Mahabharata · Chapter 13.66

ke pūjyā vai triloke'sminmānavā bharatarpabha /
vistareṇa tadācakṣva na hi tṛpyāmi kathyataḥ //
bhīṣma uvāca /

atrāpyudāharantīmamitihāsaṃ purātanam /
nāradasya ca saṃvādaṃ vāsudevasya cobhayoḥ //

nāradaṃ prāñjaliṃ dṛṣṭvā pūjayānaṃ dvijarṣabhān /
keśavaḥ paripapraccha bhagavankrānnamasyami //

bahumānaparasteṣu bhagavanyānnamasyasi /
śakyaṃ cecchrotumasmābhirbrūhyetaddharmavittama //
nārada uvāca /

śṛṇu govinda yānetānpūjayāmyarimardana /
tvatto'nyaḥ kaḥ pumām̐lloke śrotumetadihārhati //

varuṇaṃ vāyumādityaṃ parjanyaṃ jātavedasam /
sthāṇu skandaṃ mahālakṣmīṃ viṣṇuṃ brahmāṇameva ca //

vācaspatiṃ candramasamapaḥ pṛthvīṃ sarasvatīm /
satataṃ ye namasyanti tānnamasyāmyahaṃ vibho //

tapodhanānvedavido nityaṃ vedaparāyaṇān /
mahārhānvṛṣṇiśārdūla sadā sampūjayāmyaham //

abhuktvā devakāryāṇi kurvate ye'vikatthanāḥ /
santuṣṭāśca kṣamāyuktāstānnamasyāmyahaṃ vibho //

samyagyajanti ye ceṣṭīḥ kṣāntā dāntā jitendriyāḥ /
satyaṃ dharmaṃ kṣitiṃ gāśca tānnamasyāmi yādava //

ye vai tapasi vartante vane mūlaphalāśanāḥ /
asañcayāḥ kriyāvantastānnamasyāmi yādava //

ye bhṛtyabharaṇe śaktāḥ satataṃ cātithivratāḥ /
bhuñjate devaśeṣāṇi tānnamasyāmi yādava //

ye veda prāpya durdharṣā vāgmino brahmacāriṇaḥ /
yājanādhyāpane yuktā nityaṃ tānpūjayāmyaham //

prasannahṛdayāścaiva sarvasatveṣu nityaśaḥ /
apṛṣṭhatāpānsvādhyāye yuktāstānpūjayāmyaham //

guruprasāde svādhyāye yatanto ye sthiravratāḥ /
śuśrūṣavo'nasūyantastānnamasyāmi yādava //

suvratā munayo ye ca brāhmaṇāḥ satyasaṅgarāḥ /
voḍhāro havyakavyānāṃ tānnamasyāmi yādava //

bhaikṣacaryāsu niratāḥ kṛśā gurukulāśrayāḥ /
niḥsukhā nirdhanā ye tu tānnamasyāmi yādava //

nirmamā niṣpratidvandvā niṣṭhitā niṣprayojanāḥ /
ye vedaṃ prāpya durdharṣā vāgmino brahmavādinaḥ //

ahiṃsāniratā ye ca ye ca satyavratā narāḥ /
dāntāḥ śamaparāścaiva tānnamasyāmi keśava //

devatātithipūjāyāṃ yuktā ye gṛhamedhinaḥ /
kapotavṛttayo nityaṃ tānnamasyāmi yādava //

yeṣāṃ trivargaḥ kṛtyeṣu vartate nopahīyate /
śiṣṭācārapravṛttāśca tānnamasyāmyahaṃ sadā //

brāhmaṇāḥ śrutasampannā ye trivargamanuṣṭhitāḥ /
alolupāḥ puṇyaśīlāstānnamasyāmi keśava //

avandhyakālā ye'lubdhāstrivarge sādhaneṣu ca / viśiṣṭācārayuktāśca nārāyaṇa namāmi tān //

abbhakṣā vāyubhakṣāścaka sudhābhakṣāśca ye sadā /
vrataiśca vividhairyuktāstānnamasyāmi mādhava //

ayonīnagniyonīṃśca brahmayonīṃstathaiva ca /
sarvabhūtātmayonīṃśca tānnamasyāmyahaṃ sadā //

nityametānnamasyāmi kṛṣṇa lokakarānṛṣīn /
lokajyeṣṭhānkulajyeṣṭhāṃstamoghnam̐llokabhāskarān //

tasmāttvamapi vārṣṇeya dvijānpūjaya nityadā /
pūjitāḥ pūjanārhā hi sukhaṃ dāsyanti te'nagha //

asmim̐lloke sadā hyete paratra ca sukhapradāḥ /
carante mānyamānā vai pradāsyanti sukhaṃ tava //

ye sarvātithayo nityaṃ goṣu ca brāhmaṇeṣu ca /
nityaṃ satye cābhiratā durgāṇyatitaranti te //

nityaṃ śamaparā ye ca tathā ye cānasūyakāḥ /
nityasvādhyāyino ye ca durgāṇyatitaranti te //

sarvāndevānnamasyanti ya caikaṃ vedamāśritāḥ /
śraddadhānāśca dāntāśca durgāṇyatitaranti te //

tathaiva viprapravarānnamaskṛtya yatavratāḥ /
bhavanti ye dānaratā durgāṇyatitaranti te //

tapasvinaśca ye nityaṃ kaumārabrahmacāriṇaḥ /
tapasā bhāvitātmāno durgāṇyatitaranti te //

devatātithibhṛtyānāṃ pitṝṇāṃ cārcane ratāḥ /
śiṣṭānnabhojino ye ca durgāṇyatitaranti te //

agnimādhāya vidhivatpraṇatā dhārayanti ye /
prāptaḥ somāhutiṃ caiva durgāṇyatitaranti te //

mātāpitrorguruṣu ca samyagvartanti ye sadā /
yathā tvaṃ vṛṣṇiśārdūletyuktvaivaṃ virarāma saḥ //

tasmāttvamapi kaunteya pitṛdevadvijātithīn /
samyakpūjayase nityaṃ gatimiṣṭāmavāpsyasi //