Mahabharata · Chapter 14.113

keśavenaivamukte tu cāndrāyaṇavidhikrame /
apṛcchatpunaranyāṃśca dharmāndharmātmajo nṛpa //
yudhiṣṭhira uvāca /

sarvabhūtapate śrīmansarvabhūtanamaskṛta /
sarvabhūtahitaṃ dharmaṃ sarvajña kathayasva naḥ //
bhagavānuvāca /

yaddaridrajanasyāpi svargyaṃ sukhakaraṃ bhavet /
sarvapāpapraśamanaṃ tacchṛṇuṣva yudhiṣṭira //

kārtikādyāstu ye māsā dvādaśaiva prakīrtitāḥ /
teṣvekabuktanimaḥ sarveṣāmucyate mayā //

kārtike yastu vai māse nandāyāṃ saṃyatendriyaḥ /
ekabhuktena madbhakto māsamekaṃ tu vartate //

jalaṃ vā na pibenmāse nāntaraṃ bhojanātparam /
ādityarūpaṃ māṃ nityamarcayansusamāhitaḥ //

vratānte bhojayedviprāndakṣiṇāṃ sampradāya ca /
krodhalobhavinirmuktastasya puṇyaphalaṃ śṛṇu //

vidhivatkapilādāne yatpuṇyaṃ samudāhṛtam / tatpuṇyaṃ samanuprāpya sūryakaloke mahīyate /
tataścāpi cyutaḥ kālātpuruṣeṣūpajāyate //

mārgaśīrṣaṃ tu yo māsamekabhuktena vartate /
kāmaṃ krodhaṃ ca lobhaṃ ca parityajya yathāvidhi //

snātvā cādityarūpaṃ māmaryayenniyatendriyaḥ /
japeccaiva ca gāyatrīṃ māmikāṃ vāgyatendriyaḥ //

māse parisamāpte tu bhojayitvā dvijāñśuciḥ /
tānarcayati madbhaktyā tasya puṇyaphalaṃ śṛṇu //

agnihotre kṛte puṇyamāhitāgnestu yadbhavet / tatpuṇyaṃ phalamāsādya yonenāṃ'baraśobhinā /
saha saptarṣilokeṣu yathākāmaṃ yathāsukham //

tataścāpi cyutaḥ kālāddharivarṣeṣu jāyate /
tatra prakāmaṃ krīḍitvā rājā paścādbhaviṣyati //

******** kṣipedevamekabhuktena yo naraḥ /
arcayanneva māṃ nityaṃ madgatenāntarātmanā //

ahiṃsāsatyasahitaḥ krodhaharṣavivarjitaḥ /
evaṃ yuktasya rājendra śṛṇu yatphalamuttamam //

viprātithyasahasreṣu yatpuṇyaṃ samudāhṛtam /
tatpuṇyaṃ samanuprāpya śakraloke mahīyate //

avatīrṇastataḥ kālādilāvarṣeṣu jāyate /
tatra sthitvā ciraṃ kālamasminvipro bhaviṣyati //

māghamāsaṃ sadā yastu vartate caikabhuktataḥ / madarcanaparo bhūtvā ḍambhaktodhavivarjitaḥ /
māmikāmapi sāvitrīṃ sandhyāyāṃ tu japedbudhaḥ //

dattvā du dakṣiṇāmante bhojayitvā dvijānapi / namiskaroti tānbhaktyā madgatenāntarātmanā /
trikālasnānayuktasya tasya puṇyaphalaṃ śṛṇu //

nīlakaṇṭhaprayuktena yonenāṃ'baraśobhinā /
pitṛlokaṃ vrajecchrīmānsevyamānopsaroṇaiḥ //

tatra prakāmaṃ krīḍitvā bhadrāśveṣūpajāyate /
tataścyutaścaturvedī vipro bhavati bhūtale //

yaścaretphālgunaṃ māsamekabhukto jitendriyaḥ /
namo brahmaṇyadevāyetyetanmantraṃ japetsadā //

pāyasaṃ bhojayedviprānvratānte saṃyatendriyaḥ /
madarcanaparo'krodhastasya puṇyaphalaṃ śṛṇu //

vimānaṃ sārasairyuktamārūḍhaḥ kāmagāmi ca /
nakṣatraloke ramate nakṣatrasadṛśākṛtiḥ //

tataścāpi cyutaḥ kālātketumāleṣu jāyate /
tatra prakāmaṃ krīḍitvā mānuṣeṣu munirbhavet //

caitramāsaṃ tu yo rājannekabhuktena vartate /
brahmacārī ca madbhaktyā tasya puṇyaphalaṃ śṛṇu //

yadagnihotriṇaḥ puṇyaṃ yathoktaṃ vratacāriṇaḥ /
tatpuṇyaphakalamāsādya candraloke mahīyate //

tato'vatīrṇo jāyeta varṣe ramaṇake punaḥ /
bhuktvā kāmāṃstatastasminniha rājā bhaviṣyati //

vaiśākhe yastu māse vai hyekabhuktena vartate /
dvijamagrāsane kṛtvā bhuñjanbhūmau ca vāgyataḥ //

namo brahmaṇyadevāyetyarcayitvā divākaram /
vratānte bhojayedviprāṃstasya puṇyaphalaṃ śṛṇu //

phalaṃ yadvidhivatproktamagniṣṭomātirātrayoḥ /
tatpuṇyaphalamāsādya devaloke mahīyate //

tato haimavate varṣe jāyate kālaparyayāt /
tatra prakāmaṃ krīḍitvā vipraḥ paścādbhaviṣyati //

jyeṣṭhamāsaṃ tu yo vipro hyekabhuktena vartate /
vipramagrāsane kṛtvā bhūmau bhuñjanyathāvidhi //

namo brahmaṇyadevāyetyuccaranmāṃ samāhitaḥ /
ḍambhānṛtavinirmuktastasya puṇyaphalaṃ śṛṇu //

cīrṇe cāndrāyaṇe samyagyatpuṇyaṃ samudāhṛtam /
tatpuṇyaphalamāsādya devaloke mahīyate //

athottarakurau varṣe jāyate nirgatastataḥ /
tataścāpi cyutaḥ kālādiha loke dvijo bhavet //

āṣāḍhamāsaṃ yo rājannekabhuktena vartate /
brahmacārī jitakrodho madarcanaparāyaṇaḥ //

vipramagrāsane kṛtvā bhūmau bhuñjañjitendriyaḥ /
kṛtvā triṣavaṇaṃ snānamaṣṭākṣaravidhānataḥ //

vratānte bhojayedvidvānpāyasena yudhiṣṭhira /
guḍodanena rājendra tasya puṇyaphalaṃ śṛṇu //

kapilāśatadānasya yatpuṇyaṃ pāṇḍunandana /
tatpuṇyaphalamāsādya devaloke mahīyate //

tato'vatīrṇaḥ kāle tu śākadvīpe tu jāyate /
tataścāpi cyutaḥ kālādiha vipro bhaviṣyati //

śrāvaṇaṃ yaḥ kṣipenmāsamekabhuktena vartate / namo brahmaṇyadevāyetyuktvā māmarcayetsadā /
vipramāgrāsane kṛtvā bhūmau bhuñjanyathāvidhi //

pāyasenārcayanviprāñjitakrodho jitendriyaḥ /
lobhamohavinirmuktastasya puṇyaphalaṃ śṛṇu //

kapilādānasya yatpuṇyaṃ vidhidattasya pāṇḍava /
tatpuṇyaṃ sama***prāpya śakraloke mahīyate //

tataścāpi cyuta kālātkuśadvīpe prajāyate /
tatri prakāmaṃ krīḍitvā vipro bhavati mānuṣe //

yastu bhādrapadaṃ māsamekabhuktena vartate /
brahmacārī jitakrodhaḥ satyasandho jitendriyaḥ //

vipramagrāsane kṛtvā pākabhedavivarjitaḥ /
namo brahmaṇyadevāyetyuktvā'sya caraṇau spṛśet //

tilānapi ghṛtaṃ vā'pi vratānte dakṣimāṃ dadat /
madbhaktasya naraśreṣṭha tasya puṇyaphalaṃ śṛṇu //

yatphalaṃ vidhivatproktaṃ rājasūyāśvamedhayoḥ /
tatpuṇyaphalamāsādya śakraloke mahīyate //

tataścāpi cyutaḥ kālājjāyate dhanadālaye /
tatra prakāmaṃ krīkaḍitvā rājā bhavati mānuṣe //

yaścāpyāśvayujaṃ māsamekabhuktena vartate / madgāyatrīṃ japedbhaktyā madgatenāntarātmanā /
dvisandhyaṃ vā trisandhyaṃ vā śatamaṣṭottaraṃ tu vā //

vipramagrāsane kṛtvā saṃyatendriyamānasaḥ /
vratānte bhojayedviprāṃstasya puṇyaphalaṃ śṛṇu //

aśvamedhasya yatpuṇyaṃ vidhivatpāṇḍunandana /
tatpuṇyaphalamāsādya mama loke mahīyate //

tataścāpi cyutaḥ kālācchvetadvīpe prajāyate /
tatra bhuktvā ca bhogāṃśca tato vipravaro bhavet //