Mahabharata · Chapter 13.70

janmanaiva mahābhāgo brāhmaṇo nāma jāyate /
namasyaḥ sarvabhūtānāmatithiḥ praśritāgrabhuk //

sarveṣāṃ suhṛdastāta brāhmaṇāḥ sumanomukāḥ / sarvānete haniṣyanti brāhmaṇā jātamanyavaḥ /
gīrbhirmaṅgalayuktābhiranudhyāyanti pūjitāḥ //

sarvānno dviṣatastāta brāhmaṇā jātamanyavaḥ /
gīrbhirdāruṇayuktābhirhanyuścaite hyapūjitāḥ //

atra gāthāḥ purā gītāḥ kīrtayanti purāvidaḥ /
sṛṣṭvā dvijātīndhātā hi yathāpūrvaṃ samādadhat //

na vo'nyadiha kartavyaṃ kiñcidūrdhvāyanaṃ vidhi /
gupto gopāyate brahmā śreyo vastena śobhanam //

svameva kurvatāṃ karma śrīrvo brāhmī bhaviṣyati /
pramāṇaṃ sarvabhūtānāṃ pragrahāśca bhaviṣyatha //

na śaudraṃ karma kartavyaṃ brāhmaṇena vipaścitā /
śaudraṃ hi kurvataḥ karma brāhmī śrīruparudhyate //

śrīśca buddhiśca tejaśca vibhūtiśca pratāpinī /
svādhyāyenaiva mahātmyaṃ vipulaṃ pratipatsyatha //

hutvā cāhavanīyasthaṃ mahābhāgye pratiṣṭhitāḥ / agrabhojyāḥ prasūtīnāṃ śriyā brāhmayā'nukalpitāḥ

śraddhayā parayā yuktā hyanabhidrohalabdhayā /
damasvādhyāyaniratāḥ sarvānkāmānavāpsyatha //

yaccaiva mānuṣe loke yacca deveṣu kiñcana /
sarvaṃ vastapasā sādhyaṃ jñānena niyamena ca //

yuṣmatsammānanāṃ prītiṃ pāvanaiḥ kṣatriyā bhṛśam / amutreha samāyānti vaiśyaśūdrādhikāstathā //

arakṣitāśca yuṣmābhirviruddhā yānti vipravam / yuṣmattejodhṛtā lokāstadrakṣyatha jagattrayam //

ityevaṃ brahmagītāste samākhyātā mayā'nagha /
viprānukampārthamidaṃ tena proktaṃ hi dhīmatā //

bhūyasteṣāṃ balaṃ manye yathā rājñastapasvinaḥ /
durāsadāśca caṇḍāśca tapasā kṣiprakāriṇaḥ //

santyeṣāṃ simhasatvāśca vyāghrasatvāstathā'pare /
varāhamṛgasatvāśca gajasatvāstathā'pare //

sarpasparśasamāḥ kecittathā'nye makaraspṛśaḥ /
vibhāṣya ghātinaḥ kecittathā cakṣurhaṇo'pare //

santi cāśīviṣasamāḥ santi mandāstathā'pare /
vividhānīha vṛttāni brāhmaṇānāṃ yudhiṣṭhira //

mekalā drāviḍā lāṭāḥ pauṇḍrāḥ kānvaśirāstathā /
śauṇḍikā daradā dārvāścorāḥ śabarabarbarāḥ //

kirātā yavanāścaiva tāstāḥ kṣatriyajātayaḥ /
vṛṣatvamanuprāptā brāhmaṇānāmadarśanāt //

brāhmaṇānāṃ paribhavādasurāḥ salileśayāḥ /
brāhmaṇānāṃ prasādācca devāḥ svarganivāsinaḥ //

aśakyaṃ spraṣṭumākāśamacālyo himavāngiriḥ /
avāryā setunā gaṅgā durjayā brāhmamā bhuvi //

na brāhmaṇavirodhena śakyā śāstuṃ vasundharā /
brāhmaṇā hi mahātmāno devānāmapi devatāḥ //

tānpūjayasva satataṃ dānena paricaryayā /
yadīcchasi mahīṃ bhoktamimāṃ sāgaramekhalām //

pratigraheṇa tejo hi viprāṇā śāmyate'nagha /
pratigrahaṃ ye neccheyuste'pi rakṣyāstvayā nṛpa //