṛttiṃ ca panarāvṛttimeva ca //

yathā tu kaścinmedhāvī dṛṣṭātmā pūrvajanmani /
yatpravakṣyāmi tatsarvaṃ yathāvadupapadyate //

sukhaduḥkhe yathā samyaganitye yaḥ prapaśyati /
kāyaṃ cāmedhyasaṃsthānaṃ vināśaṃ karmasaṃhitam //

yacca kiñcitsukhaṃ tacca duḥkhaṃ dṛṣṭamiti smaran /
saṃsārasāgaraṃ ghoraṃ tariṣyati sudustaram //

janīmaraṇarogaiśca samāviṣṭaḥ pradhānavit /
cetanāvtasu caitanyaṃ samaṃ bhūteṣu paśyati //

nirvidyate tataḥ kaścinmārgamāṇaḥ paraṃ padam /
tasyopadeśaṃ vakṣyāmi yāthātathyena sattama //

śāśvatasyāvyayasyāth yadasya jñānamuttamam /
procyamānaṃ mayā vipra nibodhadamaśeṣataḥ //