Mahabharata · Chapter 13.42

evaṃ dattābhayastena tato'hamṛṣisattamāḥ /
naṣṭakhedaśramabhayaḥ kṣaṇena hyabhavaṃ tadā //

sa śanairyāti bhagavāngatyā laghuparākramaḥ /
ahaṃ tu sumahāvegamāstāyānuvrajāmi tam //

sa gatvā dīrghamadhvānamākāśamamitahyutiḥ /
manasā'pyagamaṃ devamāsasādātmatatvavit //

atha devaḥ samāsādya manasaḥ sadṛśaṃ javam /
mohayitvā ca māṃ tatra kṣaṇenāntaradhīyata //

tatrāmbudharadhīreṇa bhośabdenānunādinā /
ayaṃ bho'hamiti prāha vākyaṃ vākyaviśāradaḥ //

śabdānusārī tu tatastaṃ deśamahamāvrajam /
tatrāpaśyaṃ tataścāhaṃ śrīmaddhaṃsayutaṃ saraḥ //

sa tatsaraḥ samāsādya bhagavānātmavittamaḥ /
bhośabdapratisṛṣṭena svareṇa prativādinā //

viveśa devaḥ svāṃ yoniṃ māmidaṃ cābhyabhāṣata /
viśasva salilaṃ saumya sukhamatra vasāmahe //

tataśca prāviśaṃ tatra saha tena mahātmanā /
dṛṣṭavānadbhutataraṃ tasminsarasi bhāsvatām //

agnīnāmapraṇītānāmiddhānāmindhanairvinā /
dīptānāmājyasiktānāṃ syāneṣvarciṣmatāṃ sadā //

dīptisteṣāmanājyānāṃ prāptājyānāmivābhavat /
aniddhānāmiva satāmiddhānāmiva bhāsvatām //

athāhaṃ varadaṃ devaṃ nāpaśyaṃ tatra saṅgatam /
tataḥ sammohamāpanno viṣādabhagamaṃ param //

apaśyaṃ cāgnihotrāṇi śataśo'tha sahasraśaḥ /
vidhinā sampraṇītāni dhiṣṇyeṣvājyavatāṃ tadā //

asambhṛṣṭatalāścaiva vedīḥ kusumasaṃstṛtāḥ /
kuśapadmotpalāsaṅgāḥ kalaśāṃśca hiraṇmayān //

agnihotrāṇi citrāṇi śataśo'tha sahasraśaḥ / agnihotrāya yogyāni yāni dravyāṇi kānicit /
tāni cātra samṛddhāni dṛṣṭavānasmyanekaśaḥ //

manohṛdyatamaścāgniḥ surabhiḥ puṇyalakṣaṇaḥ /
ājyagandho manogrāhī ghrāṇacakṣussukhāvahaḥ //

teṣāṃ tatrāgnihotrāṇāmīḍitānāṃ sahasraśaḥ /
samīpe tvadbhutatamamapaśyamahamavyayam //

candrāṃśukāśaśubhrāṇāṃ tuṣārodbhedavarcasām / vimalādityabhāsānāṃ sthaṇḍilāni sahasraśaḥ /
dṛṣṭānyagnisamīpe tu dhyutimanti mahānti ca //

eṣu cāgnisamīpeṣu śuśrāva supadākṣarāḥ / prabhāvāntaritānāṃ tu praspaṣṭākṣarabhāṣiṇām /
ṛgyajuḥsāmagānāṃ ca madhurāḥ susvarā giraḥ //

susammṛṣṭatalaistaistu bṛhadbirdīptatejasaiḥ /
pāvakaiḥ pāvitātmāhamabhavaṃ laghuvikramaḥ //

tato'haṃ teṣu dhiṣṇyeṣu jvalamāneṣu yajvanām /
taṃ deśaṃ praṇamitvā'tha anveṣṭumupacakrame //

tānyanekasahasrāṇi paryaṭaṃstu mahājavāt /
apaśyamānastaṃ devaṃ tato'haṃ vyathito'bhavam //

tatasteṣvagnihotreṣu jvalatsu vimalārciṣu /
bhānumatsu na paśyāmi devadevaṃ sanātanam //

tato'haṃ tāni dīptāni parīya vyasthitendriyaḥ /
nāntaṃ teṣāṃ prapaśyāmi khedaśca sahasābhavat //

visṛtya sarvato dṛṣṭiṃ bhayamohasamanvitaḥ /
śramaṃ parammamāpannaścintayānastvacetanaḥ //

tasminna khalu varte'haṃ loke yatraitadīdṛśam /
ṛgyajussāmanirghoṣaḥ śrūyate na ca dṛśyate //

na ca paśyāmi taṃ devaṃ yenāhamiha coditaḥ /
evaṃ cintāsabhāpannaḥ pradhyātumupacakrame //

tataścintayato mahyaṃ mohenāviṣṭacetasaḥ /
mahāśabdaḥ prādurāsītsubhṛśaṃ me vyathākaraḥ //

athāhaṃ sahasā tatra śṛṇomi vipuladhvanim /
apaśyaṃ ca suparṇānāṃ sahasrāṇyayutāni ca //

abhyadravanta māmeva vipuladyutiraṃhasaḥ /
teṣāmahaṃ prabhāveṇa sarvathaivāvaro'bhavam //

so'haṃ samantataḥ sarvaiḥ suparṇairatitejasaiḥ /
dṛṣṭvā'tmānaṃ parigataṃ sambhramaṃ paramaṃ gataḥ //

vinayāvanato bhūtvā namaścakre mahātmane /
anādinidhanāyaibhirnāmabhiḥ paramātmane //

nārāyaṇāya śuddhāya śāśvatāya dhruvāya ca /
bhūtabhavyabhaveśāya śivāya śivamūrtaye //

śivayoneḥ śivādyāyi śivapūjyatamāya ca /
ghorarūpāya mahate yugāntakaraṇāya ca //

viśvāya viśvadevāya viśveśāya mahātmane /
sahasrodarapādāya sahasranayanāya ca //

sahasrabāhave caiva sahasravadanāya ca /
śuciśravāya mahate ṛtusaṃvatsarāya ca //

ṛgyajuḥsāmavaktrāya atharvaśirase namaḥ /
hṛṣīkeśāya kṛṣṇāya druhiṇorukramāya ca //

bṛhadvegāya tārkṣyāya varāhāyaikaśṛṅgiṇe /
śipiviṣṭāya satyāya haraye'tha śikhaṇḍine //

hutāśāyordhvavaktrāya raudrānīkāya sādhave /
sindhave sindhuvarṣaghne devānāṃ sindhave namaḥ //

garutmate trinetrāya sudharmāya vṛṣākṛte /
sammrāḍugre sankṛtaye viraje sambhave bhave //

vṛṣāya vṛṣarūpāya vibhave bhūrbhuvāya va /
dīptasṛṣṭāya yajñāya sthirāya sthavirāya ca //

acyutāya tuṣārāya vīrāya ca samāya ca /
jiṣṇave puruhūtāya vasiṣṭhāya varāya ca //

satyeśāya sureśāya haraye'tha śikhaṇḍine /
barhiṣāya vareṇyāya vasave viśvavedhase //

kirīṭine sukeśāya vāsudevāya śuṣmiṇe /
bṛhadukthyasuṣeṇāya yugye dundubhaye tathā //

bhayesakhāya vibhave bharadvāje'bhayāya ca /
bhāskarāya ca candrāya padmanābhāya bhūriṇe //

punarvasubhṛtatvāya jīvaprabhaviṣāya ca /
vaṣaṭkārāya svāhāya svadhāya nidhanāya ca //

ṛce ca yajuṣe sāmne trailokyapataye namaḥ /
śrīpadmāyātmasadṛśe dharaṇīdhāriṇe pare //

saumyāsaumyasvarūpāya saumye sumanase namaḥ /
viśvāya ca suviśvāya viśvarūpadharāya ca //

keśavāya sukeśāya raśmikeśāya bhūriṇe /
hiraṇyagarbhāya namaḥ saumyāya vṛṣarūpiṇe //

nārāyaṇāgryavapuṣe puruhūtāya vajriṇe / varmiṇe vṛṣasenāya dharmasenāya rodhase /
munaye jvaramuktāyi jvarādhipataye namaḥ //

anetrāya trinetrāya piṅgalāya viḍūrmiṇe /
tapobrahmanidhānāya yugaparyāyiṇe namaḥ //

śaraṇāya śaraṇyāya bhakteṣṭaśaraṇāya ca /
namaḥ sarvabhaveśāya bhūtabhavyabhavāya ca //

pāhi māṃ devadeveśa kopyajosi sanātanaḥ /
evaṃ gatosmi śaraṇaṃ śaraṇyaṃ brahmayoninam //

stavyaṃ stavaṃ stutavatastattamo me praṇaśyata /
bhayaṃ ca me vyapagataṃ pakṣiṇo'ntarhitā'bhavan //

śṛṇomi ca giraṃ divyāmantardhānagatāṃ śivām / mā bhairgarutmandāntosi punaḥ sendrāndivaukasaḥ /
svaṃ caiva bhavanaṃ gatvā drakṣyase putrabāndhavān //

tatastasminkṣaṇenaiva sahasaiva mahādyutiḥ /
pratyadṛśyata tejasvī purastātsa mamāntike //

samāgamya tatastena śivena paramātmanā / apaśyaṃ cāhamāyāntaṃ naranārāyaṇāśrame /
caturdviguṇavinyāsaṃ taṃ ca devaṃ sanātanam //

yajatastānṛṣīndevānvadato dhyāyato munīn /
yuktānsiddhānnaiṣṭhikāṃśca japato yajato gṛhe //

puṣpapūraparikṣiptaṃ dhūpitaṃ dīpitaṃ hutam /
vanditaṃ siktasammṛṣṭaṃ naranārāyaṇāśramam //

tadadbhutamahaṃ dṛṣṭvā vismitosmi tadā'naghāḥ /
jagāma śirasā devaṃ prayatenāntarātmanā //

tadatyadbhutasaṅkāsaṃ kimetaditi cintayan /
nādhyagacchaṃ paraṃ divyaṃ tasya sarvabhavātmanaḥ //

praṇipatya sudurdharṣaṃ punaḥ punarudīkṣya ca / śirasyañjalimādhāya vismayotphullalocanaḥ /
avocaṃ tamadīnārthaṃ śreṣṭhānāṃ śreṣṭhamuttamam //

namaste bhagavandeva bhūtabhavyabhavatprabho /
yadetadadbhutaṃ deva mayā dṛṣṭaṃ tvadāśrayam //

anādimadyaparyantaṃ kiṃ tacchaṃsitumarhasi / yadi jānāsi sāṃ bhaktaṃ yadi vā'nugraho mayi /
śaṃsa sarvamaśeṣeṇa śrotavyaṃ yadi cenmayā //

svabhāvastava durjñeyaḥ prādurbhāvo bhavasya ca /
bhavadbhūtabhaviṣyeśa sarvathā gahanaṃ bhavān //

brūhi sarvamaśeṣeṇa tadāścaryaṃ mahāmune /
kiṃ tadatyadbhutaṃ vṛttaṃ teṣvagniṣu samantataḥ //

kāni tānyagnihotrāṇi keṣāṃ śabdaḥ śruto mayā /
śṛṇvatāṃ brahma satatamadṛśyānāṃ mahātmanām //

etanme bhagavankṛṣṇa brūhi sarvamaśeṣataḥ / gṛṇantyagnisamīpeṣu ke ca te brahmarāśayaḥ //