Mahabharata · Chapter 13.41

so'hamāmantrya pitaraṃ tadbhāvagatamānasaḥ /
svamevālayamāsādya tamevārthamacintayam //

tadbhāvagatabhāvātmā tadbhūtagatamānasaḥ /
govindaṃ cintayannāse śāśvataṃ paramavyayam //

dhṛtaṃ babhūva hṛdayaṃ nārāyaṇadidṛkṣayā / sohaṃ vegaṃ samāsthāya manomārutavegavān /
ramyāṃ viśālāṃ badarīṃ gato nārāyaṇāśramam //

tatastatra hariṃ jagataḥ prabhavaṃ vibhum / govindaṃ puṇḍarīkākṣaṃ praṇataḥ śirasā harim /
ṛgyajussāmabhiścainaṃ tuṣṭāva parayā mudā //

athāpaśyaṃ suvipulamaśvatthaṃ devasaṃśrayam //

caturdviguṇapīnāṃsaḥ śaṅkacakragadādharaḥ / prādurbabhūva puruṣaḥ pītavāsāḥ sanātanaḥ /
madhyāhnārkapratīkāśastejasā bhāsayandiśaḥ //

saṃstutaḥ saṃvidaṃ kṛtvā vrajeti śreyase rataḥ / prāgudīcīṃ diśaṃ devaḥ pratasthe puruṣottamaḥ /
diśaśca vidiśaścaiva bhāsayansvena tejasā //

tamahaṃ puruṣaṃ divyaṃ vrajantamamitaujasam /
anuvavrāja vegena śanairgacchantamavyayam //

yojanānāṃ sahasrāṇi ṣaṣṭimaṣṭau tathā śatam /
tathā śatasahasraṃ ca śataṃ dviguṇameva ca //

sa gatvā dīrgamadhvānamapaśyamahamadbhutam /
mahāntaṃ pāvakaṃ dīptamarciṣmantamanindhanam //

śatayojanavistīrṇaṃ tasmāddviguṇamāyatam /
viveśa sa mahāyogī pāvakaṃ pāvakadyutiḥ //

tatra śambhustapastepe mahādevaḥ sahomayā /
sa tena saṃvidaṃ kṛtvā pāvakaṃ samatikramat //

śramābhibhūtena mayā kathañcidanugamyate //

gatvā sa dīrghamadhvānaṃ bhāskareṇāvabhāsitam /
abhāskaramamaryādaṃ viveśa sumahattamaḥ //

atha dṛṣṭiḥ pratihatā mama tatra babhūva ha /
yathāsvabhāvaṃ bhūtātmā viveśa sa mahādyutiḥ //

tato'hamabhavaṃ mūḍho jaḍāndhabadhiropamaḥ /
diśaśca vidiśaścaiva na vijajñe tamovṛtaḥ //

avijānannahaṃ kiñcittasmiṃstamasi saṃvṛte /
sasambhrāntena manasā vyathāṃ paramikāṃ gataḥ //

so'haṃ prapannaḥ śaraṇaṃ devadevaṃ sanātanam /
prāñcalirmanasā bhūtvā vākyametattadoktavān //

bhagavanbhūtabhavyeśa bhavadbhūtakṛdavyaya /
śaraṇaṃ samprapannaṃ māṃ trātumarhasyarindama //

ahaṃ tu tattvajijñāsuḥ kosi kasyāsi kutra vā /
samprāptaḥ padavīṃ deva sa māṃ santrātumarhasi //

āvirbhūtaḥ purāṇātmā māmehīti sanātanaḥ / tatoparāntato devo viśvasya gatirātmavān /
mohayāmāsa māṃ tatra durvibhāvyavapurvibhuḥ //

svabhāvamātmanastatra darśayansvayamātmanā /
śramaṃ me janayāmāsa bhayaṃ cābhayadaḥ prabhuḥ //

khinna ityeva māṃ matvā bhagavānavyayo'cyutaḥ /
śabdenāśvāsayāmāsa jagāhe ca tamo mahat //

ahaṃ tamevānugataḥ śramālasapadaścaran /
manasā devadeveśaṃ dhyātuṃ samupacakrame //

tathāgataṃ tu māṃ jñātvā bhagavānamitadyutiḥ /
tamaḥ praṇāśayāmāsa mamānugrahakāṅkṣayā //

tataḥ pranaṣṭe tamasi tamahaṃ dīptatejasam /
apaśyaṃ tejasā vyāptaṃ madhyāhna iva bhāskaram //

svayamprabhāṃśca puruṣānstriyaśca paramādbhutāḥ /
apaśyamahamavyagrastasmindeśe sahasraśaḥ //

na tatra dyotate sūryo nakṣatrāṇi tathaiva ca /
na tatra candramā bhāti na vāyurvāti pāṃsulaḥ //

tatra tūryāṇyanekāni gītāni madhurāṇi ca /
adṛśyāni manojñāni śrūyante sarvatodiśam //

sravanti vaiḍūryalatāḥ padmotpalajhaṣākulāḥ /
muktāsikatavaprāśca sarito nirmalodakāḥ //

agatistatra devānāmasurāṇāṃ tathaiva ca /
gandharvanāgayakṣāṇāṃ rākṣasānāṃ tathaiva ca //

svayamprabhāstatra narā dṛśyante'dbhutadarśanāḥ /
yeṣāṃ na devatāstulyāḥ prabhābhirbhāvitātmanām //

sa ca tānapyatikramya daivatairapi pūjitaḥ /
viveśa jvalanaṃ dīptamanindhanamanaupamam //

jvālābhirmāṃ praviṣṭaṃ ca jvalantaṃ sarvatodiśam /
daityadānavarakṣobhirdaivataiścāpi dussaham //

jvālāmālinamāsādya tamagnimahamavyayam /
aviṣahyatamaṃ matvā manasedamacintayam //

mayā hi samareṣvagniranekeṣu mahādyutiḥ /
praviṣṭaścāpaviddhaśca na ca māṃ dagdhavānkvacit //

ayaṃ ca dussahaḥ śaśvattejasā'tihutāśanaḥ /
atyādityaprakāśārciranalo dīpyate mahān //

sa tathā dahyamānopi tejasā dīptavarcasā /
prapannaḥ śaraṇaṃ devaṃ śaṅkacakragadādharam //

bhaktaścānugataśceti trātumarhasi māṃ vibho /
yathā māṃ na dahedagniḥ sadyo deva tathā kuru //

evaṃ vilapamānasya jñātvā me vacanaṃ prabhuḥ /
mā bhairiti vacaḥ prāha meghagambīranisvanaḥ //

sa māmāśvāsya vacanaṃ prāhedaṃ bhagavānvibhuḥ /
mama tvaṃ viditaḥ saumya yathāvattatvadarśane //

jñāpitaścāpi yatpitrā taccāpi viditaṃ mahat /
vainateya mamāpyevamahaṃ vedyaḥ kathañcana //

mahadetatsvarūpaṃ me na te vedyaṃ kathañcana /
māṃ hi vindanti vidvāṃso ye jñāne pariniṣṭhitāḥ //
nirmamā nirahaṅkārā nirāśīrbandhanāyutāḥ //

bhavāṃstu satataṃ bhakto manmanāḥ pakṣisattama /
sthūlammāṃ vetsyase tasmājjagataḥ kāraṇesthitam //