Mahabharata · Chapter 13.74

ime vai mānavā loke strīṣu sajjantyabhīkṣṇaśaḥ /
mohena paramāviṣṭā devadṛṣṭena karmaṇā //

striyaśca puruṣeṣveva pratyakṣaṃ lokasākṣikam /
atra me saṃśayastīvro hṛdi samparivartate //

kathamāsāṃ narāḥ saṅgaṃ kurvate kurunandanaḥ /
striyo vāteṣu rajyante virajyante ca tāḥ punaḥ //

iti tāḥ puruṣavyāghra kathaṃ śakyāstu rakṣitum /
pramadāḥ puruṣeṇeha tanme vyākhyātumarhasi //
bhīṣma uvāca /

etvā hi svīyamāyābhirvañcayantīha mānavān /
na cāsāṃ mucyate kaścitpuruṣo hastamāgataḥ //

gāvo navatṛṇānīva gṛhṇantyetā navannavam //

śambarasya ca yā māyā māyā yā namucerapi /
baleḥ kumbhīnaseścaiva sarvāstāṃ yoṣito viduḥ //

hasantaṃ prahasantyetā rudrantaṃ prarudanti ca /
apriyaṃ priyavākyaiśca gṛhṇate kālayogataḥ //

yadi jihvāsahasraṃ syājjīvecca śaradāṃ śatam / ananyakarmā strīdoṣānanuktvā nidhanaṃ vrajet //

uśanā veda yacchāstraṃ yacca veda bṛhaspatiḥ /
strī buddhyā na viśiṣyeta tāstu rakṣyāḥ kathaṃ naraiḥ //

anṛtaṃ satyamityāhuḥ satyaṃ cāpi tathā'nṛtam / iti yāstāḥ kathaṃ vīra saṃrakṣyāḥ puruṣairiha /
doṣāspade'śucau dehe hyāsāṃ saktāstvaho narāḥ //

strīṇāṃ buddhyarthaniṣkarṣādarthaśāstrāṇi śatruhan /
bṛhaspatiprabhṛtibhirmanye sadbhiḥ kṛtāni vai //

sampūjyamānāḥ puruṣairvikurvanti mano nṛṣu /
apāstāśca tathā rājanvikurvanti manaḥ striyaḥ //

imāḥ prajā mahāpāho dhārmikya iti naḥ śrutam //

satkṛtāsatkṛtāścāpi vikurvanti manaḥ sadā /
kastāḥ śakto rakṣituṃ syāditi me saṃśayo mahān //

tathā brūhi mahābhāga kurūṇāṃ vaṃśavardhana / yadi śakyā kuruśreṣṭha rakṣā tāsāṃ kadācana /

kartuṃ vā kṛtapūrvaṃ vā tanme vyākhyātumarhasi //