Mahabharata · Chapter 13.91
avaśyaṃ kathanīyaṃ me tavaitannarapuṅgava /
yadarthaṃ tvāhamucchettuṃ samprāpto manujādhipa //
bhūgūṇāṃ kṣatriyā yājyā nityametajjanādhipa /
te ca bhedaṃ gamiṣyanti daivayuktena hetunā //
kṣatriyāśca bhṛgūnsarvānvadhiṣyanti narādhipa /
āgarbhādanukṛntanto daitadaṇḍanipīḍitāḥ //
tata utpatsyate'smākaṃ kule gotravivardhanaḥ /
aurvo nāma mahātejā jvalitārkasamadyutiḥ //
sa trailokyavināśāya kopāgniṃ janayiṣyati / mahīṃ saparvatavanāṃ yaḥ kariṣyati bhasmasāt /
kañcitkālaṃ tu vahniṃ ca sa eva śamayiṣyati / samudre vaḍavāvaktre prakṣipya munisattamaḥ /
putraṃ tasya mahārāja ṛcīkaṃ bhṛgunandanam /
sākṣātkṛtsno dhanurvedaḥ samupasthāsyate'nagha //
kṣatriyāṇāmabhāvāya daivayuktenu hetunā /
sa tu taṃ pratigṛhyaiva putre sankrāmayiṣyati //
jamadagnau mahābhāge tapasā bhāvitātmani /
sa cāpi bhṛguśārdūlastaṃ vedaṃ dhārayiṣyati //
kulāttu tava dharmātmankanyāṃ so'dhigamiṣyati /
udbhāvanārthaṃ bhavato vaṃśasya bharatarṣabha //
kṣatrahantā bhaveddhiṃsra iti daivaṃ sanātanam / nārāyaṇamupāsyāsya varāttaṃ putramṛcchati //
gādherduhitaraṃ prāpyi pautrīṃ tava mahātapāḥ /
brāhmaṇaṃ kṣatradharmāṇaṃ putramutpādayiṣyati //
kṣatriyaṃ vipradharmāṇaṃ bṛhaspatimivaujasā / viśvāmitraṃ tava kule gādheḥ putraṃ sudhārmikam /
tapasā mahatā yuktaṃ pradāsyati mahādyute //
striyau tu kāraṇaṃ tatra parivarte bhaviṣyataḥ /
pitāmahaniyogādvai nānyathaitadbhaviṣyati //
tṛtīye puruṣe tubhyaṃ brāhmaṇatvamupaiṣyati /
bhavitā tvaṃ ca sambandhī bhṛgūṇāṃ bhāvitātmanām //
bhīṣma uvāca /
kuśikastu munervākyaṃ cyavanasya mahātmanaḥ / śrutvā hṛṣṭo'bhavadrājā vākyaṃ cedamuvāca ha /
evamastviti dharmātmā tadā bharatasattama //
cyavanastu mahātejāḥ punareva narādhipam /
varārthaṃ codayāmāsa tamuvāca sa pārthivaḥ //
bāḍhamevaṃ grahīṣyāmi kāmāṃstvatto mahāmune /
brahmabhūtaṃ kulaṃ me'stu dharme cāsya mano bhavet //
evamuktastathetyevaṃ pratyuktvā cyavano muniḥ /
abhyanujñāya nṛpatiṃ tīrthayātrāṃ yayau tadā //
etatte kathitaṃ sarvamaśeṣeṇa mayā nṛpa /
bhṛgūṇāṃ kuśikānāṃ ca abhisambandhakāraṇam //
yathoktamṛṣiṇā cāpi tadā tadabhavannṛpa /
janma rāmasya ca munerviśvāmitrasya caiva hi //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0