Mahabharata · Chapter 14.114

evaṃ saṃvatsaraṃ pūrṇamekabhuktena yaḥ kṣipet /
tasya puṇyaphalaṃ yadvai tanmamācakṣva keśava //
bhagavānuvāca /

śṛṇu pāṇḍava tattvaṃ me vacanaṃ puṇyamuttamam /
yadakṛtvā'thavā kṛtvā naraḥ pāpaiḥ pramucyate //

ekabhuktena varteta naraḥ saṃvatsaraṃ tu yaḥ /
brahmacārī jitakrodho hyadhaśśāyī jitendriyaḥ //

śuciści snānato vyagraḥ satyavāganasūyakaḥ / arcanneva tu māṃ nityaṃ madgatenāntarātmanā /
sandhyayostu japennityaṃ madgāyatrīṃ samāhitaḥ //

namo brahmaṇyadevāyetyasakṛnmāṃ praṇamya ca /
vipramagrāsane kṛtvā yāvakaṃ bhaitrameva vā //

bhuktvā tu vāgyato bhūmāvācāntasya dvijanmanaḥ /
namo'stu vāsudevāyetyuktvā tu caraṇau spṛśet //

māsemāse samāpte tu bhojayitvā dvijāñśucīn /
saṃvatsare tataḥ pūrṇe dadyāttu vratadakṣiṇām //

navanītamayīṃ gāṃ vā tiladhenumathāpi vā / viprahastacyutaistoyaiḥ sahiraṇyaiḥ samukṣitaḥ /
tasya puṇyaphalaṃ rājankathyamānaṃ mayā śṛṇu //

daśajanmakṛtaṃ pāpaṃ jñānato'jñānatopi vā /
tadvinaśyati tasyāśu nātra kāryā vicāraṇā //
yudhiṣṭhira uvāca /

sarveṣāmupavāsānāṃ yacchreyaḥ sumahatphalam /
yacca niḥśreyasaṃ loke tadbhavānvaktumarhati //
bhagavānuvāca /

śṛṇu rājanyathāpūrvaṃ mayā'bhīṣṭaṃ tu modate /
tathā te kathayiṣyāmi madbhaktāya yudhiṣaṭhira //

yastu bhaktyā śucirbhūtvā pañcamyāṃ me narādhipa / upavāsavrataṃ kuryāttrikālaṃ cārcayaṃstu mām /
sarvakratuphalaṃ labdhvā mama loke mahīyate //
yudhiṣṭhira uvāca /

bhagavandevadeveśa pañcamī nāma kā tava /
tāmahaṃ śrotumicchāmi kathayasva mamānagha //
bhagavānuvāca /

parvadvayaṃ ca dvādaśyāṃ śravaṇaṃ ca narādhipa /
matpañcamīti vikhyātāṃ matpriyā ca viśeṣataḥ //

tasmāttu brāhmaṇaśreṣṭhairmanniveśitabuddhibhiḥ /
upavāsastu kartavyo matpriyārtaṃ viśeṣataḥ //

dvādaśyāmeva vā kuryādupavāsamaśaknuvan /
tenāhaṃ paramāṃ prīti yāsyāmi narapuṅgava //

ahorātreṇa dvādaśyāṃ mārgaśīrṣeṇa keśavam /
upoṣya pūjayedyo māṃ so'svamedhaphalaṃ labhet //

dvādaśyāṃ puṣyamāse tu nāmnā nārāyaṇaṃ tu mām /
upoṣya pūjayedyo māṃ vājimedhaphalaṃ labhet //

dvādaśyāṃ māghamāse tu māmupoṣya tu mādhavam /
pūjayedyaḥ samāpnoti rājasūyaphalaṃ nṛpa //

dvādaśyāṃ phālgune māsi govindākhyamupoṣya mām //
pūjayedyaḥ samāpnoti hyatirātraphalaṃ nṛpa //

dvādaśyāṃ māsi caitre tu māṃ viṣṇuṃ samupoṣya yaḥ /
pūjayaṃstadavāpnoti pauṇḍarīkasya yatphalam //

dvādaśyāṃ māsi vaiśākhe madhusūdanasañjñitam /
upoṣya pūjayedyo māṃ sogniṣṭomasya pāṇḍava //

dvādaśyāṃ jyeṣṭhamāse tu māmupoṣya trivikramam /
aryayedyaḥ samāpnoti gavāṃ medhaphalaṃ nṛpa //

āṣāḍhe vāmanākhyaṃ māṃ dvādaśyāṃ samupoṣya yaḥ /
naramedhasya sa phalaṃ prāpnoti bharatarṣabha //

dvādaśyāṃ śrāvaṇe māsi śrīdharākhyamupoṣya mām /
pūjayedya samāpnoti pañcayajñaphalaṃ nṛpa //

māse bhādrapade yo māṃ hṛṣīkeśākhyamarcayet /
upoṣya sa samāpnoti sautrāmaṇiphalaṃ nṛpa //

dvādaśyāmāśvayuṅmāse padmanābhamupoṣya mām /
arcayedyaḥ samāpnoti gosahasraphalaṃ nṛpa //

dvādaśyāṃ kārtike māsi māṃ dāmodarasañjñitam /
upoṣya pūjayedyastu sarvakratuphalaṃ nṛpa //

kevalenopavāsena dvādaśyāṃ pāṇḍunandana /
yatphalaṃ pūrvamuddiṣṭaṃ tasyārdhaṃ labhate nṛpa //

śrāvaṇe'pyevamevaṃ māmarcayedbhaktimānnaraḥ /
mama sālokyamāpnoti nātra kāryā vicāraṇā //

māsemāse samabhyarcya kramaśo māmatandritaḥ /
pūrme saṃvatsare kuryātpunaḥ saṃvatsaraṃ tu mām //

avighnamarcayānastu yo madbhakto matparāyaṇaḥ /
avighnamarcayānastu mama sāyujyamāpnuyāt //

arcayetprītimānyo māṃ dvādasyāṃ vedasaṃhitām /
sa pūrvoktaphalaṃ rājam̐llabhate nātra saṃśayaḥ //

gandhaṃ puṣpaṃ phalaṃ toyaṃ patraṃ vā mūlameva vā /
dvādaśyāṃ mama yo dadyāttatsamo nāsti matpriyaḥ //

etena vidhinā sarve devāḥ śakrapurogamāḥ /
madbhaktā naraśārdūla svargalokaṃ tu bhuñjate //
vaiśampāyana uvāca /

evaṃ vadati deveśe keśave pāḍunandanaḥ /
kṛtāñjaliḥ stotramidaṃ bhakttayā dharmātmajo'bravīt //

sarvalokeśa deveśa hṛṣīkeśaka namostu te /
sahasraśirase nityaṃ sahasrākṣa namostu te //

trayīmaya trayīnātha trayīstuta namonamaḥ /
yajñātmanyajñasambhūta yajñanātha namonamaḥ //

caturmūrte caturbāho caturvyūha namonamaḥ /
lokātmam̐llokakṛnnātha lokāvāsa namonamaḥ //

sṛṣṭisaṃhārakartre tu narasiṃha namonamaḥ /
bhaktapriya namaste'stu kṛṣṇa nātha namonamaḥ //

lokapriya namaste'stu bhaktavatsala te namaḥ /
brahmavāsa namaste'stu brahmanātha namonamaḥ //

rudrarūpa namaste'stu rudrakarmiratāya te /
pañcayajña namaste'stu sarvayajña namonamaḥ //

kṛṣṇapriya namaste'stu kṛṣṇanātha namonamaḥ /
yogipriya namaste'stu yoginātha namonamaḥ //

hayavaktra namaste'stu cakrapāṇe namonamaḥ /
pañcabhūta namaste'stu pañcāyudha namonamaḥ //
vaiśampāyana uvāca /

bhaktigadgadayā vācā stuvatyevaṃ yudhiṣṭhire /
gṛhītvā keśavo haste prītātmā taṃ nyavārayat //

nivārya ca punarvācā bhaktinamraṃ yudhiṣṭhiram /
vaktumeva naraśreṣaṭha dharmapūtraṃ pracakrame //
bhagavānuvāca /

anyavatkimidaṃ rājanmāṃ stauṣi narapuṅgava /
tiṣṭha pṛccha yathāpūrvaṃ dharmapūtra yudhiṣṭhira //
yudhiṣṭhira uvāca /

bhagavaṃstvatprasādāttu dharmaṃ smṛtvā punaḥpunaḥ /
na śāntirasti me deva nṛtyatīva ca me manaḥ //

idaṃ ca dharmasampannaṃ vaktumarhasi mādhava /
kṛṣṇapakṣeṣu dvādaśyāmarcanīyaḥ kathaṃ bhavet //
bhagavānuvāca /

śṛṇu rājanyathāpūrvaṃ tatsarvaṃ kathayāmi te /
paramaṃ kṛṣṇadvādaśyāmarcanāyāṃ phalaṃ mama //

ekādaśyāmupoṣyātha dvādaśyāmarcayettu mām /
viprānapi yathālābhaṃ pūjayedbhaktimānnaraḥ //

sa gaccheddakṣiṇāmūrtiṃ māṃ vā nātra vicāraṇā /
candrasālokyamathavā grahanakṣatrapūjitaḥ //