Mahabharata · Chapter 13.78

tamāgatamabhiprekṣya śiṣyaṃ vākyamathābravīt /
devaśarmā mahātejā yattacchṛṇu janādhipa //
devaśarmovāca /

kiṃ tvayā mithunaṃ dṛṣṭaṃ tasmiñśiṣya mahāvane /
te tvāṃ jānanti nipuṇā ātmā ca rucireva ca //
vipula uvāca /

brahmarṣe mithunaṃ kintatke ca ṣaṭpuruṣā vibho /
ye māṃ jānanti tattvena yanmāṃ tvaṃ paripṛcchasi //
devaśarmovāca /

yadvai tanmithunaṃ brahminnahorātraṃ hi viddhi tat /
cakravatparivarteta tatte jānāti duṣkṛtam //

ye ca te puruṣā vipra akṣairdīvyanti hṛṣṭavat /
ṛtūṃstānabhijānīhi te te jānanti duṣkṛtam //

na māṃ kaścidvijānīta iti kṛtvā na viśvaset /
naro rahasi pāpātmā pāpakaṃ karma vai dvija //

kurvāṇaṃ hi naraṃ karma pāpaṃ rahasi sarvadā /
paśyanti ṛtavaścāpi tathā dinaniśe'pyuta //

tathaiva hi bhaveyuste lokāḥ pāpakṛto yathā /
kṛtvā'nācakṣataḥ karma mama tacca yathā kṛtam //

te tvāṃ harṣasmitaṃ dṛṣṭvā guroḥ karmānivedakam /
smārayantastathā prāhuste yathā śrautavānbhavān //

ahorātraṃ vijānāti ṛtavaścāpi nityaśaḥ /
puruṣe pāpakaṃ karma śubhaṃ vā'śubhakarmiṇaḥ //

tattvayā mama yatkarma vyabhicārādbhayātmakam /
nākhyātamiti jānantaste tvāmāhustathā dvija //

tenaiva hi bhaveyuste lokāḥ pāpakṛto yathā /
kṛtvā nācakṣataḥ karma mama yacca tvayā kṛtam //

tathā'śakyāśca durvṛttā rakṣituṃ pramadā dvija /
na ca tvaṃ kṛtavānkiñcidāgaḥ prītosmi tena te //

manodoṣavihīnānāṃ na doṣaḥ syāttathā tava /
anyathā'liṅgyate kāntā snehena duhitā'nyathā //

yateśca kāmukānāṃ ca yoṣidrūpe'nyathā matiḥ /
aśikṣayaiva manasaḥ prāyo lokastu vañcyate //

lāletyudvijate loko vaktrāsava iti spahā /
abandhāyogyamanasāmiti mantrātmadaivakam //

na rāgasnehalobhāndhaṃ karmiṇāṃ tanmahāphalam /
niṣkaṣāyo viśuddhastvaṃ rucyāveśānna dūṣitaḥ //

yadi tvahaṃ tvāṃ durvṛttamadrākṣaṃ dvijasattama /
śapeyaṃ tvāmahaṃ krodhānna me'trāsti vicāraṇā //

sañjanti puruṣe nāryaḥ puṃsāṃ so'rthaśca puṣkalaḥ /
anyathā rakṣataḥ śāpo'bhaviṣyatte matiśca me //

rakṣitā ca tvayā putra mama cāpi niveditā /
ahaṃ te prītimāṃstāta svasthaḥ svargaṃ gamiṣyasi //

ityuktvā vipulaṃ prīto devaśarmā mahānṛṣiḥ /
mumoda svargamāsthāya sahabhāryaḥ saśiṣyakaḥ //

idamākhyātavāṃścāpi mamākhyānaṃ mahāmuniḥ /
mārkaṇḍeyaḥ purā rājangaṅgākūle kathāntare //

tasmādbravīmi pārtha tvāṃ striyo rakṣyāḥ sadaiva ca /
ubhayaṃ dṛśyate tāsu satataṃ sādhvasādhu ca //

striyaḥ sādhvyo mahābhāgāḥ sammatā lokamātaraḥ /
dhārayanti mahīṃ rājannimāṃ savanakānanām //

asādhvyaścāpi durvṛttāḥ kulaghnāḥ pāpaniścayāḥ /
vijñeyā lakṣaṇairduṣṭaiḥ svagātrasahajairnṛpa //

evametāsu rakṣā vai śakyā kartuṃ mahātmabhiḥ /
anyathā rājaśārdūla na śakyā rakṣituṃ striyaḥ //

etā hi manujavyāghra tīkṣṇāstīkṣṇaparākramāḥ /
nāsāmasti priyo nāma maithune saṅgameti yaḥ //

etāḥ kṛtyāśca kaṣṭāśca kṛtaghnā bharatarṣabha /
na caikasminnamantyetāḥ puruṣe pāṇḍunandana //

nāsu sneho naraiḥ kāryastathaiverṣyā janeśvara / khedamāsthāya bhuñjīta dharmamāsthāya caiva ha /
anṛtāviha parvādidoṣavarjaṃ narādhipa //

vihanyetānyathā kurvannaraḥ kauravanandana /
sarvathā rājaśārdūla yuktaḥ sarvatra yujyate //

tenaikena tu rakṣā vai vipulena kṛtā striyāḥ /
nānyaḥ śaktastriloke'sminrakṣituṃ nṛpa yoṣitaḥ //