Mahabharata · Chapter 13.68

kiṃ rājñaḥ sarvakṛtyānāṃ garīyaḥ syātpitāmaha / kurvankiṃ karma nṛpatirubhau lokau samaśrute
bhīṣma uvāca /

etadrājñaḥ kṛtyatamamabhiṣiktasya bhārata /
brāhmaṇānāṃ rakṣaṇaṃ ca pūjā ca sukhamicchataḥ //

kartavyaṃ pārthivendreṇa tathaiva bharatarṣabha /
śrotriyānbrāhmaṇānvṛddhānnityamevābhipūjayet //

paurajānapadāṃścāpi brāhmaṇāṃśca bahuśrutān /
sāntvena bhogadānena namaskāraiḥ sadā'rcayet //

etatkṛtyatamaṃ rājño nityamevopalakṣayet /
yathā'tmānaṃ yathā putrāṃstathaitānpratipālayet //

ye cāpyeṣāṃ pūjyatamāstāndṛḍhaṃ pratipūjayet /
teṣu śānteṣu tadrāṣṭraṃ sarvameva virājate //

te pūjyāste namaskāryā mānyāste pitaro yathā /
teṣveva yātrā lokānāṃ bhūtānāmiva vāsave //

abhicārairupāyaiśca daheyurapi cetasā / niḥśepaṃ kupitāḥ kuryurugrāḥ satyaparākramāḥ /

nāntameṣāṃ prapaśyāmi na diśaścāpyapāvṛtāḥ /
kupitāḥ samudīkṣante dāveṣaavagniśikhā iva //

mānyāsteṣāṃ sādhavo ye na nindyāścāpyasādhavaḥ / bibhyatyeṣāṃ sāhasikā guṇāsteṣāmatīva hi /
kūpā iva tṛṇacchannā viśuddhā dyaurivāpare //

prasahyakāriṇaḥ kecitkārpāsamṛdavo'pare /
santi caiṣāmatiśaṭhāstathaivānye tapasvinaḥ //

kṛṣigorakṣyamapyeke bhaikṣyamanye'pyanuṣṭhitāḥ /
corāścānye'nṛtāścānye tathā'nye naṭanartakāḥ //

sarvakarmasahāścānye pārthiveṣvitareṣu ca /
vividhācārayuktāśca brāhmaṇā bharatarṣabha //

nānākarmasu raktānāṃ bahukarmopajīvinām / dharmajñānāṃ satāṃ teṣāṃ nityamavonukīrtayet

pitṝṇāṃ devatānaṃ ca manuṣyoragarakṣasām /
purā'pyete mahābhāgā brāhmaṇā vai janādhipa //

naite devairna pitṛbhirna gandharvairna rākṣasaiḥ /
nāsurairna piśācaiśca śakyā jetuṃ dvijātayaḥ //

adaivaṃ daivataṃ kuryurdaivataṃ cāpyadaivatam /
yamiccheyuḥ sa rājā syādyaṃ dviṣyuḥ sa parābhavet //

parivādaṃ ca ye kuryurbrāhmaṇānāmacetasaḥ /
satyaṃ bravīmi te rājanvinaśyeyurna saṃśayaḥ //

nindāpraśaṃsākuśalāḥ kīrtyakīrtiparāyaṇāḥ /
parikupyanti te rājansatataṃ dviṣatāṃ dvijāḥ //

brāhmaṇā yaṃ praśaṃsanti puruṣaḥ sa pravardhate /
brāhmaṇairyaḥ parākṛṣṭaḥ parābhūyātkṣaṇāddhi saḥ //

śakā yavanakāmbhojāstāstāḥ kṣatriyajātayaḥ /
vṛṣalatvaṃ parigatā brāhmaṇānāmadarśanāt //

drāviḍāśca kaliṅgāśca pulindāścāpyuśīnarāḥ /
kolisarpā mahipakāstāstāḥ kṣatriyajātayaḥ //

vṛpalatvaṃ parigatā brāhmaṇānāmadarśanāt /
śreyānparājayastebhyo na jayo jayatāṃvara //

yastu sarvamidaṃ hanyādbrāhmaṇaṃ ca na tatsamam /
brahmavadhyā mahāndoṣa ityāhuḥ paramarṣayaḥ //

parivādo dvijātīnāṃ na śrotavyaḥ kathañcana /
āsītādhomukhastūṣṇīṃ samutthāya vrajeta vā //

na sa jāto janiṣyo vā pṛthivyāmiha kaścana /
yo brāhmaṇavirodhena sukhaṃ jīvitumutsahet //

durgrāhyo muṣṭinā vāyurduḥsparśaḥ pāṇinā śaśī /
durdharā pṛthivī mūrdhnā durjayā brāhmaṇā bhuvi //