Mahabharata · Chapter 13.46

mūrdhnā nipatya niyatastejaḥsannicaye tataḥ /
paramaṃ harṣamāgatya bhagavantamathābravam //

dharme dṛḍhatvaṃ yudhi śatrughātaṃ yaśastathā'gryaṃ paramaṃ balaṃ ca
yogapriyatvaṃ tava sannikarṣaṃ vṛṇe sutānāṃ ca śataṃ śatāni //

evamastviti tadvākyaṃ mayoktaḥ prāha śaṅkaraḥ //

tato māṃ jagato mātā dhāriṇī sarvapāvanī / uvācomā praṇihitā śarvāṇī tapasāṃ nidhiḥ /
datto bhagavatā putraḥ sāmbo nāma tavānagha //

mattopyaṣṭau varāniṣṭāngṛhaṇa tvaṃ dadāmi te /
praṇamya śirasā sā ca mayoktā pāṇḍunandana //

dvijeṣvakopaṃ pitṛtaḥ prasādaṃ śataṃ sutānāṃ paramaṃ ca bhogam /
kule prītiṃ mātṛtaśca prasādaṃ- śamaprāptiṃ pravṛṇe cāpi dākṣyam //
umovāca /

evaṃ bhaviṣyatyamaraprabhāva nāhaṃ mṛṣā jātu vade kadācit /
bhāryāsahasrāṇi ca ṣoḍaśaiva tāsu priyatvaṃ ca tathā'kṣayaṃ

prītiṃ cāgryāṃ bāndhavānāṃ sakāśā- ddadāmi te'haṃ vapuṣaḥ kāmyatāṃ ca /
bhokṣyante vai saptatiṃ vai śatāni gṛhe tubhyamatithīnāṃ ca nityam //
vāsudeva uvāca /

evaṃ dattvā varāndevo mama devī ca bhārata /
antarhitaḥ kṣaṇe tasminsagaṇo bhīmapūrvaja //

etadatyadbhutaṃ pūrvaṃ brāhmaṇāyātitejase / upamanyave mayā kṛtsnaṃ vyākhyātaṃ pārthivottama /
namaskṛtvā tu sa prāha devadevāya suvrata //

nāsti śarvasamo devo nāsti śarvasamā gatiḥ /
nāsti śarvasamo dāne nāsti śarvasamo raṇe //